އަމީނީ މަގު މަރާމާތުކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރަމުންއަންނަ މަސައްކަތުގެ ތެރެއިން ސެގްމަންޓް-1 މަރާމާތުކޮށް ނިންމައި އާންމު ދަތުރުތުފަތުރަށް ހުޅުވާލައިފި އެވެ.
އެމްޓީސީސީ އިން ބުނީ އަމީނީ މަގު މަރާމާތުކުރުމަށް އެކުންފުނިން ކުރަމުން އަންނަ މަސައްކަތުގެ ތެރޭގައި ހިމެނޭ ކުރީގެ ހައުސިންގ މިނިސްޓްރީ އިން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ބައި މަރާމާތުކޮސް ނިންމައި އާންމު ދަތުރުފަތުރަށް މިހާރު ހުޅުވާލާފައިވާ ކަމަށެވެ.
ކުރީގެ ރައީސް ސޯލިހުގެ ވެރިކަމުގައި ބޮޑު ހޭދައެއް ކޮށްގެން ތާރުއަޅައި ތަރައްގީކޮށްފައިވާ އަމީނީ މަގުގެ ހުޅަނގު ކޮޅުގެ ބޮޑު ސަރަހައްދެއް ހަލާކުވެ އެއްގަމު އުޅަނދު ފދުއްވުމަށް ހުރަސްއެޅިފައިވާތީ އަމީނީމަގު މަރާމާތުގެ މަސައްކަތް އެމްޓީސީސީ އާއި ހަވާލުކުރީ މި އަހަރުގެ ޖޫން މަހުގެ 15 ވަނަ ދުވަހުއެވެ.
އެގޮތުން އެ ކުންފުނިން މިހާރު މަސައްކަތް ނިންމާފައިވާ 2794.062 އަކަމީޓަރުގެ ސަރަހައްދެއްގައި ވަނީ ސަބްގްރޭޑް، ސަބްބޭސް އަދި އޭބީސީ އަޅައި އަލުން ތާރު އަޅާފައެވެ. އަދި ސެގްމަންޓް 2 ގެ ދަށުން 133.64 އަކަމީޓަރުގެ ސަރަހައްދެއްގެ ތާރު ނެގުމަށްފަހު އަލުން އޭބީސީއާއި ތާރު ވަނީ އަޅާފައެވެ.
އަމީނީ މަގުގެ ސެގްމަންޓް 1 އަދި 2 ގެ މަސައްކަތް ނިންމައި އާންމުންނަށް ހުޅުވާލައިފި
ޕްރެސް ރިލީޒް:
https://t.co/FGVXt7Cz2t https://t.co/0anKSLEvDy— MTCC Plc (@MTCCPlc) October 3, 2026
އަދި މި މަސައްކަތުގެ ތެރޭގައި އެކުންފުނިން މިހާރު ކުރަމުންއަންނަނީ ސެގްމަންޓް 3 ގެ މަސައްކަތެވެ. އެ ސެގްމަންޓްގައި ހިމެނެނީ އިއްޒުއްދީން މަގާ ހަމައިން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަހައްދެވެ. އެގޮތުން މި ސެގްމަންޓްގެ 1924.77 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނަގައި އަލުން އޭބީސީއާއި ތާރު އެޅުމުގެ އިތުރުން މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށްދާނެ ކަމަށް އެކުންފުނިން ބުނެއެވެ.
އަދި ކޯރުކެނޑި ހިނގުމުން ފެށިގެން ޣިޔާސުއްދީން އިންޓަރނޭޝަނަލް ސްކޫލާ ހަމައަށް ހިމެނޭ ސެގްމަންޓް 4 ގެ ދަށުން 1148.91 އަކަމީޓަރުގެ ސަރަހައްދުގަ އަޅާފައިވާ ތާރު ނަގައި އަލުން އޭބީސީއާއި ތާރު އަޅައި، މަގުމަތީގެ ނިޝާންތައް ކުރަހާނެ ކަމަށްވެސް އެކުންފުނިން ބުނެއެވެ.
