ގެވެށި އަނިޔާ ހުއްޓުވުމާއި އެފަދަ މައްސަލަތަކަށް އިޖާބަދިނުމުގެ ގާބިލުކަން އިތުރުކުރުމުގެ މަގުސަދުގައި ފުލުހުންނަށް ހާއްސަކޮށްގެން ބޭއްވި ޓްރެއިނިންގ އޮފް ޓްރޭއިނާސް އޮން ޑޮމެސްޓިކް ވައިލެންސް ޕްރިވެންޝަން އެންޑް ރެސްޕޮންސް -“ޓީއޯޓީ” ޕްރޮގްރާމް ކުރިއަށް ގެންގޮސްފިއެވެ.
ދިވެހި ފުލުހުންގެ ޚިދުމަތާއި، ފެމިލީ ޕްރޮޓެކްޝަން އޮތޯރިޓީ (އެފްޕީއޭ) ގުޅިގެން، މި މަހުގެ 20 އިން 24 އަށް ކުރިއަށް ގެންދިޔަ މި ޕްރޮގްރާމުގައި ރާއްޖޭގެ އެކި ސަރަހައްދުތަކުގައި މަސައްކަތްކުރާ ފުލުހުން ހިމެނޭހެން ޖުމުލަ 30 ފުލުހުން ބައިވެރިވި އެވެ.
މި ޕްރޮގްރާމުގައި، ގެވެށި އަނިޔާއާ ގުޅޭ މުހިންމު ދާއިރާތަކަށް އަލިއަޅުވާލައި 10 ސެޝަނެއް ވަނީ ކުރިއަށް ގެންގޮސްފައެވެ.
ފުލުހުން ބުނީ މި ތަމްރީނު ޕްރޮގްރާމް ހިންގުމުގެ މައިގަނޑު މަގުސަދަކީ ގެވެށި އަނިޔާ ހުއްޓުވުމަށާއި، އެފަދަ މައްސަލަތައް ރިޕޯޓުކުރުމުން ފުލުހުން އަމަލުކުރަންޖެހޭ ގޮތްތަކާ ގުޅޭގޮތުން ބޭނުންވާ އިލްމާއި ހުނަރު އިތުރުކުރުން ކަމަށާއި، އަދި ފުލުހުންގެ މުއައްސަސާގެ ތެރޭގައި އެހެން ފުލުހުންނަށް މިފަދަ ތަމްރީނުތައް ދެވޭނެ ފެންވަރުގެ ގާބިލު މުދައްރިބުން (ޓްރެއިނަރުން) އުފެއްދުމާއި، މި ދާއިރާއިން ފުލުހުން ދޭ ހިދުމަތުގެ ފެންވަރު އިތުރަށް ހަރުދަނާކުރުމަކީ ވެސް މި ޕްރޮގްރާމުގެ މުހިންމު އަމާޒެއް ކަމަށެވެ.
މި ޕްރޮގްރާމް ނިންމައިލާފައިވަނީ ބައިވެރިންނަށް އުނގަންނައިދެވުނު މައުލޫމާތާއި، މުދައްރިބެއްގެ ކިބައިގައި ހުންނަންޖެހޭ ކިޔަވައިދިނުމުގެ ހުނަރުތައް ހުރި މިންވަރު ދެނެގަތުމަށްޓަކައި ހާއްސަ އިމްތިހާނެއް ހެދުމަށްފަހުގައެވެ. މިގޮތުން ބައިވެރިންގެ ފެންވަރު ވަޒަންކުރުމަށް އެމް.ސީ.ކިއު އިމްތިހާނެއް ބޭއްވުމުގެ އިތުރުން، ބައިވެރިން އަމަލީގޮތުން ކިޔަވައިދިނުމުގެ ހުނަރު ދައްކުވައިދޭ ޕްރެޒެންޓޭޝަންތަކެއް ވެސް ވަނީ ހުށަހަޅާފައެވެ.
