މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ބައެއް ސްޓޭކްހޯލްޑަރުންނާ އެކު "މީރާ ސްޓޭކްހޯލްޑަ ކޮންސަލްޓޭޝަން އިވެންޓް" ގެ ނަމުގައި ފޯރަމެއް ބާއްވައިފި އެވެ.
އެ ބައްދަލުވުން ބާއްވާފައި ވަނީ ކުރިއަށް އޮތް ހަތަރު އަހަރުގެ މީރާގެ ސްޓްރެޓީޖިކް ޕްލޭން ތައްޔާރު ކުރުމުގައި "މަސްލަހަތުވެރިން" ގެ ހިޔާލާއި މަޝްވަރާ ހޯދައި، އެ އޮތޯރިޓީން ފޯރުކޮށްދޭ ހިދުމަތްތައް އިތުރަށް ރަނގަޅުކޮށް ޓެކްސް ދައްކާ ފަރާތްތަކާ ގުޅިގެން މަސައްކަތް ކުރެވޭނެ ގޮތަކަށް މަސައްކަތް ބައްޓަން ކުރުމަށެވެ.
ބައްދަލުވުމުގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (އެމްއޭޓީއައި)، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަ އޮޕަރޭޓާސް (މަޓާޓޯ)، މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއައި) ފަދަ ޖަމިއްޔާތަކާއި ޓެކްސް ފާމްތަކާއި އޮޑިޓަރުން ވަނީ ބައިވެރިވެފަ އެވެ.
އެ ބައްދަލުވުމުގައި ވާހަކަ ދައްކަވަމުން މީރާގެ ކޮމިޝަނަ ޖެނެރަލް އޮފް ޓެކްސޭޝަން، ހަސަން ޒަރީރު ވަނީ ޓެކްސް ނިޒާމުގައި ހުރި ގޮންޖެހުންތަކުން އަރައިގަނެ ޓެކުހުގެ ނިޒާމް ހަރުދަނާ ކުރުމަށް ސްޓޭކްހޯލްޑަރުންނާ ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ. އަދި މީރާގެ އަމާޒަކީ "ފެސިލިޓޭޓިވް" މުއައްސަސާއެއްގެ ގޮތުގައި ޓެކްސް ދައްކާ ފަރާތްތަކަށް ލުއި ފަސޭހަކަމާ އެކު ޓެކުހުގެ އިލްތިޒާމް އަދާކުރެވޭ ގާބިލު މުއައްސަސާއެއްގެ ގޮތުގައި ދެމިއޮތުން ކަމުގައި ފާހަގަކުރެއްވި އެވެ.
