ތ. ގާދިއްފުށީގައި ގެންގުޅުނު މަކާއޯއެެއް ގެއްލިގެން ހޯދަން ފަށައިފިއެވެ.
"ލަކީ"ގެ ނަމުން ނަން ދީފައިވާ މި މަކާއޯ ގެއްލިފައިވަނީ މިމަހުގެ 5 ވަނަ ދުވަހުގެރޭގެ ވަގުތެއްގައެވެ. އިރުވަރު ނޫހަށް މައުލޫމާތުދެމުން މި ދޫނީގެ ވެރިފަރާތުން ބުނީ މި ދޫނި އެރަށުގައި ގެންގުޅޭތާ އަހަރަށްވުރެ ގިނަ ދުވަސްވެފައިވާކަމަށާއި އެ ދޫނި ގެއްލިފައިވަނީ މިމަހުގެ 5 ވަނަ ދުވަހުގެރޭ ރުކަކަށް ޖެއްސުމަށް ފަހުގައި ކަމަށެވެ. އެ ދޫނި މިހާރު އެރަށުގައި އިން ކަމަށް ނުބެލެވޭކަމަށް އޭގެ ވެރިފަރާތުން ބުނެއެވެ.
"ހިޔެއް ނުވޭ މިރަށުގައި މިހާރު ލަކީ އިންހެނެއް. އެހެން ރަށަކަށް ދިޔަކަމަށް ލަފާކުރެވެނީ. އަޅުގަނޑުމެން މިދަނީ މި ދޫނި ފެނޭތޯ އެކިގޮތްތަށް މަސައްކަތް ކުރަމުން. އިނާމު ހުށައަޅައިގެން އެކި ގޮތްގޮތުން އިއުލާން ކުރަމުން. މި ދޫނި ހޯދައިދޭ ފަރާތަކަށް 20000 ރުފިޔާ އަަޅުގަނޑުމެން ހުށައަަޅާފައިވާނީ." ދޫނީގެ ވެރިފަރާތުން ބުންޏެވެ.
"ލަކީ" އާ ބެހޭ އެއްވެސް މައުލޫމާތެއް ލިބިފައިވާނަމަ 9812915، 9164515 އަށް ގުޅައި އެ މައުލުމާތު ހިއްސާކުރުމަށް އެދޫނީގެ ވެރިފަރާތުން ބުނެއެވެ.
މަކާއޯއަކީ ގުރާގެ ބާވަތްތަކުގެތެރެއިން އެންމެ ބޮޑުވާ ސައިޒުގެ ގުރައެވެ. މި ދޫންޏަކީ ފަސޭހައިން އޮޅުކުރެވޭ އިންސާނުންނާ ވަރަށް ރައްޓެހި ދޫންޏެކެވެ.
