ރިސޯޓުތަކުގައި އިމާމުން ތަމްރީން ކުރުމުގެ ޕްރޮގްރާމް މިއަދު އިފްތިތާޙްކޮށްފިއެވެ.
ޒޫމް މެދުވެރިކޮށް މި ޕްރޮގްރާމް އިފްތިތާޙްކޮށްދެއްވީ، މިނިސްޓަރ އޮފް ޓުއަރިޒަމް ޑރ. ޢަބްދުﷲ މައުސޫމެވެ.
މި ޕްރޮގްރާމް އިފްތިތާޙްކޮށްދެއްވަމުން ޓޫރިޒަމް މިނިސްޓަރ ވިދާޅުވީ، މި ތަމްރީން ޕްރޮގްރާމްގެ އެހީގައި އިމާމުންނަށް ވަރަށް ރަނގަޅު ކުރިއެރުމެއް ލިބިގެންދާނެ ކަމަށެވެ. އަދި ރިސޯޓުތަކަށް އިމާމުވެ ނަމާދުކުރުމަށް އަންނަ ފަރާތްތަކަށް ނާދެވިއްޖެ ޙާލަތެއްގައި ރިސޯޓުތަކުގައި ނަމާދުކުރަންވެސް ތިއްބަވާނީ ކުޅަދާނަ މޮޅު އިމާމުން ކަމުގައިވެސް މިނިސްޓަރ ފާހަގަކުރެއްވިއެވެ.
މީގެއިތުރުން ރައީސް އިބްރާހިމް މުޙައްމަދު ޞާލިޙްގެ ސަރުކާރުން ޓުއަރިޒަމް ދާއިރާއަށް ކަނޑައަޅާފައިވާ ސިޔާސަތަކީ ދިވެހިން ތަމްރީންކޮށް ދިވެހިންނަށް މަތީ ވަޒީފާއާއި ރަނގަޅު އާމްދަނީއެއް ލިބޭނެ މަގުފަހިކޮށްދިނުން ކަމުގައި ފާހަގަކޮށް ރައީސަށް ވަރަށް ޚާއްޞަ ޝުކުރެއް އަދާކުރެއްވިއެވެ.
މި ޕްރޮގްރާމް އިފްތިތާޙްކުރުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް އިސްލާމިކް އެފެއާޒް ޑރ.އަޙްމަދު ޒާހިރު ޢަލީ ވިދާޅުވީ، މި ތަމްރީން ޕްރޮގްރާމްގެ ޒަރީއާއިން ކަމަށް ޤާބިލްކަމަށް އެކަށީގެންވާ އިމާމުން އުފެދިގެންދާނެ ކަމަށެވެ. އަދި ރިސޯޓުތަކުގައި މުދިމުންނަށް ތިއްބެވި ހުރިހާ ބޭފުޅުންނަކީ އެއް ފެންވަރެއްގައި މަސައްކަތްކުރާ ފަރާތްތަކަށް ވެގެންދާނެ ކަމަށެވެ. މީގެއިތުރުން އިމާމުން އެންމެ މަތީ ފެންވަރަށް ތަމްރީން ކުރުމަކީ މިއަދުގެ ސަރުކާރުން ރައީސް އިބްރާހިމް މުޙައްމަދު ޞާލިޙްގެ ވަޢުދުފުޅެއް ކަމަށާއި، އަދި މިހާރުވެސް އިމާމުން ޑިގްރީ ފެންވަރަށް ތަމްރީން ކުރަމުންދާކަމަށް ޢިޝާރާތް ކުރައްވާ ރައީސް އިބްރާހިމް މުޙައްމަދު ޞާލިޙަށް ޝުކުރު ޢަދާކުރެއްވިއެވެ.
ފަސް ހަފްތާގެ މުއްދަތަށް ކުރިއަށްގެންދާ މި ތަމްރީން ޕްރޮގްރާމަކީ މިނިސްޓްރީ އޮފް ޓޫރިޒަމްގެ އެދުމުގެ މަތިން އިސްލާމިކް މިނިސްޓްރީން ކުރިއަށްގެންދާ ޕްރޮގްރާމެކެވެ. މިއީ، ދިވެހި ރާއްޖޭގެ ޓޫރިސްޓު ރިސޯޓުތަކުގައި (ވަގުތީ ގޮތުން) ބަންގި ގޮވުމާއި ޚުޠުބާ ކިޔުމާއި އިމާމުވެ ހުކުރު ނަމާދާއި، ފަރްޟު ފަސް ނަމާދު އަދި ޖަމާޢަތުގައި ކުރާ ސުއްނަތް ނަމާދު ކުރުމުގެ ޤާބިލުކަން ހުރި ބަޔަކު އުފެއްދުމުގެ މަޤްސަދުގައި ހިންގާ ޕްރޮގްރާމެކެވެ.
މި ކޯހުގައި ބައިވެރި ކުރަނީ، ޓޫރިޒަމް މިނިސްޓްރީން ނަން ހުށައަޅާ ފަރާތްތަކެވެ. އެގޮތުން މިހާތަނަށް 85 ރިސޯޓަކުން 169 ބައިވެރިން މި ޕްރޮގްރާމްގައި ބައިވެރިވެފައިވާ ކަމަށް އިސްލާމިކް މިނިސްޓްރީން ބުނެއެވެ.
