ރައީސުލްޖުމްހޫރިއްޔާ ވަޒީރުކަމަށް ބޭފުޅަކު އައްޔަން ކުރެއްވުމުގެ މަރުހަލާ ކުރިއަށް ގެންދަވާނެ ކަމަށް ކުރިން ޤަބޫލުކުރެވިފައި އޮތީ، ޤާނޫނީ ގޮތުން ބައްލަވަން ޖެހޭ ކަންކަން ރަނގަޅަށް ބައްލަވާ ނިންމެވުމަށް ފަހުގައި ކަމަށެވެ. ނަމަވެސް، އަލަށް އައްޔަން ކުރެއްވި ޓޫރިޒަމް މިނިސްޓަރު ޑރ. ޢަބްދުﷲ މަޢުސޫމް މަޢުސޫމް ދެ ފަހަރަށް ވަޒީރު ކަމަށް އައްޔަން ކުރައްވައި ދެ ފަހަރު ހުވާ ކުރައްވަން ޖެހިވަޑައިގަތެވެ.
މިކަންކަން ފެންމަތިވެގެން އައީ ޑރ. މަޢުސޫމަށް ރައްޔިތުންގެ މަޖިލީހުގެ ރުހުން ހޯއްދަވައި ފޮނުއްވުމުން ކޮމިޓީން އެނަން ދިރާސާކުރައްވައި މަޖިލީހަށް ރިޕޯޓް ހުށަހެޅުއްވި ހިސާބުންނެވެ. މަޖިލީހުގެ ތަޅުމަށް ރިޕޯޓް ހުށަހަޅުއްވައި ބަހުސަށް ހުޅުވާލުމުން މެންބަރުން ވަރަށް މުޙިއްމު ޤާނޫނީ މައްސަލައެއް ފެންމަތިކުރެއްވިއެވެ. އެއީ ޑރ. މަޢުސޫމް ޓޫރިޒަމް މިނިސްޓަރު ކަމަށް އައްޔަން ކުރެއްވިއިރު ހުންނެވީ ކުންފުންޏެއްގެ މެނޭޖިން ޑިރެކްޓަރުގެ މަގާމުގައިކަމެވެ. އަދި މަޤާމުން އިސްތިޢުފާ ދެއްވާފައިވަނީ ވަޒީރުކަމުގެ ހުވާކުރެއްވި ފަހުންކަންވެސް މެންބަރުން ފާހަގަ ކުރެއްވިއެވެ.
ޑރ. މަޢުސޫމު ވަޒީރުކަމަށް އައްޔަންކުރައްވައި ވަޒީރުކަމުގެ ހުވާ ކުރެއްވީ ޤާނޫނޫ އަސާސީއާ ޚިލާފަށްކަމަށް ކަނޑައަޅައި އަލުން އެ މަރުހަލާ ކުރިއަށް ގެންދެވުމަށް ރައްޔިތުންގެ މަޖިލީހުގެ ކަމާބެހޭ ކޮމިޓީން ނިންމަވައި ރައީސުލްޖުމްހޫރިއްޔާއަށް ދެންނެވުމުން، ޑރ. މަޢުސޫމު އަލުން ވަޒީރުކަމަށް އައްޔަންކުރައްވައި ވަޒީރުކަމުގެ ހުވާ ވެސް ވަނީ ކުރައްވާފައެވެ.
މިއީ ދެވަނަ ވިސްނުމަކުން ވިސްނާލަން ޖެހޭ ވަރަށް މުހިއްމު ކަމެކެވެ. ވަޒީރުންގެ މަޖިލީހުގެ މެންބަރަކު ރައީސުލްޖުމްހޫރިއްޔާ އައްޔަންކުރައްވައި، ފަނޑިޔާރެއްގެ ކުރިފުޅުމަތީގައި ހުވާކުރައްވައި، ރުހުން ހޯއްދެވުމަށް ރައްޔިތުންގެ މަޖިލީހާ ހަމައަށް އެ ނަމެއް ދާއިރު، މުޅި މަރުހަލާ ހިންގަވާފައި އޮންނަންވާނީ ޤާނޫނު އަސާސީ އާއި ޤާނޫނާ އެއްގޮތްވާ ގޮތުގެ މަތިންނެވެ. އެކަން ރައީސުލްޖުމްހޫރިއްޔާ އޮފީހުގެ ޤާނޫނީ ޓީމުންނާއި އިދާރީ ނިޒާމުގެ ތެރެއިން ފުރިހަމަވެފައި އޮތުން ވަރަށް މުހިއްމެވެ. އެހެން ނޫންނަމަ މިނޫންވެސް މިފަދަ ވަރަށް ނާޒުރު ހާލަތްތަކެއް މެދުވެރިވުން އެކަށީގެންވެއެވެ.
