މާލެ ޖަލުގައި ޝަރީޢަތް ނިމެންދެން ބަންދުކޮށްފައިވާ މީހެއްގެ ފައިގެ ނާރުތަކުގެ މައްސަލަ ޖެހި އޮޕަރޭޝަންކުރުމަށްޓަކައި ޑޮކްޓަރުން އެންގި ނަމަވެސް އޮޕަރޭޝަން ނުކޮށް 1 އަހަރަށްވުރެ ގިނަދުވަސް ވެގެން ހިނގައްޖެކަމުގައި އިރުވަރު ނޫހަށް މަޢުލޫމާތު ލިބިއްޖެއެވެ. ބަންދުގައިވާ މީހާއަކީ 2019 ވަނަ އަހަރު ޝަރީޢަތުން ގޮތެއް ނިމެންދެން ބަންދުކުރި މީހެކެވެ. އޭރު މައްސަލަ ބެއްލެވި ގާޒީ ވަނީ މައްސަލަ ގާތްގަނޑަކަށް 6 މަސް ތެރޭގައި ނިންމާލެވޭނެކަމަށް ލަފާކުރެވޭކަމުގައި ވިދާޅުވެފައެވެ. އެހެން ނަމަވެސް، އެމައްސަލަ ނުނިމި ދިގުލައިގެންގޮސް މިހާރު 3 އަހަރު ވެއްޖެއެވެ.
ޖަލުގައި ބަންދުގައިވާ މިހާގެ ފައިގެ ނާރުތަކުގެ މައްސަލަޖެހި ނާރު ފުއްޕައި ދުޅަވެފައިވާތާ އެތަކެއް ދުވަހެއްވެއްޖެކަމަށް އޭނާގެ އާއިލާއިން ބުނެއެވެ. މިދިޔަ އަހަރުގެ ކުރީކޮޅު އޭނާގެ ފައިގެ އޮޕަރޭޝަންކުރަން ޑޮކްޓަރުން ލަފާދީފައިވާކަން ޕީޖީން ކުރިމިނަލް ކޯޓުގައި ދެއްކި ވާހަކަތަކުން އެނގެއެވެ. އޭރު ޕީޖީން ކޯޓުގައި ބުނީ އެއޮޕަރޭޝަނަކީ މައިނަރ އޮޕަރޭޝަނެއްކަމާއި، އަރޖެންޓް ނޫންކަމެވެ. އެހެން ނަމަވެސް، އެކަށީގެންވާ ބޭސް ފަރުވާނުކުރެވި ޖަލުގެ ދަތި މާޙައުލުގައި އުޅެންޖެހުމުގެ ދަތި ތަޙައްމަލުކުރަމުންދާކަން ކަމާބެހޭ ހުރިހާ މުވައްސަސާއަކަށް އޭނާ އަންގަމުންނެވެ.
ފައިގެ ނާރުތަކުގެ މައްސަލަ ޖެހުމުން، ފައި އައްސިވެ، ނާރުތަށް ދުޅަވެ، ލޭ ދައުރުކުރުމުގައި މައްސަލަތަކެއް މެދުވެރިވެއެވެ. އެހެން ވުމުގެ ސަބަބުން، ނާރުތަކުގައި ރިހި، ފައި ބަރުވާކަމުގެ އިޙްސާސްކުރެވޭކަމުގައި ބަންދުގައިވާ މީހާގެ ފަރާތުން މަޢުލޫމާތު ލިބެއެވެ. ޖަލުގައި އޮންނައިރު ގިނައިރު އެއްތާކު އިށީންދެ އިނުމަށާއި، ކޮޅަށްހުރުމަށާއި، ނަމާދުގައި އައްތަހިޔާތުގައި އިންނައިރު އަދި ދެސަޖިދަ ދެމެދުގައި އިންނައިރު، އެތަކެއް ދަތިތަކެއްދަނީ ތަޙައްމަލުކުރަމުންކަމުގައި ބަންދުގައިވާ މީހާގެ އާއިލާހެ ފަރާތުން މަޢުލޫމާތު ލިބެއެވެ. މިމައްސަލަ ހިއުމަން ރައިޓްސް ކޮމިޝަނަށްވެސް ހުށައަޅާފައިވާކަމަށް އޭނާގެ ދިފާއީ ވަކީލު ވަނީ ވިދާޅުވެފައެވެ.
ބަންދު މުރާޖަޢާ އަޑުއެހުންތަކުގައި ޕީޖީ ހެދީ ދޮގު / އަޑުއެހުން ތާވަލުކުރުމާއެކު ޑޮކްޓަރަށް ދެއްކުމުގެ ނުބައި އާދަ!
ބަންދުގައިވާ ބަލި މީހާގެ ބަންދުގައި ބެހެއްޓި ޙާލަތު ދެމިއޮތްތޯ ރިވިއުކުރުމަށްޓަކައި މާރޗް އަދި އެޕްރިލް މަހު ބޭއްވި އަޑުއެހުންތަކުގައި ޕީޖީން ބުނެފައިވަނީ ބަންދުގައިވާ މީހާގެ ފައިގެ ނާރުތަކުގެ އޮޕަރޭޝަން ކުރަންޖެހޭކަމަށެވެ. އެހެން ނަމަވެސް، އެއީ މައިނަރ އޮޕަރޭޝަނެއްކަމާއި، އަރޖެންޓް ނޫންކަމަށެވެ. އޭރުވެސް، ބަންދުގައި އޮތް ފަރާތުން ބުނަމުން އައީ ނާރުތަކުގެ މައްސަލައާހެދި ފައިގެ އޮޕަރޭޝަން ކުރަން ބޭނުންވާކަމަށާއި، ފައި އައްސިވެ، ބަރުވެ، ތަދުވާތީ، ފައި ބުރިކޮށްލުންވެސް އެޙާލަށްވުރެ ރަނގަޅުވާނެކަމުގައެވެ.
ކޮވިޑް 19 ގެ ޙާލަތާއިހެދި މާލެ ޖަލުގައި ޕޮޒިޓިވް ވާމީހުންގެ ޢަދަދު ހައްދުންނެއްޓިގެން ދިޔައީ ޖޫން އަދި ޖުލައި މަހުގައެވެ. އޭރު ހޯމް މިނިސްޓަރ ޢިމްރާން ޢަބްދުﷲ އަދި ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ފުޅު މީޑިއާ ޕްލެޓް ފޯމުތަކުގައި ފަޚުރުވެރިކަމާއެކު ބުނަމުން އައީ ވީޑިއޯ ކޮންފަރެންސް މެދުވެރިކޮށްވެސް ޑޮކްޓަރަށް ދެއްކޭނެ އިންތިޒާމް ޖަލުތަކުގައި ހަމަޖެހިފައިވާކަމަށެވެ. އެހެން ނަމަވެސް، އެއިންތިޒާމްތަކުގެ ތެރެއިން ޖަލުގައި ޑޮކްޓަރަށް ދެއްކުނު މީހަކު ނެތްކަމަކީ ބޮޑު ޙަޤީޤަތެވެ. ބަންދުގައިވާ މީހާގެ ބަންދު މުރާޖަޢާކުރުމުގެ އަޑުއެހުމެއް ޝެޑިއުލްކޮށް ކުރިމިނަލް ކޯޓުން އަމުރު މޯލްޑިވްސް ކަރެކްޝަނަލް ސަރވިސަސް އަށް ފޮނުވުމާއެކު ބަންދުގައިވާ މީހާ ދެއްކީ ދަތުގެ ޑޮކްޓަރަށްކަމުގައި ބަންދުގައިވާ މީހާގެ އާއިލާއިން ބުނެއެވެ. ދަތުގެ ޑޮކްޓަރަށް ދެއްކީ ބަންދު މުރާޖަޢާ އަޑުއެހުން ތާވަލުކުރުމުގެ 1 (އެކެއް) ދުވަސްކުރިންނެވެ. އެއީ 2021 ވަނަ އަހަރުގެ އޮގަސްޓް މަހެވެ. އެހެން ނަމަވެސް، ބަންދު މުރާޖަޢާކުރުމުގެ އަޑުއެހުމުގައި ދައުލަތުން ޕީޖީ ބުނެފަވަނީ ބަންދުގައިވާ މީހާ ދައްކާފަވަނީ ނާރުގެ ޑޮކްޓަރަކަށް ކަމަށެވެ. ނާރުގެ ޑޮކްޓަރަކަށް ބަންދުގައިވާ މީހާ ދައްކާފައިވަނީ ކުރިމިނަލް ކޯޓުގައި ބޭއްވި ބަންދު މުރާޖައާ އަޑުއެހުން ނިމުނުތާ 01 ދުވަސް ފަހުންނެވެ.
ޢާއިލާއިން އެދޭ ގޮތް:
ބަންދުގައިވާ ފަރާތުގެ ޢާއިލާއިން މިހާރު ވަނީ ޢާއިލާ ޚަރަދުގައި ފައިގެ ނާރުތަކުގެ އޮޕަރޭޝަންކުރުމުގެ އޮޕަރޭޝަންކުރުމަށްޓަކައި ވާންޖެހޭ ތައްޔާރީތަށްވެފައެވެ. އެހެން ނަމަވެސް، ބަލި މީހާ ހުރީ ބަންދުގައިކަމުން އޮޕަރޭޝަންކުރެވޭނެ ދުވަހެއް އެއްވެސް ވަރަކަށް ނޭނގޭކަމަށް އާއިލާއިން ބުނެއެވެ. މޯލްޑިވްސް ކަރެކްޝަނަލް ސަރވިސަސްގެ ބެލުމުގެ ދަށުގައި ހުރެގެން، އެފަދަ އޮޕަރޭޝަނެއްކުރުމަށްޓަކައި ޢާއިލާއިން އަދި ބަންދުގައިހުރި ފަރާތުންވެސް ދެކޮޅެވެ. އެއީ، ޞިއްޙީ އިހުމާލުތަކުގެ ބިރައްޓަކައެވެ. ޞިއްޙީ އިހުމާލުތަކާހުރެ އެތަކެއް ބަޔަކު ފުރާނަ ގޮސްފައިވާ ވާހަކައަކީ އާންމުކޮށް އިވޭ އަޑެކެވެ. ޖަލުގައި ފަރުވާ ނުލިބިގެންވެސް ބަޔަކު މަރުވެ ހިނގައްޖެއެވެ. ޤަބޫލުކުރަންޖެހޭ ޙަޤީޤަތަކީ ރާއްޖޭގެ ޖަލުތަކުގައި ބަންދުގައިވާ އެއްވެސް މީހަކަށް އެކަށީގެންވާ ފެންވަރެއްގެ ބޭސް ފަރުވާ ނުލިބޭކަމެވެ. މިއީ ޖަލުގައި ތިބޭ ޤައިދީންގެ ފަރާތުން އަންނަ އެންމެ ބޮޑު ޝަކުވާއެވެ.
