ރާއްޖޭގެ ރައްޔިތުން ބޭނުންވާ އެހީތެރިކަން ފޯރުކޮށްދޭނެ ކަމަށާއި، ރަހުމަތްތެރިއެއްގެ ވާޖިބު އަދާކުރުމުގައި އިންޑިއާ ދެމިއޮންނާނެ ކަމަށް ގައުމުގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެ އެވެ.
އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ރައީސް ޑރ މުހައްމަދު މުއިއްޒު ކުރައްވަމުން ގެންދަވާ ރަސްމީ ދަތުރުފުޅުގައި މިއަދު ބޮޑުވަޒީރު މޯދީއާ ދެ ބޭފުޅުން ވަނީ ވެރިރަށް ދިއްލީގައި ހުންނަ ހައިދްރައާބަދު ހައުސްގައި ޖޮއިންޓް ޕްރެސްކޮންފަރެންސް އެއް ބާއްވާފަ އެވެ.
ބޮޑުވަޒީރު މޯދީ ވިދާޅުވީ ރާއްޖެއާއި އިންޑިއާ ދެމެދު އޮންނަނީ ވަރަށް ޒަމާންވި ގާތް ގުޅުމެއް ކަމަށެވެ. އިންޑިއާގެ ބޮޑުވަޒީރުކަމުގެ 3 ވަނަ ދައުރު ފުރުއްވަމުން ގެންދަވާ މޯދީ ސިފަކުރެއްވީ ރާއްޖެ އާއި އިންޑިއާ އަކީ "މިތުރުން" ގޮތުގަ އެވެ. އިންޑިއާ އަކީ ރާއްޖެއާ އެންމެ ގާތް އެއް ގައުމުކަން ފާހަގަކުރައްވާ މޯދީ ވިދާޅުވީ އިންޑިއާ ނެއިބާ ހޫޑް ޕޮލިސީއާ އާއި އިންޑިއާގެ ކަނޑުގައި ހިމެނޭ ގައުމުތަކަށް ހާއްސަކުރާ "ސާގްރް ވިޝަން" ގައި ރާއްޖެއިން އަދާކުރަނީ މުހިއްމު ރޯލެއް ކަމަށެވެ.
ރާއްޖެއަށް އެހީ ބޭނުންވާ ކޮންމެ އިރެއްގައި އެންމެ ފުރަތަމަ އެހީވާ ގައުމަކީ އިންޑިއާކަން މޯދީ ފާހަގަކުރެއްވި އެވެ. ޒަރުރީތަކެތި ފޯރުކޮށް ދިނުމާއި، ކާރިސާތަކުގައި އިންޑިއާއިން ފޯރުކޮށްދީފައިވާ އެހީތެރިކަން މޯދީ ފާހަގަކުރެއްވި އެވެ. ކޮވިޑް-19 ގެ ވެކްސިން އިންޑިއާއިން ފޯރުކޮށްދިންކަންވެސް މޯދީގެ ވާހަކަފުޅުގައި ފާހަގަކުރެއްވި އެވެ.
"އިންޑިއާއިން ވަނީ ރަހުމަތްތެރިއެއްގެ ވާޖިބު އަބަދުވެސް އަދާކޮށްފައި, އެކަމުގައި ދެމިއޮންނާނެ" ދެ ގައުމުގެ ގުޅުމަށް އަލިއަޅުއްވާލައްވައި މޯދީ ވިދާޅުވި އެވެ.
