ރާއްޖޭގައި މިހާތަނަށް ހިންގާ ތަރައްޤީގެ އެންމެ ބޮޑު މަޝްރޫއު އަވަސް މުސްތަޤުބަލެއްގައި ފެށޭނެ ކަމަށް ދިވެހި ޚާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.
އިންޑިޔާ ސަރުކާރުގެ ހިލޭ އެހީގެ މަޝްރޫއެއްގެ ނިމުން ފާހަގަކުރުމަށް ބޭއްވި ރަސްމިއްޔާތެއްގައި ވާހަކަ ދައްކަވަމުން އެމަނިކުފާނު ވިދާޅުވީ އެއީ 6.7 ކިލޯ މީޓަރުގެ ގްރޭޓާ މާލެ ކަނެކްޓިވިޓީ މަޝްރޫޢު ކަމަށެވެ. މިއީ އިންޑިޔާ ސަރުކާރުގެ 500 މިލިއަން ޑޮލަރުގެ އެހީގެ ދަށުން ހިންގާ މަޝްރޫއެކެވެ. މި އެހީގެ ތެރޭގައި 400 މިލިއަން ޑޮލަރުގެ ކްރެޑިޓް ލައިނަކާއި 100 މިލިއަން ޑޮލަރުގެ ހިލޭ އެހީ ހިމެނެއެވެ.
އެ މަޝްރޫއަކީ ބުރިޖާއި ކޯޒްވޭ އިން މާލެ އާއި ވިލިނގިލި. ގުޅިފަޅު އަދި ތިލަފުށި ގުލާލުމަށާއި ބަނދަރާއި ސިނާއީ މަސައްކަތްތަކަށް ޚާއްސަ ތަންތަން ހެދިގެން ދާގޮތަށް ފަރުވާކޮށްފައިވާ މަޝްރޫއެކެވެ. މިކަމަށް އިންޑިޔާއިން އެހީތެރިވާނެކަން 13 އޮގަސްޓް 2020 ގައި އިންޑިޔާއިން ބުނެފައިވެއެވެ. މި މަޝްރޫޢު ފެށުމަށްޓަކައި ހަދަން ޖެހޭ ދިރާސާތައް މިހާރު ވަނީ ނިމުމަކާ ހަމައަށް ގޮސްފައެވެ.
ޝާހިދުގެ ވާހަކަފުޅުގައި އިންޑިޔާއިން ރާއްޖެއަށް ވެދެމުން ގެންދާ މުހިއްމު އެހީތެރިކަން ފާހަގަކުރައްވައި، އިންޑިޔާ ސަރުކާރަށް ޝުކުރު އަދާކުރެއްވިއެވެ. އަދި އިންޑިޔާގެ އެހީގައި ދިވެހިންނަށް ވަރަށް މުހިއްމު ކަންކަން ފެށުމަށް ކުޑަތަން ވެފައިވާކަންވެސް އެމަނިކުފާނު ފާހަގަކުރެއްވިއެވެ. އެގޮތުން އެމަނިކުފާނު އެންމެ ބޮޑަށް ފާހަގަ ކުރެއްވި އެއް ކަމަކަކީ އިންޑިޔާގެ އެހީގައި ރާއްޖޭގައި މިއަހަރު އަޅަން ފަށާ ކެންސަރު ހޮސްޕޮޓަލުގެ މަޝްރޫއެވެ.
އެމަނިކުފާނު ވިދާޅުވީ އިންޑިޔާއާއި ރާއްޖެއާ ދެމެދު އޮތީ ޒަމާންވީ ގާތް އެކުވެރިވެރި ކަމެއް ކަމަށާއި އެއީ ދެގައުމުގެ ރައްޔިތުންގެ ހިތާ ހިތުގެ ގުޅުމެއް ކަމަށެވެ.
"މިކަން ބަލައި ނުގަނެވިގެން އުޅެނީ މިސަރުކާރުން ހިންގަވާ ތަރައްޤީގެ މަޝްރޫއުތަކާ ތަންތަން ފެނި އެކަމަށް ހިތްދަތިވާ ފަރާތްތައް،" އިންޑިއާ އައުޓްގެ ނަމުގައި އިދިކޮޅު ސިޔާސީ ފަރާތްތަކުން ދައްކަމުންދާ ވާހަކަތަކަށް ދެވޭ ރައްދެއް ކަމަށް ދޭހަވާ ގޮތަށް އެމަނިކުފާނު ވިދާޅުވިއެވެ.
