ޔޫތު މިނިސްޓްރީން އިންތިޒާމުކޮށްގެން ބާއްވާ ޒުވާނުންގެ ހޮޅުއަށީގައި ބައިވެރިވުމުގެ ފުރުސަތު ހުޅުވާލައިފި އެވެ.
ޔޫތު މިނިސްޓްރީގެ ފޭސްބުކް ގައި ކޮށްފައިވާ ޕޯސްޓްގައި ބުނެފައިވަނީ އެ މިނިސްޓްރީން ބާއްވަން ހަމަޖެހިފައިވާ "ޒުވާނުންގެ ހޮޅުއަށި" މި މަހުގެ 30 ވަނަ ދުވަހުގެ ރޭ 8:30-10:00 އަށް ސޯޝަލް ސެންޓަރުގައި ބާއްވަން ހަމަޖެހިފައިވާ ކަމަށާއި، އެ ހޮޅުއަށީގައި ބައިވެރިވާން އެދޭ ފަރާތްތަކުން ރަޖިސްޓްރީ ވުމަށް ހުޅުވާލާފައިވާ ކަމަށެވެ.
އަދި އެ ހޮޅުއަށީގައި ބައިވެރިވާން ބޭނުންވާ ފަރާތްތަކަށް ރަޖިސްޓްރީވުމަށްޓަކައި އޮންލައިން ލިންކެއް (Google Forms: Sign-in) ވެސް އެ ޕޯސްޓާއެކު ހިއްސާކޮށްފައިވެއެވެ.
ޒުވާނުންނަށް ދިމާވާ ގޮންޖެހުންތަކާއި، އެކަންކަމަށް ހައްލު ހޯދުމަށް ހުރި ފުރުސަތުތަކާ ގުޅޭގޮތުން ހިޔާލު ބަދަލުކުރުމަށް އެ ހޮޅުއަށީގައި ފުރުސަތު ލިބިގެންދާނެ ކަމަށާއި، ހާއްސަކޮށް ޒުވާނުންގެ ވަޒީފާގެ ދަތިކަމާ ގުޅޭ ގޮތުން މަޝްވަރާ ކުރާނެ ކަމަށްވެސް ބުނެފައިވެއެވެ.
