ރާއްޖޭގެ ފަތުރުވެރިކަން ދެމެހެއްޓުމަށްޓަކައި ދިވެހި ގޮތްތައް ހިފެހެއްޓުން ބޭނުންތެރި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސުމްޖުމްހޫރިއްޔާ މިހެން ވިދާޅުވީ ގައުމީ ފަތުރުވެރިކަމުގެ ދުވަހުގެ މުނާސަބަތުގައި ސޯޝަލް މީޑިއާގައި މިއަދު ކުރެއްވި ޕޯސްޓެއްގަ އެވެ.
ރައީސް މުއިއްޒު ވިދާޅުވީ ފަތުރުވެރިކަމުގެ ބިންގަލަކީ މިތުރުވެރިކަމާއި، އެކުވެރިކަމާއި ހިތްހެޔޮކަމާއި އަމާންކަމާއި ރައްކާތެރިކަމުގެ މައްޗަށް އޮތް ކަމެއް ކަމަށެވެ.
"ރާއްޖޭގެ ފަތުރުވެރިކަން ކާމިޔާބުކަމާއެކު ދެމެހއްޓުމުގައި ދިވެހީންގެ ސުލްހަވެރި އޮމާން ދިވެހި ގޮތްތައް ހިފެހެއްޓުން ނުހަނު ބޭނުންތެރި،" ރައީސް ވިދާޅުވި އެވެ.
ރާއްޖޭގައި ފަތުރުވެރިކަމަށް ހާއްސަކޮށް އޮކްޓޫބަރު މަހުގެ ތިންވަނަ ދުވަސް ކަނޑައެޅީ 2021 ވަނަ އަހަރު އެވެ.
ފަތުރުވެރިކަން ރާއްޖޭގައި 1972 ވަނަ އަހަރު ފެށުނީއްސުރެ އެ ދާއިރާ ފުޅާކުރުމަށް ގިނަ މަސައްކަތްތަކެއް ކޮށްފައިވެ އެވެ. އެ މަސައްކަތްތަކުގެ ނަތީޖާއެއްގެ ގޮތުން މުޅި ދުނިޔޭގައިވެސް އެންމެ މަގުބޫލު މަންޒިލަކަށް ރާއްޖެ ވަނީ ވެފަ އެވެ.
