މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަސާސީ ޤަވާއިދަށް ހުށަހަޅާ ބޮޑެތި ބަދަލުތަކަކާއެކު އެ ޕާތީގެ ކޮންގްރެސް މިރޭ ފެށުމަށް ތައްޔާރުވެއްޖެ އެވެ.
ގާތްގަނޑަކަށް ހާހެއްހާ މަންދޫބުން ބައިވެރިވާ މި ކޮންގްރެސްގައި އެ ޕާޓީން ވަނީ އެ ޕާޓީގެ ހިންގާ ޤަވާއިދު ނުވަތަ އަސާސީ ޤަވާއިދަށް މި ކޮންގްރެސްގައި ބޮޑެތި އިސްލާހުތަކެއް ގެންނަން ހުށަހެޅުމަށް ހަމަޖައްސާފައެވެ.
މިރޭ 8:30 މާލެ ސިޓީ ހޯލް ގައި ފަށާ މި ކޮންގްރެސް ގައި މާދަމާ ބޭއްވުމަށް ހަމަޖެހިފައިވަނީ އިންވެސްޓާ ފޯރަމް އެކެވެ.
އެ ޕާޓީން ބުނީ އެ ފޯރަމް ބޭއްވުމުގެ މަގްސަދަކީ އެ ޕާޓީގެ ޓިކެޓްގައި ސިޓީތަކާއި ކައުންސިލްތަކަށް ހޮވިފައިވާ އެޕާޓީގެ މެންބަރުންނަށް އެ ސިޓީތަކާއި ރަށްތަކުގެ ރައްޔިތުންގެ ލާބައާއި މަންފާއަށް ޓަކައި ހިންގިދާނެ މަޝްރޫއުތަށް ދެނެގަނެ އެ މަޝްރޫއުތަކަށް އިންވެސްޓްކުޜާނެ ގޮތްތަށް ހޯދައި އިންވެސްޓަރުންނާއި މުއާމަލާތްކުރުމުގެ ފުރުސަތު އެ ފޯރަމްގެ ތެރެއިން ފަހިކޮށްދިނުން ކަމަށެވެ.
އަދި ހޮނިހިރު ދުވަހު ބައްވާ ކޮންގްރެސް ބައްދަލުވުމަށް އެ ޕާޓީން ހުށަހެޅުމަށް ނިންމާފައިވާ އެންމެ ބޮޑު އެއް ހުށަހެޅުމަކީ އެ ޕާޓީގައި މިހާރު އޮންނަ ރައީސްގެ މަޤާމަު އޮވާލައި ޕާޓީގެ އެންމެ އިސް ފަރާތަކީ ޕާޓީގެ ޗެއާޕާސަންގެ ގޮތުގައި އަސާސީ ޤަވާއިދުގައި ކަނދައެޅުމެވެ.
އަދި އެ ޕާޓީގެ ގައުމީ މަޖިލިސް އެކުލެވިގެންވާ ގޮތަށްވެސް ބޮޑެތި ބަދަލުތަކެއް މި ކޮންގްރެސްގެ ތެރެއިން ގެންނަން ހުށަޅުމަށް ހަމަޖެހިފައިވާކަމަށް ވަނީ މައުލޫމާތު ލިބިފައެވެ.
އެގޮތުން ރައްޔިތުންގެ މަޖިލީހުގެ ދާއިރާ ތަކުގެ ބަދަލުގައި ކޮންމެ ރަށަކީ ގައުމީ މަޖިލީހުގެ ދާއިރާއެއްގެ ގޮތުގައި ކަނދައަޅައި ކޮންމެ ރަށަކުން މެންބަރުން ތިބޭ އަދަދަށް ބަލައި ގައުމީ މަޖިލީހަށް މެންބަރުން ހޮވުމަށް ހުށަހަޅާނެކަމަށްވެސް ވަނީ މައުލޫމާތު ލިބިފައެވެ.
މީގެ އިތުރުން އެ ޕާޓީގެ އެތެރޭގެ އިންތިހާބުތަކުގައި ވޯޓު ލެވޭނެ މެންބަރުންނަކީ އެ އިންތިހާބަކަށް އިއުލާނުކުރާ ތާރީހުގެ 90 ދުވަސްކުރިން އެ ޕާޓީގެ މެންބަރެއްގައި ގޮތުގައި ދަފްތަރުކުރެވިފައިވާ ފަރާތަކަށް ވާންޖެހޭނެ ކަމަށްވެސް، މި ކޮންގްރެސްގައި ހުށަހަޅާ އިސްލާހުތަކުގެ ތެރޭގައި ހިމެނޭ ކަމަށް ވަނީ މައުލޫމާތު ލިބިފައެވެ.
އަސާސީ ޤަވާއިދަށް ހުށަހަޅާ މައިގަނޑު އިސްލާހު ތަކަކީ އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއިލް ކުރީގެ ރައީސް މުޙައްމަދު ނަޝީދު ހާމަކުރައްވާފައިވާ ބޮޑުބަދަލާ އެއްގޮތަށް ހުށަހަޅާފައިވާ އިސްލާހުތަކެއްކަމަށްވެސް ވަނީ މައުލމާާތު ލިބިފައެވެ.
