އެ ކަމަށް ޓަކައި މިއަދު ބ. ކިހާދޫގައި ހުންނަ އެމްއެންޑީއެފް ސަރވިސް ކޯރގެ، ސްކޫލު އޮފް އިންޖިނިއަރިންގ އެންޑް ލޮޖިސްޓިކްސްގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަޠަނީ ޚިދުމަތާބެހޭ ވަޒީރު، އޮނަރަބަލް ޙަސަން ރަޝީދެވެ.
މި ރަސްމިއްޔާތުގައި، ދިފާޢީ އަދި ވަޠަނީ ޚިދުމަތާބެހޭ ވަޒީރު، އޮނަރަބަލް ޙަސަން ރަޝީދު، ދިވެހި ވަޠަނީ ޚިދުމަތުގެ ފަންނީ ތަމްރީންގެ ދެވަނަ ޕްރޮގްރާމް ފުރިހަމަކުރެއްވި ދަރިވަރުންނާ މުޚާޠަބުކުރައްވައި ވާހަކަފުޅު ދެއްކެވިއެވެ. އަދި، އެމަނިކުފާނު ވަނީ އެ ތަމްރީނުން ދަސްވެނިވި ދަރިވަރުންނަށް ސަނަދު ހަވާލުކޮށްދެއްވާފައެވެ.
މި ރަސްމިއްޔާތުގައި، ކޯސް ހިނގައިދިޔަ ގޮތުގެ ރިމާކްސް ދެއްވައި، ދިވެހި ވަޠަނީ ޚިދުމަތުގެ ފަންނީ ތަމްރީންގެ ދެވަނަ ޕްރޮގްރާމްގެ ދަރިވަރުންނަށް އަޒުމް އައުކޮށްދެއްވީ، އެމްއެންޑީއެފް ސަރވިސް ކޯރގެ، ސްކޫލު އޮފް އިންޖިނިއަރިންގ އެންޑް ލޮޖިސްޓިކްސްގެ ކޮމާންޑިންގ އޮފިސަރ، މޭޖަރ ޙުސައިން ޝާހިދުއެވެ.
މި ރަސްމިއްޔާތުގައި، ދިވެހި ވަޠަނީ ޚިދުމަތުގެ ފަންނީ ތަމްރީންގެ ދެވަނަ ޕްރޮގްރާމުން ދަސްވެނިވި ދަރިވަރެއްގެ ޝުޢޫރު ފާޅުކުރުން އޮތެވެ. ދަރިވަރުންގެ ފަރާތުން ޝުޢޫރު ފާޅުކޮށްދެއްވީ، ކެޑޭޓް މުޖާހިދު ބިން ޢަބްދުﷲ އެވެ.
2026 ޖޫން 3އިން 2026 އޮކްޓޫބަރު 3އަށް ކުރިއަށްގެންދިޔަ މި ތަމްރީނު ޕްރޮގްރާމުން ރާއްޖޭގެ 16 އަތޮޅެއްގެ 45 ރަށަކަށް ނިސްބަތްވާ 73 ދަރިވަރުން ދަސްވެނިވެފައި ވެއެވެ. އެއީ 13 އަންހެން ދަރިވަރުންނާއި 60 ފިރިހެން ދަރިވަރުންނެވެ.
16 ހަފުތާގެ މުއްދަތަށް ކުރިއަށްގެންދިޔަ މި ފަންނީ ތަމްރީން ޕްރޮގްރާމުގެ ތަފާތު 6 ކޯހެއްގައި ބައިވެރިވި 75 ބައިވެރިންގެ ތެރެއިން 73 ބައިވެރިން ދަސްވެނިވިއިރު، އޭގެ ތެރެއިން 66 ބައިވެރިން ވަނީ މޯލްޑިވްސް ކޮލިފިކޭޝަން އޮތޯރިޓީ އެޕްރޫވްޑް، ލެވެލް 3ގެ ސެޓިފިކެޓް ހާސިލުކޮށްފައެވެ.
މި ޕްރޮގްރާމްގައި ހިންގި ސެޓްފިކެޓް ލެވެލް 3ގެ ކޯސްތަކުގެ ތެރޭގައި އޮޓޯ މޯބައިލް އިންޖިނިއަރިންގއާއި، މެރިން އިންޖިނިއަރިންގއާއި، އިލެކްޓްރީޝަންއާއި، ރެފްރިޖެރޭޝަން އެންޑް އެއަރކޮންޑީޝަނިންއާއި، ވެލްޑިންގ އެންޑް މެޓަލް ފެބްރިކޭޝަން އަދި އޮފީސް މެނޭޖުމަންޓް ހިމެނެއެވެ.
މި ކޯސްތަކުގައި ކިޔަވައިދިނުމުގައި ތަފާތު ޓީޗިންގ ސްޓްރެޖީތައް ބޭނުންކޮށްފައި ވެއެވެ. މިގޮތުން ކްލާސްރޫމް ލެކްޗަރތަކާއި، ސްޓޫޑެންޓް ލެޑް ކްލާސްތަކާއި، ޕްރެކްޓިކަލް ކްލާސްތަކާއި، އެސައިންޓްމަންޓްތަކާއި، އަދި ޢަމަލީ މައިދާނުގައި މަސައްކަތްކުރުމަށް އިންޑަސްޓްރީ ޕްލޭސްމަންޓް ކުރިއަށްގެންދެވިފައި ވެއެވެ. މި ޕްރޮގްރާމްގައި ކިޔަވައިދެއްވީ ފަންނީ ތަފާތު ދާއިރާތަކުގައި ގިނަ ދުވަހު ޢަމަލީ މަސައްކަތް ކުރައްވާފައިވާ ސިފައިންގެ ތަޖުރިބާކާރު އިންސްޓްރަކްޓަރުންނެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއާއި، ދިފާޢީ އަދި ވަޠަނީ ޚިދުމަތާބެހޭ ވުޒާރާގެ ސްޓޭޓް މިނިސްޓަރ، އަލްފާޟިލާ އައިޝަތު ސަފޫރާ، ދިފާޢީ އަދި ވަޠަނީ ޚިދުމަތާބެހޭ ވުޒާރާގެ ޑެޕިއުޓީ މިނިސްޓަރ، އަލްފާޟިލާ ފާތިމަތު މިޒުނާ، އެމްއެންޑީއެފްގެ ޖެނެރަލް އޮފިސަރުން އަދި ދަރިވަރުންގެ ޢާއިލާތަކުން ބައިވެރިވެވަޑައިގެންނެވިއެވެ.
