ރައީސް ނަޝީދު ނަފްސާނީ ބައްޔަށް ފަރުވާ ކުރައްވަން ޖަރުމަނު ޑޮކްޓަރުން އެންގެވި!

ރައީސް ނަޝީދަށް އަވަހާރަކޮށްލުމަށް ދިން ޓެރަރިސްޓް ހަމަލާއަށް ފަހު، އޭޑީކޭ ހޮސްޕިޓަލުން ގިނަ ސާޖަރީތަކެއް ހެދުމަށް ފަހު، އިތުރު ފަރުވާ ހޯއްދެވުމަށް، ވަޑައިގެންނެވީ ޖަރުމަނުވިލާތުގެ ވެރިރަށް ކަމުގައިވާ ބާރލިންގްގެ މިލިޓަރީ ހޮސްޕިޓަލެއް ކަމަށްވާ ބުންޑެސްވެއަރ ހޮސްޕިޓަލް އަށެވެ. އަދި ފަރުވާދެއްވީ ޕްރޮފެސަރ ޑރ.ކްރިސްޓިއަން ވިލީ އާއި ޑޮކްޓަރުންގެ ޓީމަކުންނެވެ

ބުންޑެސްވެއަރ ހޮސްޕިޓަލް އަކީ މިފަދަ ހަމަލާތަކުން އަނިޔާ ލިބޭ މީހުނަށް ހާއްސަ ހޮސްޕިޓަލެކެވެ. އެ ހޮސްޕިޓަލުގެ ޑީޕާޓްމަންޓް އޮފް ޓްރޯމޮޓޮލޮޖީ, އޯތޮޕީޑިކްސް އެންޑް ސެޕްޓިކް ރިކޮންސްޓްރަކްޓިވް ސާރޖަރީގެ އެންމެ އިސް ފަރާތަކީ ޕްރޮފެސަރ ޑރ.ކްރިސްޓިއަން ވިލީ އެވެ

ނަޝީދުގެ ކަންކަން އެނގިވަޑައިގަންނަވާ ގާތް ބޭފުޅަކު ވިދާޅުވި ގޮތުގައި، ރައީސް ނަޝީދުގެ ހަށިގަނޑުގެ ފުރިހަމަ އިވެލުއޭޝަނެއް ޑރ.ކްރިސްޓިއަން ވިލީ އާއި އެ ބޭފުޅާގެ ޑޮކްޓަރުންގެ ޓީމަކުން ކުރިއެވެ. އެގޮތުން ޖިސްމާނީ ގޮތުން ލިބިފައި ހުރި އަނިޔާތަކާއި އޭ.ޑީ.ކޭ އިން ދީފައިވާ ފަރުވާތައް ވަޒަންކޮށް އިތުރަށް ހަދަން ޖެހޭ ސާޖަރީތައް ފާހަގަ ކުރިއެވެ. އަދި ރައީސް ނަޝީދު ބޭނުންފުޅު ނަމަ ހުރިހާ ލަކުނު ތަކެއް ފިލުވާލަން ސާޖަރީ ހަދަން ވެސް ލަފާދިނެވެ. އަދި ރައީސް ނަޝީދުގެ ފުރިހަމަ ނަފްސާނީ އިވެލުއޭޝަނެއް ވެސް ހެދުނެވެ. އެއީ މިފަދަ ހާދިސާއެއް ދިމާވުމުން ނަފްސާނީ އެތައް ޝޮކެއް ލިބޭނެ ކަމަަަށް ވާތީއެވެ. އެއީ މިފަދަ ހާދިސާތައް ދިމާވެފައިވާ ކޮންމެ ޕޭޝަންޓަކަށް ވެސް އޮންނަ ހޮސްޕިޓަލުގެ އާންމު އުސޫލު ކަމަށްވެއެވެ.

ރައީސް ނަޝީދުގެ ނަފްސާނީ އިވެލުއޭޝަނުން ޑޮކްޓަރުންނަށް ފާހަގަވީ ކަންތައްތައް!

ރައީސް ނަޝީދުގެ ނަފްސާނީ އިވެލުއޭޝަނުން ޑޮކްޓަރުންނަށް ފާހަގަވީ ރައީސް ނަޝީދު ވަރަށް ބޮޑަށް އެ މަނިކުފާނަށް ދިން ހަމަލާއިން ލިބުނު ގެއްލުމާއި އަދި އެ ހާދިސާގެ ވާހަކަތައް ވިދާޅުވެދެއްވުމުގައި ތަފްސީލަށް ވަޑައިނުގަންނަވައި އެ ވާހަކަތައް އެވޮއިޑް ކުރައްވަން އުޅުއްވުމާއި އަދި ވާހަކަ ދައްކަވާއިރު ދޭތެރެއިން ވަރަށް ބޮޑަށް ފޯކަސް ގެއްލި ތަފާތު އިންޓުރޫސިވް ހިޔާލުތަކަށް ގެއްލޭ ކަމެވެ. އަދި މި ހާދިސާގެ ވާހަކަތަކަށް ވުރެ ބޮޑަށް، އަލުން ސިޔާސީ މައިދާނުގައި ވަގުތުން ހަރަކާތްތެރިވެލައްވަން ބޭނުންފުޅުވާ ވާހަކަ އާއި މިކަމުން ލިބުނު ގެއްލުންތައް އެހާ ބޮޑުކަމެއް ގޮތުގައި އެމަނިކުފާނަށް އަމިއްލަ ފުޅަށް ގަބޫލު ނުކުރެއްވޭކަން ފާހަގަވިއެވެ. އަދި މިކަމަށް ފަރުވާ ހޯއްދެވުމުގެ ބަދަލުގައި ސިޔާސީ ކަންތަކަށް އިސްކަން ދެއްވަން ބޭނުންފުޅުވާ ކަމާއި ބައެއް ފަހަރު ކޯފާވެ ރާއްޖޭގައި އެތައް ހާސް ބަޔަކު ހަރުކަށި ފިކުރުގައި އުޅޭ ކަމަށާއި އަދި އެންމެން ވަގުތުން ހައްޔަރަށް ލާން ޖެހޭނެ ކަމަށް ތަކުރާރުކޮށް ވިދާޅުވިއެވެ. އަދި އެތެރެޔާއި ބޭރުން އަދި އާއިލާ އާއި ރައްޓެހިން ތެރޭގައި ވެސް އެމަނިކުފާނަށް އިތުބާރު ހިފޭ މީހުން ވަރަށް މަދު ކަމަށް ވެސް ޑޮކްޓަރުންނަށް ވިދާޅުވެދެއްވިއެވެ. އަދި ބޭހާއި ނުލާ ނިދިކުރައްވަން ދަތިފުޅު ވާކަމާއި ނިދީގައި ކުއްލި ކުއްލި އަށް ހޭލެވޭކަން ޑޮކްޓަރުންނަށް ކިޔައިދެއްވިއެވެ.

މިހުރިހާ އިވެލުއޭޝަނަކުން ފާހަގަވީ ރައީސް ނަޝީދުގެ ސިވިއަ ކޮމްޕްލެކްސް ޕޯސްޓް-ޓްރޯމެޓިކް ސްޓްރެސް ޑިސްއޯޑަ (ޕީ.ޓީ.އެސް.ޑީ) އެބަހުރި ކަމަށާއި އަދި އެކަމަށް ތެރަޕީ ބޭނުންވާ ކަމަށް ހުރިހާ ޑޮކްޓަރުން އިއްތިފާގުވި ކަމަށް ވެސް ގާތް ބޭފުޅަކު ވިދާޅުވެ ދެެއްވިއެވެ.

ޕޯސްޓް-ޓްރޯމެޓިކް ސްޓްރެސް ޑިސްއޯޑަރ (ޕީ.ޓީ.އެސް.ޑީ) އަކީ ކޮބާ؟

ޕޯސްޓް-ޓްރޯމެޓިކް ސްޓްރެސް ޑިސްއޯޑަ ނުވަތަ ކުރުކޮށް ކިޔާނަމަ ޕީ.ޓީ.އެސް.ޑީ އަކީ ނަފްސާނީ ބައްޔެކެވެ. މިއީ އާންމުކޮށް ވަރަށް ބޮޑެތި ހަމަލާތަކާއި އަނިޔާވެރިކަން ތަހައްމަލު ކޮށްފައިވާ މީހުނަށް ދިމާވާ ކަމެކެވެ. ބޮމުގެ ހަމަލާތަކާއި ފުރާނަޔަށް ގެއްލުންވާ ކަންތައް ތަކަކީ އެ ހާދިސާ ތަކުން ފުރާނަ ސަލާމަތް ވިޔަސް ނަފްސާނީ ގޮތުން އެލިބޭ ޝޮކާ އަދި އިންސާނުންގެ ތަބީއީ ގޮތުން ނުރައްކަލުން ސަލާމަތްވާން ލައްވާފައިވާ "ފައިޓް" އޯރ "ފްލައިޓް" ނިޒާމަކީ މިސާލަކަށް ކުޅަނދުރެއް ގަޔާ ދިމާލަށް އަންނަ ތަން ފެނުމުން އޮޓޮމެޓިކުން ހިތް އަވަސްވެ ކުޅަނދުރަށް ހަމަލާ ދޭނީތޯ ނުވަތަ ސަލާމަތް ވާން ދުއްވައި ގަންނާނީތޯ ނިންމާ ނިޒާމެވެ. މިފަދަ ބޮޑެތި ކަންތައް ދިމާވުމުން މި ނިޒާމު ފާލުން ނައްޓައިގެން ދެއެވެ. އަދި މީހާ އަށް އަންނަ ފުރަތަމަ ޝޮކްތައް ދުއްވާލަން އިންސާނާގެ ސިކުނޑި އަމިއްލައަށް އެދިމާވި ހާދިސާގެ ހަނދާންތައް ވަގުތީ ގޮތުން ނައްތާލައެވެ.

ނަމަވެސް ފަހުން އެ ހާދިސާ އެއްކޮށް ހަނދާންވެ މީހާ އަށް އެތައް ނަފްސާނީ އުދަނގޫ ތަކެއް ދިމާވެއެވެ. އަދި މި ނިޒާމު ފާލުން ނެއްޓުމުން މީހާ އަށް އަބަދުވެސް ހީވާނީ ނުރައްކަލެއްގައި ހުންނަހެންނެވެ. އެއީ ވަރަށް ސަލާމަތްތެރި ތަނެއްގައި އިނަސް ވަރިހަމައެވެ. އެމެރިކާއިން އީރާގަށް އަދި އަފްގާނިސްތާނަށް ހަނގުރާމައަށް ގޮސް ބޮޑެތި އަނިޔާ ލިބުނު މީހުންގެ 70 އިންސައްތަ މީހުންނަކީ ޕީ.ޓީ.އެސް.ޑީ ޖެހިފައިވާ މީހުންނެވެ. އެމީހުނަށް ފަރުވާއެއްދީ އެތައް ތެރަޕީއެއް ނަގައިގެން އެކަމުން އަރައިގަތުމުގެ ކުރިން އެމީހުން ފްރަންޓް ލައިންއަކަށް ނުނެރެއެވެ. މިއީ މިފަދަ ކޮންމެ ބޮޑު ކަމެއް ދިމާވާ އިންސާނަކަށް ދިމާވެދާނޭ ކަމެކެވެ.

ޕީ.ޓީ،އެސް،ޑީ ޖެހިފައި ތިބޭމީހުން ތިބޭނީ ބަފްސާނީ ގޮތުން ބޮޑު ބިރުވެރިކަމެއްގައެވެ. އެއީ ކިތަންމެ ސަލާމަތް ތެރިތަނެއްވިޔަސް އެމީހާޔަކަށް ރައްކާތެރިކަމުގެ އިހުސާސް އެއްނުކުރެވޭނެއެވެ. ބިރުވެރި ހުވަފެން ފެނި ރޭގަނޑު ވެސް ސިއްސަ ސިއްސައިގެން ގޮސް ހޭލެވުމާއި އާދަޔާ ހިލާފަށް ދާހިއްލާ ކަންތައްތަކަށް ފޯކަސް ކުރަން އުނދަގޫވާ ނެއެވެ. އެހެންކަމުން ކޮންމެ ދުވަހެއްގެ މަސައްކަތަށް މިކަމުން ބުރޫއަރައި ވަރަށް ނެގަޓިވް މޫޑްތައް އައިސް އެންމެ ގާތް މީހުނާ ދިމާލައް އެއްޗިހި ކިޔާ ވަރަށް މީހާގެ ސިކުނޑީގެ ވިސްނުމުގެ ހާލަތު ދަށަށް ދެއެވެ.

ޖަރުމަނުގެ ޑޮކްޓަރުން ރައީސް ނަޝިދު އަށް ނަފްސާނީ ގޮތުން ތެރަޕީ ނަގަން ލަފާދެއްވި!

ރައީސް ނަޝީދުގެ ސިވިއަ ކޮމްޕްލެކްސް ޕޯސްޓް-ޓްރޯމެޓިކް ސްޓްރެސް ޑިސްއޯޑަ (ޕީ.ޓީ.އެސް.ޑީ) އިން އަރައި ގަތުމަށް ޑޮކްޓަރުން ލަފާދެއްވީ ހުރިހާ ސިޔާސީ ކަމަކުން އެކަހެރިވެ 2 އަހަރު ދުވަސް ވަންދެން އެއްވެސް ސްޓްރެސްފުލް ކަމަކާއި ހަވާލުނުވެ ސައިކޮލޮޖިކަލް ތެރަޕީ ނަންގަވާ މި ހާދިސާ ކޮންމެ ދުވަހަކު ތަކުރާރުކޮށް ހަނދާން ނުވާ ގޮތަށް ދިރިއުޅުން ބައްޓަން ކުރެއްވުމުގެ އިތުރުން ސަރޖަރީ ހަދައި ލަކުނުތައް ފިލުވާލާ އަދި މި ހާދިސާ ހިނގި ގައުމުން ދުރުގައި އުފާވެރި މާހައުލެއްގައި އާއިލާއާ އެކީ މަޑުމައިތިރި ވަގުތުތަކެއް ދެ އަހަރު ދުވަސް ވައްދެން ހޭދަ ކުރުމަށެވެ. ރައީސް ނަޝީދުގެ ނަފްސާނީ އިވެލުއޭޝަން އަދި ޕޯސްޓް-ޓްރޯމެޓިކް ސްޓްރެސް ޑިސްއޯޑަ (ޕީ.ޓީ.އެސް.ޑީ) ޑައިގްނޯސިސް އަދި ޓްރީޓްމަންޓް ލިޔުމުން ވެސް ދެއްވިއެވެ. ނަމަވެސް ރައީސް ނަޝީދު މިކަންކަމާ ދެކޮޅުހެއްދެވި ކަމަށް ވެއެވެ. އެހެންނަމަވެސް، އަތާއި ފައިގެ ނާރުތައް ރަނގަޅަށް މަސައްކަތް ނުކުރާތީ ކުދި ސާޖަރީތަކެއް ހެއްދެވި ކަމަށް ވެސް އޭނާ ވިދާޅުވިއެވެ.

ރައީސް ނަޝީދުގެ ބާތް ބޭފުޅަކު ވިދާޅުވެ ދެއްވި ގޮތުގައި ޑޮކްޓަރުންގެ އިރުޝާދާ އެއްގޮތަށް، ނަފްސާނީ އެއްވެސް ކަމަކަށް ބޭސް ކުރައްވަން ބޭނުންފުޅެއް ނުވިއެވެ. ޑޮކްޓަރުންގެ ޓީމުން ރައީސް ނަޝީދަށް އެމަނިކުފާނުގެ ނަފްސާނީ ކަންތައްތައް ކުރިމަގުގައި ގޯސްވެ، އެތައް ގެއްލުމެއް ރައީސް ނަޝީދައް ލިބިދާނެ ކަމުގެ އިންޒާރު ވެސް ދެއްވި ކަމަށް ވެއެވެ. އެގޮތުން ޕޯސްޓް-ޓްރޯމެޓިކް ސްޓްރެސް ޑިސްއޯޑަރ (ޕީ.ޓީ.އެސް.ޑީ) އަކީ އެކި ކަހަލަ ނުރައްކާތެރި ނަފްސާނީ އިތުރު ބަލިތަކަށް ބަދުލުވާ ކަމެއް ކަމަށާއި އަދި ވަރަށް ގިނައިން ފަރުވާ ނުކުރާ ފަރާތްތައް ބާރުގަދަ ޑްރަގާއި މަސްތުވާ ތަކެތިން މިކަމުގެ އުނދަގޫތައް ހައްލުކުރަން ބޭނުން ކުރުމުން ޑްރަގް އެޑިކްޓުންނަށް އެމީހުން ވާކަމަށާއި އަދި އަމިއްލަޔަށް ނިންމާ ނިންމުން ތަކުން ވިސްނާނުލާ ގެއްލުން ހުރިއެތައް ކަމެއް ކުރިމަތި ވެދާނެ ކަމުގެ އިންޒާރުވެސް ދެއްވިއެވެ.

ރައީސް ނަޝީދު ވިދާޅުވި ކަމަށް ވަނީ ދެ އަހަރު ކީއްކުރަންތޯ ދެ މަސް ވެސް ސިޔާސީ ކަންތަކާ ދުރުގައި ނުހުރެވޭނެ ކަމަށާއި އެމަނިކުފާނު ނެތިއްޔާ ދިވެހިރާއްޖެ ސަލާމަތް ނުވާނެ ކަމަށާއި އެމަނިކުފާނުގެ ސަޕޯޓަރުން ތިބީ އެމަނިކުފާނު ކުރިއަށް ވުރެވެސް ވަރުގަދަކޮށް އެނބުރި އަންނާނޭ ކަމަށް ނިންމައިގެ ކަމަށެވެ.

ޖަރުމަނު ޑޮކްޓަރުން ރައީސް ނަޝީދަށް ދިން ހެޔޮ ނަސޭހަތް!

ޖަރުމަނު ޑޮކްޓަރުން ރައިސް ނަޝީދަށް ވަރަށް ކަމޭ ހިއްތަވައި ހާލުގައި އެމަނިކުފާނަކީ ދުނިޔޭގެ ތިމާވެއްޓާ އަދި ގައުމަށް ވެސް އަގުނުކުރެވޭ އެތައް ޚިދުމަތް ތަކެއް ކުރައްވާފައިވާ އަދި މުޅި ހަޔާތް އެކަމަށް ގުރުބާން ކޮށްފައިވާ ދުނިޔޭގެ ފާހަގަ ކޮށްލެވޭ ލީޑަރަކަށް ވީހިނދު، އެމަނިކުފާނަށް ނިހާޔަތައް ތެރަޕީ ބޭނުންވާ ކަމަށް ތަކުރާރުކޮށް ޑޮކްޓަރުން ވިދާޅުވި ކަމަށް ވެއެވެ.

އިތުރަށް ޑޮކްޓަރުން ވިދާޅުވި ކަމަށް ވަނީ ގައުމު ސަލާމަތް ކުރެވޭނީ ރައީސް ނަޝީދު ފުރަތަމަ ނަފްސާނީ ބަލިމަޑުކަމުން ސަލާމަތް ވެގެން ކަމެވެ. އަދި މިހާރު ހުރި ނަފްސާނީ ސްޓޭޓަސް އިން ނެންގެވޭނީ މުޅިންވެސް ގައުމަށާއި އެމަނިކުފާނަށް ވެސް ގެއްލުން ލިބޭނެ ނިންމުން ތަކެއް ކަމަށް ޑޮކްޓަރުން ވިދާޅުވިއެވެ.

އަދި ޑޮކްޓަރުން ވިދާޅުވީ ސިއްހީ ކަންތަކަކީ އެންމެ ފުރަތަމަ ވާޖިބް ކަމަށާއި އަދި ރައީސް ނަޝީދަކީ ހޯއްދަވާފައިވާ ކާމިޔާބީ ތަކަށް ބަލާފައި ވަރަށް ޅައުމުރުގެ ބޭފުޅެއް ކަމަށާ އަދި ފަރުވާ ހޯއްދަވައިގެން ރެސްޓެއް ނެގުމަށް ފަހު ކުރީން ހޯދުނު ކާމިޔާބީތަކަށް ވުރެ މާގިނަ ގުނަ ކާމިޔާބީތަކެއް ގައުމީ އަދި ދުނިޔޭގެ ފެންވަރުގައި ވެސް ހޯއްދެވިދާނެ ވަރުގެ ބޭފުޅެއްކަން ޑޮކްޓަރުން ފާހަގަ ކުރެއްވިއެވެ. އަދި ކެތްތެރިކަން ނުހުރުމަކީ ބަލިކަށި ކަމެއް ކަމަށާއި  ޕޯސްޓް-ޓްރޯމެޓިކް ސްޓްރެސް ޑިސްއޯޑަރ (ޕީ.ޓީ.އެސް.ޑީ) އަށް ފަރުވާ ނުކޮށް ހުންނަ ކޮންމެ ދުވަހަކުވެސް އަމިއްލަފުޅަށް ގެންލުން ލިބޭ ކަންތައްތައް ނޭންގި ނަމަވެސް ކުރެވޭނެ ކަމަށް ޑޮކްޓަރުން ވިދާޅުވި ކަމަށްވެއެވެ.

އިތުރައް ދެން ފަރުވާކުރައްވާނީ އިނގެރޭސިވިލާތުން ކަމަށް ވިދާޅުވެ ރައީސް ނަޝީދު އިނގެރޭސިވިލާތަށް ވަޑައިގަތުން!

ޖަރުމަނު ޑޮކްޓަރުންގެ ވާހަކަތައް ގަބޫލުނުކުރައްވައި ރައީސް ނަޝީދު ނިންމެވީ އިތުރު ފަރުވާ ހޯއްދަވަން ކަމަށް ވިދާޅުވެ އިނގެރޭސިވިލާތަށް ވަޑައިގަތުމަށެވެ. އިނގެރޭސި ވިލާތަށް ވަޑައިގަތުމަށް ފަހު ފުލްޓައިމް ހޭދަ ކުރައްވަނީ ސިޔާސީ މަސައްކަތްތަކާ މަޖްލީސްގެ މަސައްކަތްތަކުގައި ކަމަށް ވެއެވެ. މިއީ ހައްތަހާވެސް ސިކުނޑިއަށް ބުރަ ބޮޑުވާނެ މަސައްކަތްތަކެވެ. އަދި ޖަރުމަނު ޑޮކޮޓަރު ދެއްވި ލަފަޔާއި އެއްގޮތަށް ފުރިހަމަ ފަރުވާއެއް އަދި ދެމިގެންދާ ތެރަޕީއެއް ވެސް ނުނަންގަވާ ކަމަށް ރައީސް ނަޝީދުގެ ގާތްބޭފުޅާ ވިދާޅުވިއެވެ.