ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގައި އިންޑިއާއިން އެމަނިކުފާނަށް އަދާކުރީ އަދަޔާ ޚިލާފު މަތީ އިހްތިރާމާއި މެހެމާންދާރީއެވެ. އަދި ރާއްޖެއިން އެދުނު ކަންކަމަށް އިންޑިއާއިން އާނބަސް ބުނީ ދެގައުމުގެ ގުޅުން އިތުރަށް ތަނަވަސްވެގެންދާނެ ކަމަށް އުންމީދުކުރަމުންނެވެ. ދެ ގައުމުންވެސް ފާޅުކުރީ ދެގައުމުގެ ދެމެދުގައި އޮތް ޒަމާންވީ އެކުވެރިކަމުގެ ގުޅުމުގެ ވާހަކައެވެ.
އިންޑިއާގެ ބޮޑުވަޒީރު ނަރެންދުރަ މޯދީ ރައީސް ޑރ. މުއިއްޒުއާ އެކު ބޭއްވެވި ރަސްމީ ބައްދަލުވުމުގައި ޔަގީންކަން ދެއްވީ އިންޑިއާއަކީ ރާއްޖޭގެ އެންމެ ގާތް އެކުވެރިޔާގެ ގޮތުގައި އަބަދުވެސް ދެމިއޮންނާނެ ކަމަށެވެ.
ރައީސް ޑރ. މުއިއްޒުވެސް ވިދާޅުވީ އިންޑިއާއަކީ ދިވެހިންގެ ގާތް އެކުވެރިއެއް ކަމަށާއި ދެގައުމުގެ ޒަމާންވީ ގާތް ގުޅުން ދަމަހައްޓަވާނެ ކަމަށެވެ.
ރައީސް މިހާރު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅާ ބެހޭ ގޮތުން އިދިކޮޅު ސިޔާސީ ފަރާތްތަކުން ގެންދަނީ ވަރަށް ބޮޑަށް ފާޑުކިޔަމުންނެޗެ. އެމީހުން ދެކޭ ގޮތުގައި ކުރީ ސަރުކާރުން އިންޑިއާއާއެކު އަޑިނޭނގޭ ގުޅުންތައް ބާއްވާކަމަށް ވިދާޅުވެ ފާޑުވިދާޅުވުމަށް ފަހު ޑރ. މުއިއްޒުވެސް މިހާރު އެ ހިންގަވަނީ އެމަގުންނެވެ.
ރާއްޖޭގެ ސީނިއަ ޑިޕްލޮމެޓަކު ވިދާޅުވި ގޮތުގައި ރިޔާސީ އަދި ސިޔާސީ ކެމްޕޭންތަކުގައި ސިޔާސީ ގޮތުން ދައްކާ ވާހަކަތައް އެބަޔަކު ވެރިކަމަށް އައުމަށް ފަހު ފުރާނާލަން ޖެހެއެވެ. އަދި ގައުމާ ގުޅިފައިވާ ދުނިޔޭގެ އަދި ސަރަހައްދުގެ ފުޅާ މަސްލަހަތު ދެމެހެއްޓުމަކީ ވެރިކަމަށް ވަޑައިގަންވާ ބޭފުޅެއްގެ ޒިންމާއެކެވެ. މި މޭރުމުން އިންޑިޔާގެ އެކްސްޓާނަލް މިނިސްޓަރު ޖައިޝަންކަރުވެސް ވަނީ ވާހަކަ ދައްކަވާފައެވެ.
"ސިޔާސީ ކެމްޕޭން މިހާރު އެވަނީ ނިމިފައި މިހާރު ރާއްޖެއިންވެސް ޖެހޭނީ އަމިއްލަ ގައުމަށާއި ސަރަހައްދީ މަސްލަހަތަށް ވިސްނައިގެން ފިޔަވަޅު އަޅަންވެސް، ވާހަކަ ދައްކަންވެސް. މިކަމުގައި ރާއްޖެއިން ނަމޫނާ ދައްކައިފި. މިހާރު ދެގައުމަކީ ވަރަށް އެކުވެރި ދެގައުމު. ގުޅިގެން އެކުގައި ކުރިއަށްދާން ތައްޔާރަށް އޮތް ދެވެރިކަން. މިކަމުގައި ޑރ. މުއިއްޒުގެ ދުރުވިސްނުންފުޅާއި ގެންގުޅުއްވި ހަރުދަނާ ޑިޕްލޮމެސީ ވަރަށް ބޮޑަށް ފާހަގަކުރަން،" އޭނާ ވިދާޅުވިއެވެ.
ކުރިން ވާހަކަ ދެއްކެވި ދިވެހި ޑިޕްލޮމެޓް ވިދާޅުވީ ޑރ. މުޢިއްޒު ކުރިންވެސް އަދި މިހާރުވެސް މަސައްކަތް ކުރައްވަމުން އެގެންދަވަނީ ގައުމާއި ރައްޔިތުންނަށް ހެޔޮ ގޮތްތައް ހޯއްދަވައި ދެއްވުމަށެވެ.
"ދޫ ދެއްވަން ޖެހޭ ވަގުތު ތަކުގައި ދޫ ދެއްވުމާއި ގާތްކަން ދެމެހެއްޓުމަކީ ޑިޕްލޮމެސީގައި މުހިއްމުކަމެއް. މިއީ ރާއްޖެއަށް އިންޑިއާގެ ބޭނުން އެންމެ ބޮޑަށް ބޭނުންވެފައިވާ ދަނޑިވަޅު، އަދި އިންޑިއާއިން ރާއްޖެއާ ގުޅުން ބަދަހިކުރަން އިންތިހާއަށް ބޭނުންވެފައިވާ ވަގުތު. މިވަގުތުގެ ފުރިހަމަ އެޑްވާންޓޭޖް ޑރ. މުއިއްޒު އެނެންގެވީ. ރިޒާވަށް ލުއި ލިބިއްޖެ. ވިޔަފާރިފުޅާކުރަން ފުރުސަތު ހުޅުވިއްޖެ. ދެގައުމުގެ ދެމެދުގައި އިތުބާރު ގާއިމްވެގެން ހިނގައްޖެ. މިއީ ގައުމަށާއި ރައްޔިތުންނަށް މިވަގުތު ވަރަށް މުހިއްމު ކަންކަން،" އޭނާ ވިދާޅުވިއެވެ.
އިންޑިއާއަށް ކުރައްވާ ރަސްމީ ދަތުރުފުޅު މާދަމާ ނިމޭއިރު، ޑރ. މުއިއްޒުގެ މި ދަތުރުފުޅަކީ ވަރަށް ގިނަ ގޮތްގޮތުން ކާމިޔާބު އަދި ތާރީޚީ ދަތުރުފުޅެކެވެ.
