ބޭރުގެ އިންވެސްޓަރުންގެ އިތުބާރު ހޯދަމުންދާ މަންޒަރު ފެނުމަކީ ވެރިކަމަށް ދަހިވެތިވެފައި ތިބި ނާކާމިޔާބު ލީޑަރުންނަށް ކެތްކުރެވޭނެ ކަމެއް ނޫންކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަލީ އަޝްރަޤް ވިދާޅުވެއްޖެއެވެ.
ރާއްޖޭގެ ތާރީހުގައިވެސް މިހާތަނަށް ހިންގުމަށް ސޮއިކޮށްފައިވާ ރަސްމާލޭގެ މެގަ ޕޮރެޖެކްޓަށް އިދިކޮޅު ބައެއް ފަރާތްތަކުން ފާޑިކިޔަމުންދާ މި ދަނޑިވަޅުގައި މެމްބަރު އަޝްރަޤް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ތިން މަސްދުވަހުގެ ތެރޭގައި ރާއްޖެ ބަނގުރޫޓުވާނެ ކަމަށް ބުނެ ފެތުރި ވާހަކަތަކުން ގައުމުގެ އިގްތިސާދު ސަލާމަތްކޮށް، ބޭރުގެ އިންވެސްޓަރުންގެ އިތުބާރު ހޯދަމުންދާ މަންޒަރު ފެނުމަކީ ވެރިކަމަށް ދަހިވެތިވެފައި ތިބި ނާކާމިޔާބު ލީޑަރުންނަށް ކެތްކުރެވޭނެ ކަމެއް ނޫން ކަމަށެވެ. އަދި ދިވެހިރާއްޖެއަށް އަންނަ ބޭރުގެ އިންވެސްޓަރުންނަށް ބިރުދައްކައި، އެ ފަރާތްތަކުގެ އިތުބާރު ގެއްލުވާލުމަށް މަސައްކަތް ކުރުމަކީ ގައުމަށް ހެޔޮއެދޭ އެއްވެސް ފަރާތަކުން ކުރާނެ ކަމެއް ނޫންކަމަށް މެމްބަރު ވިދާޅުވިއެވެ.
"އިރާދަކުރެއްވިއްޔާ އެފަދަ ކަންކަމެއް ކާމިޔާބެއް ނުވާނެ. ދިވެހި ގައުމާއި ރައްޔިތުންނަށް އެންމެ ފައިދާހުރި ގޮތަށް ކަންކަން ބައްޓަންކުރައްވައި، އިޚްލާސްތެރިކަމާއެކު މަސައްކަތްކުރައްވާ ހަމައެކަނި ލީޑަރަކީ މިއަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު". މެމްބަރު އަޝްރަޤްގެ ޕޯސްޓްގައިވެއެވެ.
ތިން މަސްދުވަހުގެ ތެރޭގައި ރާއްޖެ ބަނގުރޫޓުވާނެ ކަމަށް ބުނެ ފެތުރި ވާހަކަތަކުން ގައުމުގެ އިގްތިސާދު ސަލާމަތްކޮށް، ބޭރުގެ އިންވެސްޓަރުންގެ އިތުބާރު ހޯދަމުންދާ މަންޒަރު ފެނުމަކީ ވެރިކަމަށް ދަހިވެތިވެފައި ތިބި ނާކާމިޔާބު ލީޑަރުންނަށް ކެތްކުރެވޭނެ ކަމެއް ނޫން
އެހެންނަމަވެސް،…— 🇲🇻އަޝްރަޤް 🇵🇸 (@Ashhrag) September 29, 2026
"މޯލްޑިވްސް ވޯޓަރފްރަންޓް އެންޑް މެރީނާ އެޓް ރަސްމާލެ" ތަރައްޤީ ކުރުމުގެ މަޝްރޫއަކީ ރާއްޖޭގެ ތާރީހުގައިވެސް މިހާތަނަށް ހިންގޭ އެންމެ ބޮޑު ބޭރުގެ އިންވެސްޓްމެންޓުގެ އެއްބަސްވުމެވެ. ރަސްމާލޭގައި 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" އާއެކު ދިވެހި ސަރުކާރުން އެއްބަސްވެފައިވަނީ މިމަހުގެ 21ވަނަ ދުވަހުއެވެ.
މި އެއްބަސްވުމުގެ ދަށުން އީގަލް ހިލްސް ކުންފުނިން ރަސްމާލެއިން ފައިދާ ހޯދުމުގެ ކުރިން، އެމީހުންގެ އަމިއްލަ ޚަރަދުގައި 400 އާއި 500 މިލިޔަން ޑޮލަރު އިންވެސްޓްކޮށްގެން ހުޅުމާލޭގައި ތިން ކޮޓަރީގެ 5،000 ހައުސިންގ ޔުނިޓް އަޅައިދޭނެއެވެ. މި ފްލެޓްތަކުގެ އަގު އަދާކުރެވިގެންދާނީ ދައުލަތަށް ލިބޭ 10 އިންސައްތައިގެ ރެވެނިއު ޝެއަރގެ ތެރެއިންނެވެ.
ރަސްމާލެ ތަރައްޤީކުރާ އީގަލް ހިލްސް ކުންފުންޏަކީ ޖުމްލަ 450 ބިލިޔަން ޔޫއެސް ޑޮލަރަށްވުރެ އަގުބޮޑު މަޝްރޫޢުތައް ހިންގާފައިވާ ޤާބިލް ކުންފުންޏެކެވެ. ދުނިޔޭގެ އެކި ކަންކޮޅުތަކުގައި ގާތްގަނޑަކަށް 400،000 ހައުސިންގ ޔުނިޓާއި، 90 އަށްވުރެ ގިނަ ހޮޓަލާއި، 17 ބޮޑު ޝޮޕިންގ މޯލް ވަނީ ބިނާކޮށްފައިވެއެވެ. އަދި ލަގްޒަރީ ހޮޓާތަކާއި، ބައިނަލްއަޤްވާމީ ފެންވަރުގެ މެރީނާތަކާއި، ވިޔަފާރީގެ މައި މަރުކަޒުތަކާއި، ކޮމިއުނިޓީ ސެންޓަރުތަކާއި، އާންމު ހިތްފަސޭހަ މައިދާންތަކުގެ އިތުރުން މުޅި ސިޓީއަކަށް ބޭނުންވާ ފުރިހަމަ އަސާސީ އިންފްރާސްޓްރަކްޗަރ ހިމެނެއެވެ.
