ސަރުކާރު ހިންގާ ކޯލިޝަންގެ މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރައީސްގެ ޒާތަށް ތާއަބަދުމެ އަރައިގަންނަމުންދާއިރު ބައިމަދު ޕާޓީގެ ވަޒީރުން ވަޒީރުކަމުގެ މަޤާމުތަކުގައި ބައިތިއްބަން ޖެހޭތޯ ވިދާޅުވެ ރައްޔިތުންގެ މަޖްލީހުގެ މަކުނުދޫ ދާއިރާގެ މެންބަރު މުޙައްމަދު ރާޢީ ސުވާލު އުފައްދަވައި ރައީސް ނަޝީދު ދިފާޢުގައި ތެދުވެވަޑައިގެންފިއެވެ.
މެންބަރު ރާޢީ މިފަދައިން ވިދާޅުވެފައި މިވަނީ މިއަދުގެ ވަގުތެއްގައި ކުރެއްވި ޓްވީޓެއްގައެވެ. ރައީސް ނަޝީދުގެ ޒާތަށް ތަކުރާރުކޮށް އަރައިގަންނަމުން ގެންދަނީ، ކޯލިޝަންގައި ހިމެނޭ ޕާޓީއެއްގެ އިސް މެމްބަރަކު ޒާތީ ހަސަދަވެރިކަން ކުރިއަށްނެރެ ސިޔާސީކުޅި ކުޅެން ބޭނުންވާލެއް ބޮޑުކަމުން ކަމަށްވެސް މެންބަރު ރާޢީގެ ޓްވީޓުގައި ތުހުމަތުކުރަށްވާފައި ވެއެވެ.
https://twitter.com/Mraee12/status/1345879157440270337?s=20
މެންބަރު ރާޢީގެ މިޓްވީޓުގައި "ބައިމަދު ޕާޓީ" ކަމަށް އިޝާރާތްކުރަށްވާފައި އެވަނީ ވެރިކަންކުރަމުންދާ ކޯލިޝަންގައި ހިމެނޭ ޢަދާލަތު ޕާޓީއަށް ނިޞްބަތްކުރަށްވައި ކަމަށް ޤަބޫލުކުރެވެއެވެ. އަދި، ވަޒީރޭ ވިދާޅުވެފައި އެފަވަނީ ޢަދާލަތު ޕާޓީގެ ރައީސް މިސަރުކާރުގެ ހޯމް މިނިސްޓަރު ޝައިޚް ޢިމްރާން ޢަބްދުﷲ އަށް އިޝާރާތްކުރަށްވައި ކަމަށާއި، "އިސް މެމްބަރު" އެކޭ ވިދާޅުވެފައި އެވަނީ ޑރ. އިޔާޒަށް ދިމާއަށް ކަމަށްވެސް ޤަބޫލުކުރެވެއެވެ.
ސައްތައިން ސައްތަ މި ދިވެހިރާއްޖޭގައި އެހެނިހެން ދީންތަކުގެ އިޙްތިފާލުތައް ފާހަގަކުރުމާއި އެކަންކަމަށް ހިތްވަރުދީ ހެދުމަކީ ނޭނގިތިއްބައި ޝިރުކުގެ ތެރެއަށް ވެއްޓިގެން ހިނގައިދާނެ ކަމެއްކަން ބަޔާންކޮށްދެއްވައި އެފަދަ ކަންކަމުން ދުރުހެލިވެތިއްބެވުމަށް ރާއްޖޭގެ އެންމަހި ދީނީ ޢިލްމުވެރިންގެ ފަރާތުން ރައްޔިތުންނަށް އިލްތިމާސް ކުރަށްވާފައި ވަނިކޮށް އެކަމަށް ފާޅުގައި ގޮންޖައްސަވައި، ކްރިސްޓިއަނުންގެ ދީނީ އިޙްތިފާލެއްކަމުގައިވާ "ކްރިސް މަސް" ފާހަގަކުރުމަށް ހިތްވަރުދެއްވުމާއެކު ކްރިސްމަސް ދުވަހުގެ ތަހުނިޔާވެސް ކިޔުއްވައި ރައީސް ނަޝީދު ޓްވީޓުކުރަށްވާފައި ވެއެވެ.
ރައީސް ނަޝީދުގެ އެޓްވީޓާ ގުޅިގެން ވަރުގަދަ ރައްދުތަކެއް ރައީސް ނަޝީދަށް އަމާޒުކުރެއްވި ޢިލްމުވެރިންގެ ތެރޭގައި ޢަދާލަތު ޕާޓީގެ ޢިލްމުވެރިން ވެސް ހިމެނިވަޑައިގެން ގޮސްފައި ވާއިރު، "7 ފެބްރުއަރީ" އަކީ ބަޣާވާތެއްކަމަށް ރައީސް ނަޝީދު ތަކުރާރުކޮށް ވިދާޅުވަމުން ގެންދެވުމާ ގުޅިގެންވެސް ޑރ. އިޔާޒުގެ "ހޫނު" ބަހުގެ ހަމަލާތަކެއް ދާދިފަހުންވެސް ރައީސް ނަޝީދަށް އަމާޒުކުރަށްވާފައި ވޭމެއެވެ.
ޑރ. އިޔާޒުގެ "ހޫނު" ބަހުގެ ހަމަލާތަކަށް ރައީސް ނަޝީދު ރައްދު ފޮނުވާލެއްވީ ލަދުވެތިކަމެއް ހުރި ލޮލެއްނަމަ މެރިގެންދާފަދަ ޢިބާރާތްތަކުން ލަދުޙަޔާތް ވެސް އެއްކައިރިކޮށްލެއްވުމަށް ފަހުގައި އެލްކްސް އަޙްމަދުގެ ޓްވިޓަރ އަތްގަނޑުން ދޫކޮށްލެއްވި ޓްވީޓުތަކުންކަންވެސް ފާހަގަކޮށްލެވެއެވެ.
