2026 ވަނަ އަހަރުގެ "އިންޑިއަން އޯޝަންސް ލީޑިންގ އެއަރޕޯޓް" އެވޯޑް މޯލްޑިވްސް އެއާޕޯޓްސް ކޮމްޕެނީ ލިމިޓެޑުން ހިންގަމުން އަންނަ ވެލާނާ އިންޓަރނޭޝަނަލް އެއަރޕޯޓް ކާމިޔާބުކޮށްފި އެވެ.
ކްރޮސްރޯޑްސް މޯލްޑިވްސްގައި ބޭއްވި ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑު ކަމަށްވާ ވޯލްޑް ޓްރެވަލް އެވޯޑްސްގެ އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ ގައި ވީއައިއޭގެ ފަރާތުން މި އެވޯޑާ ހަވާލުވެވަޑައިގަތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ. މިއީ އިންޑިއަން އޯޝަންގެ ލީޑިންގ އެއާޕޯޓުގެ ޝަރަފު ވީއައިއޭ އިން ކާމިޔާބުކުރި 13 ވަނަ ފަހަރެވެ.
މިއަހަރުގެ އިންޑިއަން އޯޝަންސް ލީޑިންގ އެއާރޕޯޓް ކެޓަގަރީގެ އެވޯޑަށް ވީއައިއޭގެ އިތުރުން މަޑަގަސްކަރައިގެ އިވާޓޯ އިންޓަރނޭޝަނަލް އެއާރޕޯޓްއާއި، ރީޔޫނިއަންގެ ރޯލަންޑް ގަރޯސް އެއާރޕޯޓްއާއި، ސީޝެލްސް އިންޓަރނޭޝަނަލް އެއާރޕޯޓް އަދި މޮރިޝަސްގެ ސަރ ސީވޫސަގުރ ރާމްގޫލަމް އިންޓަރނޭޝަނަލް އެއާރޕޯޓް ވާދަކޮށްފައިވެއެވެ.
މޯލްޑިވްސް އެއާރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ ވީއައިއޭ އަށް އެ އެވޯޑު ލިބުމަކީ، އެއާރޕޯޓުގެ އޮޕަރޭޝަންތަކާއި ދަތުރުވެރިންނަށް ފޯރުކޮށްދޭ ޚިދުމަތްތައް ދެމެހެއްޓެނިވި ގޮތެއްގައި ކުރިއަރަމުން އަންނަކަމުގެ ހެއްކެއް ކަމަށާއި، އަދި މިއީ ރާއްޖެއަށް ޒިޔާރަތްކުރާ ފަތުރުވެރިންނަށާއި އެންމެހައި ދަތުރުވެރިންނަށް އެންމެ މަތީ ފެންވަރުގެ ޚިދުމަތެއް ފޯރުކޮށްދިނުމަށް ކުރަމުންދާ މަސައްކަތްތަކަށާއި، ގައުމީ ފަތުރުވެރިކަމުގެ ސިނާއަތަށް ލިބުނު ފަޚުރުވެރި ކާމިޔާބީއެއް ކަމަށެވެ.
މި ކާމިޔާބީ ފާހަގަކުރައްވަމުން އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދު ވިދާޅުވީ، މިއީ މުވައްޒަފުން ކުރި ބުރަ މަސައްކަތާއި، ވީއައިއޭގެ ތަރައްޤީއަށް ގެންނަމުންދާ ހެޔޮ ބަދަލުތަކުގެ އިތުރުން ޕާޓްނަރުންގެ ފަރާތުން ލިބޭ އަގުހުރި އެއްބާރުލުމުގެ ނަތީޖާ ކަމަށެވެ. އަދި ރާއްޖޭގެ މައި ދޮރާށީގެ ހައިސިއްޔަތުން، ޚިދުމަތުގެ ފެންވަރު މަތިކޮށް، ދަތުރުވެރިންގެ ތަޖުރިބާ އިތުރަށް ފުރިހަމަކުރުމާއެކު، ވީއައިއޭ އަކީ ބައިނަލްއަގުވާމީ ފެންވަރުގައި ވާދަކުރެވޭނެ ޒަމާނީ އެއާރޕޯޓަކަށް ހެދުމަށް އަބަދުވެސް އިސްކަންދެއްވާނެ ކަމަށް އެމަނިކުފާނު ވިދާޅުވިއެވެ.
