ފިއުލް ސަޕްލައި މޯލްޑިވްސް، އެފްއެސްއެމުން އަތޮޅުތަކަށް ތެޔޮ އުފުލާ ފްލީޓަށް އިތުރު ބާޖެއް ގެނެސްފިއެވެ. އަލަށް ގެނެސްފައިވާ ބާޖަކީ އެއްފަހަރާ 360000 ލީޓަރުގެ ތެޔޮ އުފުލުމުގެ ޤާބިލްކަން ހުރި ބާޖެކެވެ. މިއާއެކު މިބާޖަކީ އެކުންފުނީގައި އޮތް އެންމެ ބޮޑު ތެޔޮ އުފުލާ ބާޖެވެ.
މިހާރުވެސް ތެޔޮ ވިއްކާ އަމިއްލަ ފަރާތްތަކަށް ތެޔޮ ލިބުމުގައި ދަތިތަކެއް ހުރިކަން އެފަރާތްތަކުން ފާހަގަކުރާ ކަމަށާއި، މި ތެޔޮ ބާޖާއެކު ދުވަހުން ދުވަހަށް ތެޔޮ ފޯރުކޮށްދިނުމުގައި ކުރިން ދިމާވި ދަތިތަކަށް ހައްލު ލިބިގެންދާނެ ކަމަށް އެކުންފުނިން ވަނީ ހާމަކޮށްފައެވެ.
2019 ވަނަ އަހަރު އެފްއެސްއެމުން ވަނީ 4 ބާޖެއް ބަނުމުގެ މަސައްކަތް ފަށާފައެވެ. މިސްރުގެ ކުންފުންޏަކާއި ހަވާލުކޮށްގެން ބަންނަމުން ދިޔަ މި ބާޖުތަކުން 2 ބާޖެއް ވަނީ މިދިޔަ ރޯދަމަހުގެ ފަހުކޮޅު ރާއްޖެ ގެނެސްފައެވެ. އަލަށް ބަންނަ ބާޖުތަކުގެ ތެރެއިން ބާކީ އޮތް 2 ބާޖު ރާއްޖެއަށް ގެނައުމަށް ކުރަންޖެހޭ މަސައްކަތް ކުރަމުން އަންނަކަމަށާއި ކުރިޔަށް އޮތް މަސްދުވަސްތެރޭ މި ދެ ބާޖުވެސް ރާއްޖެ އަންނާނެކަމަށެވެ.
