ދިވެހި ދައުލަތުގެ ނަމުގައި ރައީސުލް ޖުމްހޫރިއްޔާގެ އޮފީހުގެ ފަރާތުން ނެރުއްވަމުންގެންދެވި "ދީނުގެމަގު" މަޖައްލާ، 2008 ވަނަ އަހަރާއި ހަމައިން ހުއްޓިފައި އޮތް އޮތުން ނިމުމަކަށް ގެނެސް އަމިއްލަ ފަރާތަކުން އެމަޖައްލާ އަލުން ރަޖިސްޓްރީކޮށްގެން ނެރެންފައްޓައިފި އެވެ.
"ދީނުގެމަގު" މަޖައްލާ ދެވަނަ ފަހަރަށް ނެރެން ފެށުނުކަން ހާމަކޮށްފައި މިވަނީ އެ މަޖައްލާގެ ފާރާތުން މިއަދު ނެރެފައިވާ ނޫސްބަޔާނެއްގަ އެވެ.
"މި މަޖައްލާ ދެވަނަ ފަހަރަށް ވުޖޫދު ކުރުމަށް ކުރެވުނު މަސައްކަތްތަކަށް ސަރުކާރުގެ ކަމާބެހޭ މުއައްސަސާތަކުން ދެއްވި އެއްބާރުލެއްވުން ނުހަނު އުފަލާއެކު ފާހަގަ ކުރަމެވެ. އެ މުއައްސަސާތަކުން މިކަމުގައި އުޅުއްވި ކޮންމެ މުވައްޒަފެއްގެ ވެސް މޫނު މަތިން ފެނުނު ހިނިތުންވުމާއި އުފާވެރިކަން އެއީ "ދީނުގެމަގު" ދުވަހަކުވެސް ހަނދާން ނެތޭނެ ކަމެއް ނޫނެވެ. ހޯމް މިނިސްޓްރީގެ ދަފްތަރުން 2203/2019 ވަނަ ރަޖިސްޓްރީ ނަމްބަރުގައި މި މަޖައްލާ ޖާގަހޯދީ 2019 ވަނަ އަހަރު ޖުލައި މަހުގެ 23 ވަނަ ދުވަހުއެވެ. މިއަދު "ދީނުގެމަގު" މިވަނީ އައު ދަތުރަކަށް މިސްރާބު ޖަހާފައެވެ."
ދެވަނަ ފަހަރަށް ވުޖޫދުކުރެވި މިއަދު ނެރުނު އެމަޖައްލާގެ ދެވަނަ ދައުރުގެ ފުރަތަމަ ޢަދަދާއެކު އެމަޖައްލާގެ މުޙައްރިރުގެ ފަރާތުން ޢާންމުކޮށްފައިވާ ނޫސްބަޔާނެއްގައި ބުނެފައި ވެއެވެ.
"ދީނުގެމަގު" މިއީ އިސްލާމްދީނުގެ ޢިލްމު ދިވެހި ފަސްގަނޑުގައި ފެތުރުމުގެ މަތިވެރި މާތް މަޤްޞަދުގައި ކޮންމެ ހުކުރު ދުވަހަކު ޝާއިޢުކުރެވޭ ހަފްތާ މަޖައްލާއެއްކަމަށާއި އަދި އެމަޖައްލާގައި ހިމަނަން ގަސްތުކުރަނީ އިސްލާމްދީނުގެ އާންމު މައުލޫމާތުތަކާއި ފިލާވަޅުތައްކަމަށްވެސް އެ ނޫސްބަޔާނުގައި ހާމަކޮށްފައި ވެއެވެ.
ދިވެހިރާއްޖޭގެ ރައްޔިތުންނަށް ދީނީގޮތުން އައު ދަރުހާއި އިރުޝާދު ފޯރުކޮށްދިނުމުގެ އުއްމީދުގައި ދެވަނަ ފަހަރަށް ނެރެވެން ފެށުނު އެ މަޖައްލާ ފަރުމާ ކުރެވިފައި ވާނީ، މުހިއްމު މައުޟޫޢުތަކަށް ކުރު މަޒުމޫނުތަކެއް ހިމަނައިގެން ފަސޭހައިން ވިސްނޭހެން ސާދާ ޢިބާރާތުން ހުރިހާ މައުލޫމާތެއް ފޯރުކޮށްދެވޭތޯ އިސްކަމެއް ދެވިގެންކަމަށްވެސް، ދީނުގެމަގު މަޖައްލާގެ ފަރާތުން ހާމަކޮށްފައިވާއިރު، އިސްލާމްދީނުގެ ޞައްޙަ މައުލޫމާތު މީސްތަކުންގެ މެދުގައި ފަތުރަން މަސައްކަތް ކުރުން އެއީ ހުރިހާ ޒަމާނަކަށް ނުހަނު ބޭނުން ޖެހިފައިވާ ކަމެއްކަމަށް ބަޔާންކޮށް، ވަކީން ޚާއްޞަގޮތެއްގައި ދިވެހި މުޖްތަމަޢްއަށް އިސްލާމްދީނުގެ ޞައްޙަ މައުލޫމާތު ރަނގަޅު ދަލީލާއެކު އެނގުމުގެ މުހިއްމުކަން މިއަދު ބޮޑުކަމަށްވެސް އެމެޖައްލާގެ ފަރާތުން ނެރުނު ނޫސްބަޔާނުގައި ފާހަގަކޮށްފައި ވެއެވެ.
ޑިޖިޓް މަޖައްލާއެއްގެ ގޮތުގައި މަޖައްލާގެ ރަސްމީ ވެބްސައިޓުންނާއި އިޖްތިމާޢީ މަންސަތުގެ އެކައުންޓުތަކުގައި ޝާއިޢުކުރެވުމުގެ އިތުރުން ޗާޕުކޮށްގެންވެސް ނެރެވޭ މިމަޖައްލާ، މާލޭ ސަރަޙައްދާއި އަތޮޅުތެރޭގެ ރަށްރަށުގެ އިތުރުން ވެލާނާ އިންޓަރނޭޝަނަލް އެއާރޕޯޓުގައި
ވެސް މުޅިން ހިލޭ ބެހިގެންކަން ހާމަކޮށް، ކުރިއަށް އޮތްތަނުގައި އިތުރު ރަށްރަށަށް އެމަޖައްލާ ފޮނުވުމަށް އެ ޓީމުން މަސައްކަތް ކުރާނެކަމަށްވެސް "ދީނުގެމަގު" ޓީމުން ހާމަކޮށްފައި ވެއެވެ.
"ދީނުގެމަގު" ގެ ނަމުގައި އެންމެ ފުރަތަމަ މަޖައްލާއެއް ޝާއިޢުކުރެވިގެން ގޮސްފައި ވަނީ، އަލްއުސްތާޛު މައުމޫން ޢަބްދުލް ޤައްޔޫމް ރާއްޖޭގެ ރައީސުލް ޖުމްހޫރިއްޔާކަމުގެ މަޤާމާ ޙަވާލުވެވަޑައިގެންނެވުމާއެކު އެމަނިކުފާނުގެ އިސްނެންގެވުމުގެ މަތިން 1987 ވަނަ އަހަރުގައެވެ. ރާއްޖޭގެ ކޮންމެ ގޭބިސީއަކާއި ހަމައަށް ވާޞިލުވެ، އިސްލާމީ ދަޢުވަތުގެ އަލިގަދަ ދަންމަރެއްގެ ގޮތުގައި ވެގެންދިޔަ "ދީނުގެމަގު" ހުއްޓުމަކަށް އައީ ރައީސް މައުމޫނުގެ ވެރިކަން ނިމުމަކަށް އައުމާ ހަމައިން 2008 ވަނަ އަހަރުގެ ތެރޭގައި ކަންވެސް ފާހަގަކޮށްލެވެ އެވެ.
"ދީނުގެމަގު" ފޭސްބުކް އެކައުންޓްގެ ލިންކް
"ދީނުގެމަގު" ޓްވިޓަރ އެކައުންޓް ލިންކް
