ނ.މަނަދޫން އަލަށް ދޫކުރި ގޯތިތަކުން ޤަވާޢިދާ ޚިލާފަށް ރުއްގަސް ކެނޑުމާއި، އުފުރުމާއި ގުޅިގެން އެރަށު ކައުންސިލް އިދާރާ ޖޫރިމަނާކޮށްފިއެވެ.
އެންވަޔަރަމަންޓަލް ޕްރޮޓެކްޝަން އޭޖެންސީން ބުނީ، މިމައްސަލާގައި ކައުންސިލުން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ޤާނޫނުގެ ދަށުން ހެދިފައިވާ ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓް ހެދުމާބެހޭ ޤަވާއިދާއި އެއްގޮތަށް ފުރިހަމަ ކުރަންޖެހޭ އިދާރީ ކަންކަން ފުރިހަމަ ކޮށްފައިނުވާ ކަމަށެވެ.
އަދި މިކަމަށް ރިޢާޔަތްކޮށް މިއަދުން ފެށިގެން ޖުމްލަ20،000 (ވިހި ހާސް) ދިވެހި ރުފިޔާއިން މިލަދުންމަޑުލު ދެކުނުބުރީ މަނަދޫ ކައުންސިލް އިދާރާ ޖޫރިމަނާކޮށްފައިވާ ކަމަށެވެ.
އީޕީއޭއިން ބުނީ، މިޖޫރިމަނާ ފައިސާ 30 (ތިރީސް) ދުވަހުގެ މުއްދަތުގެ ތެރޭގައި އެއެޖެންސީއަށް ދެއްކުމަށް އެފަރާތަށް އަންގާފައިވާ ކަމަށެވެ.
