ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ސްޕެއިންގެ އެތްލެޓިކޯ މެޑްރިޑްގެ މައްޗަށް އިނގިރޭސި ކުލަބް ޗެލްސީން ކުރިހޯދާ ކުއާޓާގެ އުއްމީދު ބޮޑުކޮށްފިއެވެ.
އެތްލެޓިކޯ މެޑްރިޑްގެ ދަނޑުގައި ކުޅުނު މި މެޗު ނިމުނީ 1-0 ގެ ނަތީޖާއަކުންނެވެ. މެޗްގައި ޖެހި ހަމައެކަނި ގޯލް ޖިރޫޑް ޖެހީ މެޗްގެ 2 ވަނަ ހާފުގައެވެ. މި ގޯލާއެކު އުމުރުން 34 އަހަރުގެ ޖިރޫޑް ވަނީ މިހާރު ކުރިޔަށްދާ ޔުއެފާ ޗެމްޕިއަންސް ލީގުގައި މިއަހަރުގެ މިހާތަނަށް ޖެހި ލަނޑުތަކުގެ ލިސްޓު ހަޔަކަށް އަރާފައެވެ.
މިއީ ޗެލްސީގެ ކޯޗުކަމާއި ތޯމަސް ޓުޗެލް ހަވާލުވިފަހުން ބަލިނުވެ ފުރިހަމަކުރި 8 ވަނަ މެޗުކަން ފާހަގަކޮށްލެވެއެވެ. މެޗަށްފަހު ޗެލްސީގެ ކޯޗުގެ ތައުރީފުގެ ބަސްތައް އޮއްސާލީވެސް ޖިރޫޑް އަށެވެ.
ޔުއެފާ ޗެމްޕިއަންސް ލީގުގައި ޗެލްސީއާއި އެތްލެޓިކޯ މެޑްރިޑް ބައްދަލުކުރާ ދެވަނަ ލެގު ކުޅޭނީ މާޗް 18 ވަނަ ދުވަހުގައެވެ.
