ކުރީގެ ރައީސް މުޙައްމަދު ނަޝީދުގެ ވެރިކަން ބަދަލިވެގެން ދިޔަ ހާދިސާއާ ގުޅިގެން ދިވެހި ސިޔާސީ ވެށީގައި އުފެދުނު ބޮޑު ނުތަވަސްކަމަށް އަދިވެސް އެކަށީގެންވާ ފަރުވާއެއް ނުލިބޭ ކަމަށް އެމްޑީޕީގެ މެންބަރުން ތަކުރާރުކޮށް ބުނަމުން ގެންދެއެވެ. އެމްޑީޕީ އާއި އެޕާޓީގެ ސަޕޯޓަރުން އެހާދިސާ ސިފަކުރަނީ ބަޣާވާތެއްގެ ގޮތުގައެވެ. ރައީސް ނަޝީދުގެ ވެރިކަން ބަދަލުވިއިރު އިދިކޮޅު ކޯލިޝަނުގެ ބައިވެރިން ބުނަމުން ގެންދަނީ މިހާރު އެވާހަކަ ތަކުރާރުކޮށް ދައްކަނީ ޤައުމުގައި ހަމަނުޖެހުން އުފައްދާ ސިޔާސީ ބަޔަކު ޖަލަށްލުމުގެ ބޭނުމުގައެވެ. އެމީހުން އެހާދިސާ ސިފަކުރަނީ ރައީސް ނަޝީދު "ގޮތް ހުސްވެގެން އިސްތިޢުފާދެއްވި" ހާދިސާއެއްގެ ގޮތުގައެވެ.
ރައީސް ނަޝީދުގެ ވެރިކަން ބަދަލުވި ހާދިސާގެ ހަނދާންތަކަށް ފަނޑުކަމެއް ނުލިބި އުޅެނިކޮށް ކޯލިޝަނެއްގެ ތެރެއިން އެމްޑީޕީގެ ވެރިކަމެއް އަލުން މިޤައުމުގައި ވަނީ ޤާއިމްކޮށްފައެވެ. ރައީސުލްޖުމްޖޫރިއްޔާގެ މަޤާމުގައި ހުންނެވީ ނަޝީދުގެ ޒަމާންވީ އެކުވެރިޔާ އިބްރާހީމް މުޙައްމަދު ސޯލިހުއެވެ. ރައީސް ނަޝީދު ހުންނެވީ ރައްޔިތުންގެ މަޖިލީހުގެ ރައީސްގެ ގޮތުގައެވެ. ރައްޔިތުންގެ މަޖިލީހުގެ ފުޅާ މެޖޯރިޓީއާއެކު އެމްޑީޕީގެ ކޮންޓްރޯލު ދައުލަތުގެ ބާރުތަކުގެ މައްޗަށް ފުރިހަމައަށް އެބައޮތޭ ބުނެވިދާނެއެވެ. މިއީ ނަޝީދުގެ ވެރިކަން ބަދަލުވުމާ ހަމައަށްވެސް ލިބިފައިނުވާ ފުރުސަތެކެވެ. ނަޝީދުގެ ވެރިކަން ޓާމްގެ މެދުތެރެއިން ބަދަލުވެގެން ދިއުމަށް މެދުވެރިވި މައިގަނޑު އެއްސަބަބަކީ އެއީ އެވެ.
އިބްރާހިމް މުޙައްމަދު ސޯލިހުގެ ވެރިކަންވެސް ދެބައިވަނީއެވެ. ޤައުމުގެ ސިޔާސީ ޚާލަތަށް ނަޒަރުކުރާއިރު، ނަޝީދުގެ ވެރިކަން ބަދަލުވި ހާދިސާ މެދުވެރި ކުރުވި އެކިއެކި ހާލަތްތައް މިހާރު ތަކުރާރުވަމުން އިއްތުފާގުވަމުން އެބަދެއެވެ. އެހާދިސާގެ ހިޔަންޏަށް ދިރުން އަންނަ ގޮތް މިކަންކަން ދިރާސާކޮށްލުމުން ފެންނަން އެބަހުއްޓެވެ.
ލާދީނީ ފިކުރާއި ދީނުގެ މަގުގައި ހައްދުފަހަނަ އެޅުން
ލާދީނީ ފިކުރާއި ޢަމަލުތައް ޤައުމުގައި މޫލައި ހެދެމުންދާއިރު ސަރުކާރުން އެކަންކަމަށް އެކަށީގެންވާ ސަމާލުކަމެއް ނުދޭ ކަމަށް އިދިކޮޅު ފަރާތްތަކުން ތުހުމަތުކުރާއިރު، ސަރުކާރުން ބުނަމުންދަނީ ދީނުގެ ނަމުގައި ހައްދުފަހަނަ އަޅާ ދިއުމުގައި ދީނުގެ ނަމުގައި ހަރުކަށި ޢަމަލާއި ފިކުރު ޤައުމީ ސަލާމަތަށް ނުރައްކަލަކަށް ވެފައިވާކަމަށެވެ. ސަރުކާރުގެ އަމާޒަކީ ލާދީނީ ފިކުރާއި ދީނުގެ ނަމުގައ ހައްދުފަހަނައަޅާ ދިއުމާއި ހަރުކަށިކަމުގެ ޢަމަލުތައް ނެތިކޮށްލުމަށް ސަރުކާރުން ރޭވުންތެރިކަމާއެކު ބުރަ މަސައްކަތްތަކެއް ކުރަމުން ގެންދާކަމަށެވެ. މި މަޢުލޫއަކީ ރައީސް ނަޝީދުގެ ވެރިކަން ބަދަލުކުރަންވެސް އިދިކޮޅުން ވިއްކި އެންމެ ނާޒުކު މަޢުލޫއެވެ. އިސްލާމްދީނުގެ ދިފާޢުގައި މީހުން މަގުމައްޗަށް މުޒާހަރާއަށް ނެރުނެވެ. ހަރުކަށިފިކުރުގެ މީހުން އަޑީގައި ތިބެ ޤައުމުގެ ސަލާމަތީ ބާރުތަކުގެ ތެރޭގައި ފިތުނަ އާއި ދެކޮޅުވެރިކަން އުފެއްދުމަށް ކެނޑުނޭޅި ދިޔައީ މަސައްކަތްކުރަމުންނެވެ. އެކަން ކާމިޔާބުވެސް ކުރިއެވެ. ފިކުރީ ގޮތުންނާއި މާލީ މަންފާގެ ތެރެއިންނެވެ. މިހާރުވެސް އެޚާލަތާ އެއްގޮތް ކަންތައްތަކެއް އިއްތިފާގުވަމުން އެބަދެއެވެ.
އިޤްތިސާދީ ހީނަރުކަން
ތަފާތު ސަބަބުތަކާހުރެ ރައީސް ނަޝީދުގެ ވެރިކަމުގެ ދުވަސްތައް ވެގެން ދިޔައީ ދިވެހި އިޤްތިސާދަށް ދަތިކަން ކުރިމަތިވި ވަގުތު ތަކަކަށެވެ. ބޮޑެތި ވިޔަފާރިވެރިންނާ ސަރުކާރާ ދެމެދު ޚިޔާލުތަފާތުވުންތައް ބޮޑުވެ، އެމީހުން ބާޒާރުގައި ޑޮލަރު ދައުރުކުރުވުން ކޮންޓްރޯލުކޮށް، ޑޮލަރުގެ ކަޅުބާޒާރެއް އުފެއްދިއެވެ. ނަތީޖާއަކަށްވެގެން ދިޔައީ ތަކެތީގެ އަގުތައް އުފުލިގެން ދިއުމެވެ. ކުދި ވިޔަފާރިތަކަށް ހީނަރުކަމާ ކުރިމަތިވުމެވެ.
އެހާލަތު ރައީސް ސޯލިހުގެ ވެރިކަމުގައި މިއޮތީ ތަޖުރިބާކުރަން ޖެހިފައެވެ. ދުނިޔޭގެ އެއްވެސް ޤައުމެއް އިސްތިސްނާ ނުވާ ގޮތުން މުޅި ދުނިޔެއަށް ކުރިމަތިވި ކޮވިޑްގެ ނުރައްކަލިގެ ސަބަބުން ޤައުމުގެ އިޤްތިސާދުވަނީ ފުން އަނދަވަޅަކަށް ވެއްޓިގެން ގޮސްފައެވެ. ޑޮލަރުގެ ކަޅުބާޒާރު އުފެދި އަގު ވަނީ އުފުލިފައެވެ. އެތައް ބައެއްގެ ވަޒީފާ ގެއްލިއްޖެއެވެ. ވިޔަފާރިތަކަށް ހީވެސް ނުކުރާވަރުގެ ހީނަރުކަމެއް އަތުވެއްޖެއެވެ. ދައުލަތުގެ ބަޖެޓް ބޮޑުތަކުން ދެފިސިޓްވެއްޖެއެވެ. މިއީ ވެސް ހަމަ އިއްތިފާގެކެވެ.
ފުލުހުންނާމެދު ފާޑުކިއުން ބޮޑުވުމާއި ފުލުހުންގެ ޤާނޫނު އިސްލާހުކުރުމުގެ މަސައްކަތް
ނަޝީދު ވެރިކަމަށް ވަޑައިގަތީ ފުލުހުންގެ އިދާރާއަށް ބަދަލު ގެންނަވާނެކަމުގެ ވަޢުދާއެކީގައެވެ. ރައީސް ސޯލިހުގެ ރިޔާސީ ވަޢުދުގެ އިބާރާތްތަފާތެވެ. ވިދާޅުވީ އިންސާފު ހޯދައިދީ މުވައްސަސާތައް އިސްލާހު ކުރައްވާނެ ކަމަށެވެ.
އެމްޑީޕީގެ ފުރަތަމަވެރިކަން ފެށިގެން އައީ ފުލުހުންނާމެދު އޮތް ނުތަނަވަސްކަމުގެ ތެރެއިން ކަމުން ފުލުހުންގެ ޤާނޫނަށް ބޮޑެތި އިސްލާހުތަކެއް ރައްޔިތުންގެ މަޖިލީހުން ފާސްކުރެވޭތޯ އެޕާޓީން މަސައްކަތްކުރިއެވެ. އެމަސައްކަތްތައް ހުއްޓުވުމަށް އޭރުގެ އިދިކޮޅު ފަރާތްތަކުން "ފުލުހުންގެ ދިފާޢުގައި" މުޒާހަރާކޮށް ޓީވީ އާއި ރޭޑިއޯ އަދި ސޯޝަލް މީޑިއާ މެދުވެރިކޮށް ވަރުގަދަ ކެމްޕޭނެއް ފެށިއެވެ. ނަތީޖާއަކަށް ވެގެން ދިޔައީ ފުލުސް އޮފީހުގެ މުހިއްމު ސިއްރުތައް ފަޅާއަރަމުން، އޭރުގެ ވެރިންނަށް ފުލުހުންގެ މައްޗަށް އޮތް ކޮންޓްރޯލު މަޑުމަޑުން ދޫވަމުން ދިއުމެވެ.
ރައީސް ސޯލިހުގެ ވެރިކަން ދެބައިވާއިރު، މިހާރު އޮތީ ފުލުހުންގެ މުވައްސަސާއަށް ބޮޑެތި ބަދަލުތަކެއް ގެނެވޭ ގޮތަށް، ފުލުހުންގެ ޤާނޫނު އިސާލާހުކުރުމަށް ހުށަހަޅާފައެވެ. މިބިލުގެ ބަހުސްގެ ތެރެއިން ފުލުހުންނަށް ވަރަށް ބޮޑެތި ފާޑުކިއުންތައް މަޖިލީސް މެންބަރުންގެ ފަރާތުން ތަކުރާރުކޮށް ދަނީ ލިބެމުންނެވެ. އަދި "ފުލުހުން ވަނީ ބަޣާވާތެއް ކޮށްފަ" ކަމަށް ވިދާޅުވާ މެންބަރުން، އެކަމަށް އިންސާފު ހޯދައިދެވި ފިޔަވަޅު އެޅިގެން ނޫނީ ފުލުހުންގެ މުވައްސަސާއަށް އިތުބާރު ނުކުރެވޭނެ ކަމަށާއި އެމުވައްސަސާ އިސްލާހުވެސް ނުކުރެވޭނެ ކަމަށް ވަނީ ވިދާޅުވެފައެވެ.
މިކަމުގައިވެސް އިއްތިފާގުވި ކަމެއް އެބައޮތެވެ. އިދިކޮޅު ސިޔާސީ ފަރާތްތަކުން ރާވައިގެން، "ފުލުހުންގެ ދިފާއުގައި" މަގުމަތީ ހަރަކާތެއް މުޒާހަރާއެއް ގޮތަށް ބާއްވާ، ސޯޝަލް މީޑިއާ އާއި ޓީވީ ރޭޑިއޯ އާއި ނޫސްތައް މެދުވެރިކޮށް ފުލުހުންނަށް ފިކުރީ ގޮތުން ނުފޫޒު ފޯރުވުމުގެ ހަރަކާތް ފެށިއްޖެއެވެ. ނަތީޖާއަށް ބަލަން ތިބެމާ ހިނގާށެވެ.
ޑރ. ވަހީދު އިދިކޮޅާ ބައިއަތު ހިފުން
ރައީސް ނަޝީދުގެ ނައިބް ރައީސެއްގެ ގޮތުގައި ޑރ. މުޙައްމަދު ވަހީދު ހަސަން މަނިކު ހުންނެވިއިރު، އިދިކޮޅު މުޒާހަރަތާތްކާއި ހަރަކާތްތައް ފުޅާވެ، ނަޝީދުގެ ވެރިކަން ހީނަރުވެގެން ދިޔަވަގުތު އިދިކޮޅު ކޯލިޝަނުން ޑރ. ވަހީދުގެ ގެއަށް ގޮސް، ސިޔާސީ ބައިއަތު ހިފިއެވެ. އެބައްދަލުވުމަށް ފަހު ވަހީދު ގޮވާލެއްވީ އެއްވެސް ފަރާތަކުން ޣައިރު ޤާނޫނީ އަމުރުތަކަށް ކިޔަމަން ނުވުމަށާއި ޤައުމު ހަމަ މަގަށް އެޅުވުމަށް މަސައްކަތުގައި ދެމިހުންނަވާނެ ކަމަށެވެ. އޭރުގެ ކުރިމިނަލް ކޯޓުގެ އިސްގާޒީ އަބްދުﷲ މުޙައްމަދު ސިފައިން މެދުވެރިކޮށް ގިރިފުށީގައި އެކަހެރިކުރި ހާދިސާއަށް އިޝާރާތްކުރައްވައި ޑރ. ވަހީދު އޭރު ގޮވާލެއްވީ ސަރުކާރުން ޤާނޫނީ މަގަށް އެނބުރި އައުމަށެވެ. އެކަމާ ސަރުކާރާއި ސަރުކާރުގެ ސަޕޯޓަރުން އައީކީ އަމަށަކު ރުޅިއެއްނޫނެވެ.
ކުރީގެ ރައީސް ޑރ. ވަހީދު އަނެއްކާވެސް އިދިކޮޅާ ބައިއަތު ޙިއްޕެވުން
މިކަންވެސް ހަމަ އިއްތުފާގަކަށް ނުވޭތޯއެވެ؛ ރައްޔިތުންގެ މަޖިލީހުގެ ޖަލްސާއެއްގައި "ވަހީދަކީ ބާޣީއެއް" ކަމަށް ވިދާޅުވެ އެމްޑީޕީގެ މެންބަރުން ޖަޒުބާރުގައި ވާހަކަ ދެއްކެވިތާ މާގިނަ ދުވަހެއް ނުވަނީސް ކުރީގެ ރައީސް ޑރ. ވަހީދު ވަނީ ޕީޕީއެމްއާ ގުޅިވަޑައިގެން އެޕާޓީގެ އެޑްވައިޒަރެއްގެ ގޮތުގައި މަސައްކަތްކުރައްވަން ފައްޓަވާފައެވެ. އިދިކޮޅު ކޯލިޝަނުގެ އިސްޕާޓީއާ ބައިއަތު ހިއްޕަވައި ދެއްކެވި ވާޙަކައިގައި ޑރ. ވަހީދު ވަނީ އެމްޑީޕީއަށް ވަރަށް ބޮޑަށް ފާޑުވިދާޅުވެ، މިހާރުގެ ސަރުކާރަށްވެސް ބަހުގެ ހަމަލާތައް އަމާޒުކުރައްވާފައެވެ.
ފުލުހުންނާއި ސިފައިން ވެރިކަން ބަދަލުކުރަން ދެން ނުނިކުންނާނެކަމަށް ޕޮލިސް ކޮމިޝަނަރު ވިދާޅުވެފައިވަނިކޮށް ރައީސް ނަޝީދު ވަނީ އަދިވެސް އެ ފުރުޞަތު އެބައޮތް ވިދާޅުވެ ކޮމިޝަނަރަށް ރައްދުދެއްވާފައެވެ.
ސިޔާސީ ވެށިން މިނޫންވެސް މިފަދަ އެތައް އިއްތިފާގުތަކެއް ލިސްޓްކޮށްލެވިދާނެއެވެ. ވިސްނާ ބަޔަކަށް މިއީ އިބުރަތަކަށްވާނެއެވެ.
