އަވައްޓެރި އިންޑިއާއިން ރާއްޖެ އަންނަ ފަތުރުވެރިންގެ އަދަދު ދަށަށްގޮސް، އިޓަލީވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަރަށްބޮޑަށް އިތުރުވާން ފަށައިފިއެވެ.
މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ، ޗައިނާ، އިޓަލީ، ރަޝިއާ އަދި އިނގިރޭސިވިލާތުންނެވެ. މީގެ ތެރެއިން އިޓަލީ އަދި ޗައިނާ ފާހަގަކުރެވެނީ މިފަހުން ރާއްޖެއަށް އެންމެގިނައިން ފަތުރުވެރިން ޒިޔާރަތްކުރާ ދެ ގައުމުގެ ގޮތުގައެވެ.
މިއަހަރުގެ މިހާތަނަށް ޗައިނާއިން 47,185 ފަތުރުވެރިން ޒިޔާރަތްކޮށްފައިވާއިރު، އިޓަލީވިލާތުން ވަނީ 31,039 ފަތުރުވެރިން ޒިޔާރަތްކޮށްފައެވެ. ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމުތަކުގެ ލިސްޓްގެ ދެވަނަ އިޓަލީ ހޯދާފައިވާއިރު، މިދިޔަ އަހަރު އެގައުމު އުޅެނީ ލިސްޓްގެ 6 ވަނާގައެވެ. އިޓަލީވިލާތަކީ ރާއްޖޭގެ ޓޫރިޒަމް ސިނާއަތުގައި ވަރަށް ހާއްސަ މާކެޓެކެވެ. ރާއްޖެއަށް 1972 ވަނަ އަހަރު ޓޫރިޒަމް ތައާރަފްވެގެން އާއިރު، ޓޫރިސްޓެއްގެ ގޮތުގައި ރާއްޖެއަށް އެންމެ ފުރަތަމަ ޒިޔާރަތްކުރީ އިޓަލީވިލާތުގެ ރައްޔިތެކެވެ.
ރާއްޖެއަށް ފަތުރުވެރިން ޒިޔާރަތް ކުރާ ގައުމުތަކަށް ބަލާއިރު، އެންމެބޮޑަށް ދަށަށްދިޔަ މާކެޓެއްގެ ގޮތުގައި ފާހަގަކުރެވެނީ އިންޑިއާއެވެ. މިއަހަރުގެ މިހާތަނަށް އިންޑިއާއިން ރާއްޖެއަށް 22,555 ފަތުރުވެރިން ޒިޔާރަތްކޮށް، ލިސްޓްގެ ފަސްވަނާގައި އުޅޭއިރު، މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް އެންމެގިނަ ފަތުރުވެރިން ޒިޔާރަތްކޮށްފައިވަނީ އިންޑިއާއިންނެވެ.
އިންޑިއާއިން ރާއްޖެ އަންނަ ފަތުރުވެރިންގެ އަދަދު ދަށަށް ގޮސްފައިމިވަނީ ދެގައުމުގެ ދެމެދުގައި އޮތް ސިޔާސީ ނުތަނަވަސްކަމުގެ ސަބަބުންނެވެ. އަވައްޓެރި އިންޑިއާގެ ފަތުރުވެރިން ޗުއްޓީ ހޭދަކުރުމަށް މިހާރު އެންމެގިނައިން ގޮސް އުޅެނީ ސްރީލަންކާއަށެވެ.
