ޕީޕަލްސް ރިޕަބްލިކް އޮފް ޗައިނާ (ޗައިނާ) އުފެދުނުތާ 77 އަހަރު ފުރުމުގެ މުނާސަބަތުގައި އެ ޤައުމުގެ ރައީސް، ހިޒް އެކްސަލަންސީ ޝީ ޖިންޕިންގ އަށާއި، ސްޓޭޓް ކައުންސިލްގެ ޕްރީމިއަރ،ހިޒް އެކްސަލަންސީ ލީ ޗިއާންގ އަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަހުނިޔާ ފޮނުއްވައިފިއެވެ.
މި ދެ ލީޑަރުންނަށް ވަކިވަކިން ފޮނުއްވި ސިޓީފުޅުތަކުގައި، މި އުފާވެރި މުނާސަބަތުގެ ތަހުނިޔާއާއި އިޚްލާޞްތެރި ހެޔޮއެދުންތައް، ދިވެހި ސަރުކާރާއި ރައްޔިތުންގެ ނަމުގައި، ޗައިނާގެ ސަރުކާރަށާއި ރައްޔިތުންނަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވަނީ އަރިސްކުރައްވާފަ އެވެ.
އަދި، ޗައިނާ ދުވަހަކީ، ޤައުމުގެ ހަމަޖެހުން ދަމަހައްޓައި، ރައްޔިތުންގެ ލާބަޔާއި މަންފާއަށްޓަކައި ކުރިއަށްދިއުމުގެ އިތުރުން، ޗައިނާގެ ރައްޔިތުންގެ މެދުގައި އޮތް އެކުވެރިކަމާއި އެއްބައިވަންތަކަން، އިތުރަށް ބަދަހިކުރުމަށް ލިބޭ މުހިންމު ފުރުޞަތެއްކަން ރައީސް ވަނީ ފާހަގަކުރައްވާފަ އެވެ.
މީގެ އިތުރުން ދިވެހިރާއްޖެއާއި ޗައިނާއާ ދެމެދު އޮތް ބަދަހި ގުޅުމަކީ، ޒަމާންވީ އެކުވެރިކަމާއި، ގާތް ގުޅުމުގެ އިތުރުން 'ވަން ޗައިނާ ޕްރިންސިޕަލް' އަށް ދިވެހިރާއްޖެއިން ދޭ ސާބިތު އެއްބާރުލުމުގެ މައްޗަށް ބިނާވެފައިވާ ގުޅުމެއްކަން އެމަނިކުފާނު ވަނީ ފާހަގަކުރައްވާފައެވެ.
އަދި ޗައިނާގެ މެދުކެނޑުމެއްނެތް އެހީތެރިކަމާއި، ދެޤައުމުގެ ދެމެދުގައި އޮތް ބަދަހި ގުޅުމުގެ ތެރެއިން، ވޭތުވެދިޔަ އަހަރުތަކުގައި ދިވެހިރާއްޖެއަށް، އިޖުތިމާޢީ އަދި އިޤްތިޞާދީ ގޮތުން ފާހަގަކޮށްލެވޭ ބޮޑެތި ކުރިއެރުންތަކެއް، ޙާޞިލު ކުރެވިފައިވާ ކަންވެސް އެމަނިކުފާނު ވަނީ ފާހަގަކުރައްވާފަ އެވެ.
