އިސްލާމް ދީނަށް ތައުހީނުކުރުމުގެ މައްސަލައެއް ފުލުހުން ބައްލަވަމުން ގެންދަވަނިކޮށް ރާއްޖެ ދޫކޮށްގޮސް ބޭރުގައި އުޅެމުންދާ އުފާ ފަހުމީ އިއްޔެ ޢާންމުކުރި ވީޑިއޯގައި ރައީސް ނަޝީދާއި ސީޕީ ޙަމީދުގެ މައްޗަށް ކޮށްފައިވާ ސީރިއަސް ތުހުމަތުތައް ޚާއްޞަ ސަމާލުކަމެއް ދެއްވައިގެން މިހިނދުން މިހިނދަށް ތަޙްޤީޤުކޮށް ބައްލަވައިދެއްވުން އެދި "ރައްޔިތުންގެ އިއްތިހާދު" ހަރަކާތުގެ ފަރާތުން ޑެޕިއުޓީ ކޮމިޝަނަރ އޮފް ޕޮލިހަށް ސިޓީއެއް ފޮނުވައިފިއެވެ.
"މިފަދަ ޙައްސާސް ތުހުމަތުތަކެއް ދަޥްލަތުގެ އެފަދަ އިސް މަޤާމުތަކެއްގަައި ތިބި ފަރާތްތަކެއްގެ މައްޗަށް ކުރެވުނު ހިނދު، ރައްޔިތުން އިއްތިޙާދުން މަނިކުފާނުގެ އަރިހުން މިއެދެނީ މި މައްސަލައަށް ޚާއްޞަ ސަމާލުކަމެއް ދެއްވައިގެން މިހިނދުން މިހިނދަށް ތަޙްޤީޤުކޮށް މައްސަލަ ބައްލަވައި ދެއްވުމަށެވެ. އަދި މި މައްސަލައިގެ ބާވަތުންނާއި އެ ދެ ފަރާތުގެ މަޤާމާއި ޙައިސިއްޔަތުގެ ގޮތުން އެ ދެ ފަރާތުގެ ނުފޫޒުގެ އަސަރު ފޯރުމުގެ ފުރުޞަތު ތަނަވަސްކަމުން، މިވަގުތު މަޤާމާއި މަސްއޫލިއްޔަތުން އެއްފަރާތް ކުރެވިގެން ދާނެ ފަދަ ގޮތަކަށް އެ ދެ ފަރާތް އެކަހެރިކޮށްދެއްވުމަށެވެ."
ސައްތައިންސައްތަ އިސްލާމީ މި މުޖުތަމަޢުގެ ތެރޭގައި ހިންގޭ އިސްލާމް ދީނުގެ އަސްލުތަކާއި ޝިޢާރުތަކާއި ދެކޮޅު ޙަރަކާތްތަކާއި އަދި ޝިރުކާއި ކުފުރުގެ ޢަމަލުތަކާ ދެކޮޅަށް، ޤާނޫނީ އިމުގެތެރޭގައި މަސައްކަތް ކުރުމުގެ ބޭނުމުގައި ރާއްޖޭގެ ގިނަ މަދަނީ ޖަމްޢިއްޔާތަކަކާއި ދީނީ ޢިލްމުވެރިން ގުޅިގެން އުފައްދާފައިވާ "ރައްޔިތުންގެ އިއްތިހާދު" ޙަރަކާތުގެ ފަރާތުން ފުލުހުންގެ ދެވަނައަށް އެންމެ އިސްވެރިޔާ ޢަބްދުލް މަންނާނަށް އެޑްރެސްކުރަށްވައި ފޮނުވި ސިޓީގައި ބުނެފައި ވެއެވެ.
އަދި، އުފާ ފަހުމީގެ މައްސަލާގައި ކަމާބެހޭ އިދާރާތަކުން ވެފައިވާ އިހުމާލާއި، އެމް.ޑީ.އެ.ން އާ ގުޅުވައިގެން ދައުލަތުގެ ތިންބާރުގެ ތެރެއިން އެއްބާރުގެ ވެރިޔާ ރައީސް ނަޝީދާއި އަދި ޤައުމުގެ ތަންފީޒީ އެންމެ މުހިންމު މުއައްސަސާކަމުގައިވާ ފުލުހުންގެ މުއައްސަސާގެ ވެރިޔާ ކޮމިޝަނަރ އޮފް ޕޮލިސް މުޙައްމަދު ޙަމީދަށް ނިސްބަތްކޮށް އުފާގެ ވީޑިއޯގައި ދައްކާފައިވާ ވާހަކަތަކާ ގުޅިގެން ރައްޔިތުންގެ އިއްތިހާދުން ފުލުހަށް ފޮނުވި ސިޓީގައި ގިނަ ކަންބޮޑުވުންތަކެއް ފާހަގަކޮށްފައި ވެއެވެ.
"އެމް.ޑީ.އެން ގައި ތިޔަ މުއައްސަސާގެ އެންމެ އިސް ފަރާތް ކަމުގައިވާ ކޮމިޝަނަރ އޮފް ޕޮލިސް މުޙައްމަދު ޙަމީދާއި ރައްޔިތުންގެ މަޖްލީހުގެ ރައީސްކަމުގެ މަޤާމު މިވަގުތު ފުރަމުން ދާ ގ. ކެނެރީގެ މުޙައްމަދު ނަޝީދުގެ ވަރަށް އިސް ދައުރެއް އޮންނަކަމަށާއި، މާތް ﷲ އަށާއި ލޮބުވެތި މާތް ނަބިއްޔާ صلى الله عليه وسلم އަށް ފުރައްސާކޮށް ވީޑިއޯ ހެދުމަށް އެ ދެ ފަރާތުން އަޑީގައި ތިބެގެން އުފާ ކައިރީގައި އެދުނު ކަމަށް ބަޔާންކޮށްފައިވެއެވެ."
އުފާ ފަހުމީގެ ވީޑިއޯގައި ޤަބޫލުކުރެވެނިވި ބީދައަކުން ދައްކާފައިވާ ވާހަކަތަކަށް އިޝާރާތްކޮށް، އެސިޓީގައި ކަންބޮޑުވުން ފާޅުކޮށް ބުނެފައިވެއެވެ.
އަދިހަމަ، އެ އިއްތިޙާދުގެ ފަރާތުން އެމް.ޑީ.އެންގެ ތަޙްޤީޤުގެ ތަފުޞީލު ހޯދުމަށް މިވީހާތަނަށް ކޮށްފައިވާ ޤާނޫނީ މަސައްކަތަށް ހުރަސް އެޅި، އެ މަޢޫލޫމާތު ނުލިބި ވަނީ މި އެފަދަ ނުފޫޒުތަކުގެ ސަބަބުން ކަމުގައި އެ އިއްތިހާދަށް މިހާރު ވަރަށް ބޮޑަށް އިޙްސާސްކުރެވެން ފަށައިފިކަމަށް ވެސް ދަންނަވަން ޖެހިއްޖެ ކަމުގައި ހިތަމައާއެކު ޤަބޫލު ކުރާކަމަށް، ރައީސް އޮފީހާއި އިސްލާމިކް މިނިސްޓްރީގެ އިތުރުން މީޑިއާތަކަށް ކޮޕީކޮށްފައިވާ މި ސިޓީގައި ބުނެފައިވާކަންވެސް ފާހަގަކޮށްލެވެއެވެ.
