"ދިވެހި މުވައްޒަފުންނަށް ޓޫރިޒަމް ދާއިރާއިން ކުރިއަށް ދިއުމަށް އޮތް އެންމެ ބޮޑު ގޮންޖެހުމަކީ ހަމަހަމަކަން ނެތުން"

އޭނާގެ ހިތް އޮތީ ދިވެހި ޓޫރިޒަމާ ގުޅިލާމެހިފައެވެ. އެކި ރިސޯޓްތަކުގައި މުހިއްމު އެތައް މަގާމެއް ފުރިހަމަ ކުރުމަށް ފަހު މިހާރު ހުސައިން ޝާހިދު ހުރީ އެގްޒެކެޓިވް އެސިސްޓަންޓް މެނޭޖަރ، ހޮލިޑޭ އިން ރިސޯރޓް ކަނޑޫމާ މޯލްޑިވްސް ގައެވެ. އާއިލާއެއް ފެށުމަށް ފަހު ސަރުކާރުގެ ވަޒީފާއިން ލިބޭ އާމްދަނީން ދެކޮޅު ނުޖެއްސޭތީ، ޓޫރިޒަމް ދާއިރާގައި މަސައްކަތްކުރަން ނިންމި ޝާހިދު މިހާރު ޓޫރިޒަމް ދާއިރާގެ ޚިދުމަތަށް 21 އަހަރުވީއެވެ. އަދިވެސް އޭނާގެ ޚިދުމަތުގެ ދުވަސްތައް އޮތީ ކުރިއަށެވެ. ތިރީގައި މި ހިމަނާލަނީ ޝާހިދު އިރުވަރު ނޫހަށް ދީފައިވާ އެކްސްކްލޫސިވް އިންޓަވިއުއެކެވެ؛ ތަފާތު ވާހަކަ ތަކެކެވެ. ތަފާތު ތަޖުރިބާތަކެކެވެ.

———————————–

ކުރު ތައާރަފެއް

ފުރިހަމަ ނަމާއި އެޑްރެސް: ހުސައިން ޝާހިދު

އުފަން ރަށް: ކ. މާލެ

މިހާރު އަދާކުރާ ވަޒީފާ: އެގްޒެކެޓިވް އެސިސްޓަންޓް މެނޭޖަރ، ހޮލިޑޭ އިން ރިސޯރޓް ކަނޑޫމާ މޯލްޑިވްސް

މިހާތަނަށް ޓޫރިޒަމް ދާއިރާގައި އަދާކުރި ވަޒީފާތައް:

މާލެ އޮފީސް މެނޭޖަރ، ސޮނެވާފުށި ރިސޯރޓް އެންޑް ސްޕާ

އެގްޒެކެޓިވް ސެކްރެޓަރީ، ސޮނެވާގިލި ރިސޯރޓް އެންޑް ސްޕާ

އެސިސްޓަންޓް ހިއުމަން ރިސޯސަސް މެނޭޖަރ، ސޮނެވާގިލި ރިސޯރޓް އެންޑް ސްޕާ (ސޮނެވާގިލި ބައި ސިކްސް ސެންސަސް)

ޓްރެއިނިންގ މެނޭޖަރ، ސޮނެވާގިލި ބައި ސިކްސް ސެންސަސް

ޓްރެއިނިންގ މެނޭޖަރ، ސިންސް ސެންސަސް ޒިގީ ބޭ، މުސަންދަމް، އޮމާން

އެސިސްޓަންޓް ޑިރެކްޓަރ އޮފް ހިއުމަން ރިސޯސަސް، ޝަންގްރިލާސް، ވިލިނގިލި ރިސޯރޓް އެންޑް ސްޕާ

ޑިރެކްޓަރ އޮފް ހިއުމަން ރިސޯސަސް، ހޮލިޑޭ އިން ރިސޯރޓް ކަނޑޫމާ މޯލްޑިވްސް

އެގްޒެކެޓިވް އެސިސްޓަންޓް މެނޭޖަރ، ހޮލިޑޭ އިން ރިސޯރޓް ކަނޑޫމާ މޯލްޑިވްސް

—————————————————————

އިރުވަރު: މި ދާއިރާއިން ތަމްރީނު ހޯދީ ކޮން ތަންތާކުން؟

ޝާހިދު: ވަކި ޙާއްސަ ތަނަކުން ތަމްރީނެއް ނުހޯދަން. އެކަމަކު، އެވަގުތެއްގައި އުޅޭ ރިސޯރޓަކުން ރާވާހިންގާ ކުރު ކޯސްތަކާއި ތަމްރީނުތައް ވަރަށް ގިނައިން ހެދިފައިވާނެ. އަދި އެކުންފުނިތަކުން ފޮނުވައިގެން ބޭރުގެ އެކި ގައުމުތަކުގައި ވޯކްޝޮޕްތަކުގައި ބައިވެރިވެފައިވާނެ. މީގެއިތުރުން އޮންލައިންކޮށް އެމްބީއޭއަށް ކިޔެވިން އެއީ ގްލިއޮން އިންސްޓިޓިއުޓްއިން އޮފް ހައިޔާ އެޑިއުކޭޝަންއިން ހިންގާ އެމްބީއޭ ޕްރޮގްރާމްއެއް ކަމަށްވާ އިންޓަރނޭޝަނަލް ހޮސްޕިޓާލިޓީ މެނޭޖްމަންޓް ސަރވިސަސް އެޑްމިނިސްޓްރޭޝަން.

ޓޫރިޒަމް ދާއިރާއަށް ވަދެވުނީ ކިހިނެއް؟

އޭލެވެލް ނިންމުމަށްފަހުވަނީ ސަރުކާރަށް، އަދި 8 އަހަރާއި ބައިވަންދެން އުޅުމަށް ފަހު ޢާއިލާއެއް ފެށުމުން ސަރުކާރުން އެއިރު ލިބޭ މުސާރައިން ދެކޮޅު ނުޖެހޭތީވެ، ބެލީ ދެން އެންމެ ރަނގަޅު މުސާރައެއް ލިބޭ ދާއިރާ އަކީ ކޮބައިތޯ. އެގޮތުން ޓުއަރިޒަމްދާއިރާ ޙިޔާރުކުރީ. އޭގެ ކުރިން ވެސް ރިސޯޓުތަކަށް ދެވިފައި ހުރީ. އެހެންވެ ވަރަށް ފަސޭހައިން ފުރުސަތު ލިބުނީމާ ބޭނުންކުރީ.

މަސައްކަތުގައި އެންމެ ދެކެން ބޭނުންވާ ދުވަހަކީ ކޮބާ؟

ދިވެހިން ރާއްޖޭގެ އެކި ފެންވަރުގެ ގިނަ ރިސޯރޓުތަކުގެ ޖެނެރަލް މެނޭޖަރ ފަދަ މަތީ ވަޒީފާގައި އުޅޭ ތަން ބަލަން އެންމެ ބޭނުން ވަނީ. އަދި މުޅި އިންޑަސްޓްރީ އެކިއެކި ދާއިރާއިން އިންސްޓިޓިއުޝަލަނަލައިޒްވާތަން ވަރަށް ބޮޑަށް ދެކެން ބޭނުންވޭ.

ކޮވިޑްގެ ތަޖުރިބާއިން ދަސްވީ ކޮން ފިލާވަޅެއް؟

ވަރަށް ގިނަ އެތައް ފިލާވަޅެއް ދަސްވި. އޭގެ ތެރެއިން ފާހަގަކޮށްލަން ބޭނުންވާ ދެތިން ކަމެއް އެބައޮތް. އެއްމެ މުހިއްމު ކަމެއްގެ ގޮތުގައި ފާހަގަ ކޮށްލާނީ މަދު އަދަދެއްގެ މުވައްޒަފުން ގޮވައިގެން މަސައްކަތް ކުރުން. އެއީ ރިސޯރޓުގައި މިހާރު މިކުރަނީ މަލްޓި ޓާސްކިންގ. މާނަ އަކީ އެކަކަށް ގިނަ ބާވަތުގެ މަސައްކަތް ކުރުމަށް ތަމްރީނު ދީގެން ރިސޯރޓެއް ހިންގުން. އެހެން ވުމުން މިހާރު މަސައްކަތް ވަރަށް ބުރަވާނެ. މިއީ މި ހާލަތަށް ފެއްޓުމަށްޓަކައި ވަރަށް މުހިއްމު ކަމެއް. މިކަމަކީ ގިނަ ފަހަރު ކިޔަވާ ފޮތްތަކުން ނޫނީ ނުފެނި ނުވަތަ ނުކުރެވި އޮތް ކަމެއް. އަނެއް ކަމަކީ މާސްކްއަޅައިގެން ހިނިތުންވެލާތަން ނުފެނި މަސައްކަތްކުރުމަށް މުވައްޒަފުން ތައްޔާރުކުރުން. ދެން ފާހަގަކޮއްލާނީ މުޅި ޓީމާއެކު މެނޭޖަރުންވެސް އެއްފެންވަރެއްގައި މަސައްކަތް ކުރަން ޖެހޭކަން. މިހެން ވުމުން މުވައްޒަފުންނާއި މެނޭޖަރުންނާ އޮންނަ ގުޅުން ވަރަށް ގާތްވޭ.

އިސްވެރިއެއްގެ ހައިސިއްޔަތުން މުވައްޒަފުންނާމެދު ދެކެނީ ކޮން ގޮތަކަށް؟

މުވައްޒަފުންނަކީ އެންމެ މުހިންމު ބަޔަކީ. އަޅުގަނޑު ގަބޫލުކުރާ ގޮތުގައި ހައިރާކީ (އެންމެ މަތީގައި ވެރިޔާ ދެން ތިބި މުވައްޒަފުން އެކި ލެވެލްގައި ތިރީގައި) މިހާރު އޮންނަން ވާނީ މުވައްޒަފުން އެންމެމަތީގައި އަދީ ޖީއެމް ނުވަތަ އެންމެ އިސްމީހާ އެންމެ ތިރީގައި – މިފަލްސަފާގައި އަޅުގަނޑު މަސައްކަތް ކުރަނީ. ވެރިން ތިބެން ވާނީ މުވައްޒަފުންނަށް އެމީހުންގެ މަސައްކަތްތަކަށް ބޭނުންވާ ތަކެއްޗާއި ބޭނުންވާ އެހީތެރިކަން ފޯރުކޮށްދިނުމަށްޓަކައި އަދި އެކި ކަންތައްތަކުގައި ލަފާދީ އެމީހުން ދައްކާ ވާހަކަ އަޑުއަހައި އޮޕަރޭޝަންގައި ދިމާވާ ދަތި އުނދަގޫ ކަންތައްތައް ހައްލު ކޮށްދިނުމުގައި.

ޓޫރިޒަމް ދާއިރާއިން މުވައްޒަފުންގެ އަގު އެންމެ އެދެވޭ ގޮތުގައި ވަޒަން ކުރޭތޯ؟

މުޅިޖުމްލަކޮށް ދަންނަވާނަމަ ދެންނެވޭނީ ނޫނެކޭ. ނަމަވެސް އެކިއެކި ބްރޭންޑްތަކުގެ ރިސޯރޓްތައް އެބައުޅޭ ވަރަށް ރަނގަޅަށް މުވައްޒަފުންގެ އަގު ވަޒަންކުރާ އަދި މުވައްޒަފުން ބިނާކޮށް ކުރިއަރުވާ. އޭގެ ތެރޭގައި ދިވެހި ކުންފުނިތަކާއި ބޭރުގެ ކުންފުނިތައް ހިމެނޭ. އިންޑަސްޓްރީގައި މި ވަގުތު ނެތް އެންމެ މުހިންމު އެއް ކަމަކީ ނުވަތަ ސިފަ އަކީ މިއީ. އެކި ކުންފުނި އެކި ގޮތްގޮތައް ހިންގަން މިހާރު މައްސަލައެއް ނެތް އެއީ މިކަންކަން އިންސްޓިޓިއުޝަނަލައިޒް (ޤާނޫނާއި ޤަވާޢިދު ހަދާހިންގާނެ ފަރާތް) ނުވެ އޮތުމުން. މިޕޮއިންޓްގައި ދެން ފާހަގަކޮށްލަން ބޭނުންވަނީ އެކި ކުންފުނިތަކުން މުވައްޒަފުންނަށްދޭ މުސާރައާއި އިނާޔަތްތަކުގެ ބޮޑު ފަރަގު އަދި ބައެއް ފަރާތްތަކުން ބޭރު މީހުންނާއި ދިވެހިންނާއި ދެމެދު ގެންގުޅޭ ތަފާތު ކުރުންތައް. މިކަހަލަ ކަންތައްތައް ހުރުމުން މުވައްޒަފުންގެ އަގު އެންމެ ރަނގަޅަށް ވަޒަނެއް ނުކުރެވޭނެ.

ޓޫރިޒަމް ދާއިރާއަށް އަލަން ވަންނަން ބޭނުންވާ ކުދިންނަށް  ބުނެލަން ބޭނުންވަނީ ކީކޭ؟

މިއީ ވަރަށް ރަނގަޅު ކެރިއަރ އެއް ބިނާކުރެވޭނެ ދާއިރާއެއް. އެންމެ މުހިންމު އެއް ކަމަކީ އެކުރާ ކަމެއްގައި ދެމިތިބުން. ކުއްލި ބަދަލު ނުގެނެސް އެއް ރިސޯރޓުން އަނެއް ރިސޯރޓަށް ބަދަލުވާއިރު ޖުމްލަ މުއްދަތު ރާވައިގެން ކުރުން. ދެމަސް، ތިންމަހުގެ މުއްދަތުތަކެއް އެކުއްޖެއްގެ ސީވީގައި ނުހުންނާނެގޮތަށް ކަންކަން ރޭވުން. މީގެއިތުރުން ހަމައެކަނި ކިޔަވައިގެން ނުވަތަ ހަމައެކަނި ތަޖުރިބާއިން ކުރިއަށް ނުގޮސް، ދެބައިވެސް އެކުއެކީގައި މަތީފެންވަރަށް ދެވޭއިރު ހުންނާނެގޮތަށް ކެރިއަރ ބައްޓަންކުރުން. އަދި އަބަދުވެސް ވީހާވެސް ޕްރޮފެޝަނަލްކޮށް މަސައްކަތް ކުރަން އުޅުން. އެއީ ބޭރު މީހުންނާއި ދިވެހިންނާއި ތަފާތު ފެންނަ ކަންކަމުގެ ތެރޭގައި މިކަން ހިމެނޭތީ ލިސްޓްކޮއްލީ.

ބޭރުގެ މެނޭޖުމަންޓާއެކު މަސައްކަތްކުރުމުގެ މަންފާއަކީ ކޮބާ؟

ކުރީސުވާލުގަ ދަންނަވާލިހެން ބޭރުކުންފުނިތަކުގައި އެންމެ މުހިންމުކޮށް ދަސްވާ އެއްކަމަކީ ޕްރޮފެޝަނަލިޒްމް. މީގެ ދުވަސްތަކެއް ކުރިން ބައެއް ބޭރު ކުންފުނިތަކުގެ މުސާރަ ދިވެހި ކުންފުނިތަކަށްވުރެ ރަނގަޅު އަދި ބޭރު ކުންފުނިތަކުގައި ދުވަހަކުވެސް މުސާރަނުދީ ކުންފުނީގެ އެހެން ޙަރަދު ތަކެއް ނުކުރާނެ. މީގެ އިތުރުން ބޭރުގެ ކުންފުނި ތަކުގައި އެބައެއްގެ އެހެން ހޮޓާ ރިސޯރޓުތަކުގައި މަސައްކަތްކުރުމުގެ މަންފާ ވަރަށް ގިނަ އަދި އަޅުގަނޑުވާނީ އެފުރުސަތުތަކުގެ ބޭނުން ވަރަށް ރަނގަޅަށް ހިފާފައި.

ޝާހިދުގެ ޚިދުމަތުގެ އަގު ވަޒަންކުރޭތޯ؟

ވަރަށްބޮޑަށް. އަޅުގަނޑު އުޅުނު ތިން (ބޭރުގެ ކުންފުނިތައް) ކުންފުނިންވެސް އެކަން ފެނި އެކަމުގެ ޝުކުރު އަބަދުވެސް އަދާކުރަން.

ކޮވިޑުގެ ތަޖުރިބާއިން ޓޫރިޒަމް ދާއިރާއަށް ގެންނަން ފެންނަނީ ކޮން ކަހަލަ ބަދަލުތަކެއް؟

ދިވެހިން ވިޔަސް އަދި ބޭރު މީހަކު ވިޔަސް ކުއްލިއަކަށް އިންޑަސްޓްރީއަށް ދިމާވާ ލޮޅުމަކުން ނޫނީ ވިޔަފާރިއަށް ދިމާވާ ނޭދެވޭ ކަމަކާ ގުޅިގެން މުސާރަ ނުދީ ފޮނުވާ ނުލެވޭނެ ގޮތް ހެދުން ނޫނީ ކޮންމެވެސް އުސޫލެއްގެ ދަށުން މެނުވީ މިގޮތަށް ނުކުރެވޭނެ ގޮތް ހެދުން. މިއީ ކޮވިޑާހެދި ދިމާވި އެންމެ ދެރަވި އެއްކަމަކީ. ދާއިމީ ވަޒީފާގައި އެތައް ދުވަހެއް ވެފައިވާ މުވައްޒަފުން މިގޮތަށް ދޫކޮށްލުމުން އިންޑަސްޓްރީއާ މެދު ވަރަށް ނޭދެވޭ ގޮތްގޮތައް ވާހަކަ ދެކެވި އަގު ވެއްޓޭ ގޮތްވި. މުޅި އިންޑަސްޓްރީން މިހާރު އެބަޖެހޭ ވަރަށް ބުރަކޮށް މަސައްކަތްކޮށްގެން މިދެންނެވި ގޮތަށް ކަންކަން ނުވާނެހެން އިންސްޓިޓިއުޓްތަކާއި، ކުންފުނިތައް ގުޅިގެން މަސައްކަތްތަކެއް ކުރަން. މީގެއިތުރުން ރިސޯރޓުތަކުގައި މަސައްކަތްކުރާ މީހުންގެ އަޑު ކޮވިޑްގެ ކަންކަމުގައި ވަރަށް މަޑު. މިހެން ނުވާނެ ގޮތަކަށް ކަންކަންރާވާ ހިންގުން ވަރަށް މުހިންމު. ތިންވަނަ ކަމަކަށް ދަންނަވާނީ މުޅި އިންޑަސްޓްރީ މިހާލަތަށް ދިޔައިރު މުޅި އިންޑަސްޓްރީ އެކަތިގަނޑަކަށް މަސައްކަތް ކުރި ތަނެއް ނުފެނުނު. އެސޯސިއޭޝަންއެއް އޮވޭތޯ ސުވާލުއުފެދޭ.

އާއިލާއަށް އެކަށީގެންވާ ވަގުތު ދެވޭތޯ؟

އަސްލު ނުދެވޭ އިނގޭތޯ. މާލެކައިރީ ރިސޯރޓެއްގައި އުޅެން ފުރުސަތެއް ހޯދީވެސް ހަމަމިހެންވެ.

ދިވެހި މުވައްޒަފުންނަށް ޓޫރިޒަމް ދާއިރާއިން ކުރިއަށް ދިއުމަށް ހުރި ގޮން ޖެހުންތަކަކީ ކޮބާ؟

ހަމަހަމަކަން ނެތުން. މަތީގައިވެސް ކޮންމެވެސް ވަރަކަށްވާނީ މިކަމަށް އިޝާރާތްކޮށްލާފަ. އަޅުގަނޑުމެންގެ އިންސްޓިޓިއުޓްތައް އެބަޖެހޭ ވަރަށް ރަނގަޅަށް މިކަމަށް ތައްޔާރުވާން. އެއީ ހަމައެކަނި، ގާނޫނީ ކަމެއްނޫން. މީގައި ވަރަށްތިރިން ފެށިގެން އެންމެ މަތީ ލެވެލްގައިވެސް ރަނގަޅު ކުރަން ހުރި ކަންކަން ވަރަށް ގިނަ. ދިވެހިންނަށް ވަޒީފާ ލިބޭތޯ، ކިހާވަރަކަށްތޯ ދިވެހިންހޯދުމަށް ކުންފުނިތަކުން މަސައްކަތް ކުރަނީ. ކިހާވަރަކަށްތޯ ދިހެހިންނަށް ކުރިއަށްދިއުމުގެ މަގުފަހިކޮށްދެނީ. ރާއްޖޭގަ އެބަހުރި 30އަހަރަށްވުރެ ގިނަ ދުވަހުހިންގާފަހުރި ރިސޯރޓުތައް، އެތަންތާނގަ މަތީފެންވަރުގެ ވަޒީފާތަކުގައި ދިވެހިންނެތީ ކީއްވެތޯ. މީހައްތަހާވެސް ދިވެހިންނަށް ހުރިގޮންޖެހުންތައް ހުރުމުން ކަންހިނގާގޮތް. އަދި މޮނިޓަރިންގއާ ގުޅިފައިވާ އެންމެ އެކަށޭނަޖަވާބު ނުލިބިވާކަންތައްތައް. ކަންމިހެންއޮތުމުން މޮނިޓަރިންގގެ ބަޔަކީ އަދި މިޔަށްވުރެ މާމުހިންމު ބައެއް. ގާނޫނު އަދި ގަވާޢިދު ހެދިފައި ހުއްޓަސް ބައެއް ރިސޯރޓުތަކުން ކުރަނީ އެބަޔަކަށް އެވަގުތަކަށް ފެންނަ ރަނގަޅުގޮތަށް އަދި އެކިފެންވަރުގައި. މިކަން މިގޮތަށްވާން ދޫކޮށްލާފައި އޮންނަހާ ހިނދަކު މުޅި އިންޑަސްޓްރީގައި ދިވެހިން ކުރިއަކަށް ނުދާނެ އަދި ގޮންޖެހުންތައް މަދެއްނުވާނެ. އަބަދުވެސް ކުދި ޝަކުވާ އަޑު އިވޭނެ. އެބަ ފެނޭ އެކި ފަހަރު މަތިން އެކި ސަރުކާރުގަ ވަރަށް ރަނގަޅު ކަންކަންވެސް ފަށާތަން. ނަމަވެސް މިދެންނެވި މޮނިޓަރިންގގެ ބައި ފުރިހަމަ ނުކުރެވޭތީ ހީވަނީ އިންޑަސްޓްރީ ކުރިއަށް ނުދާހެން. ދެން އޮތީ އަދި މާބޮޑު ކަމެއް. އަޅުގަނޑުމެން މިއުޅެނީ އިންޑަސްޓްރީއަށް ފަންސާސް އަހަރު ފުރުން ފާހަގަ ކުރަން، އެހެންނަމަވެސް ހިތާމައަކީ ދިވެހިން ބިނާ ކުރަން އަދިވެސް ވަށާޖެހޭ އެކެޑަމިކް ކަރިކިއުލަމެއް ނެތް ނުވަތަ އެންމެ ދަށުން ފެށިގެން މަތީ ތައުލީމާ ހިސާބަށް އެތައް ކަމެއް އަދި ނުވެ އެބަހުރި. ސްކޫލް ނިންމާ ކުދިން ގިނަ ނަމަވެސް އަދިވެސް ރިސޯރޓެއްގައި ކުރަނީ ކޮން ކަމެއްކަން ވެސް ނޭގޭ ކުދިން ވަރަށް ގިނަ. ގިނަ މުވައްޒަފުން އަދިވެސް ރިސޯރޓަކަށް ވަންނަ އިރު އެ ހޭލުންތެރި ކަމެއް ނެތް. މިއާ ޙިލާފަށް ބޭރުގެ އެކި ގައުމުތަކުގަ ވަރަށް ޙާއްސަ އިންސްޓިޓިއުޓްތައް އެބަހުރި އެތަންތަނުން ކިޔަވައިގެން ނުކުންނައިރު ކޮންމެ ބްރޭންޑެއްގައިވެސް މަސައްކަތްކުރެވިދާނެ ފެންވަރުގެ. އަދި ސްކޫލް ދައުރުގައިވެސް ހޮޓާތަކަށް ގެންގޮސް އެތަންތަން ހިނގާގޮތް ދައްކައިދީ ހަދާ. ރާއްޖޭގައި ވެސް މިކަންކަން ކޮންމެވެސް ފެންވަރެއްގައި އެބަ ހިނގާ، ނަމަވެސް އެއްވެސް ހަރުދަނާ އުސޫލެއްގެ ދަށަކުންނޫން. މީގެ އަނެއްކޮޅަކީ މައިންބަފައިންގެ ހޭލުންތެރިކަން ދައްވުން ނުވަތަ ނެތުން(ރިސޯރޓުތަކުގެ މަސައްކަތު މާހައުލާމެދު). އަޅުގަނޑުމެންގެ ރައްތައް ހުންނަގޮތުން ދިމާވާ ދަތިތައް ވަރަށް ގިނަ އެހެންނަމަވެސް އެކަންކަން ހައްލުކޮށް ކޮންމެވެސް އުސޫލުތަކެއް ހެދި އެއަށް ޢަމަލުކުރެވޭނެހާ ދުވަސްވެއްޖެކަމަށް އަޅުގަނޑު ގަބޫލުކުރަނީ.

ޓޫރިޒަމްގެ ސިޔާސަތަށް ގެންނަން ފެންނަ ބަދަލު ތަކަކީ ކޮބާ؟

ޓޫރިޒަމް ދާއިރާގެ ކުރިއެރުން އޮތީ ގައުމުގެ ކުރިއެރުމާ ގުޅިލާމެހުން. މިދެންނެވީ ހުރިހާ ކަމެއްވެސް ގުޅެންވީ އިންޑަސްޓްރީއާ. އެއީ މީހުން ބިނާކުރުމާ ހިސާބުން ފަށައިގެން ފައިސާއާ ބެހޭ ކަންތައްތަކާއި، އުމްރާނީ ތަރައްގީއާއި، މިއިންޑަސްޓްރީ ކުރިއަރުވަން ހެދިފައިވާ އެސޯސިއޭޝަން މިހާރަށް ވުރެ މާބޮޑަށް އެކްޓިވްވުމާއި، އެންޖީއޯއިން(އެމް.އޭ.އެޗް.އާރ.ޕީ، އެޗް.އާރ.މޯލްޑިވްސް ފަދަ)ގެ ދައުރު ފުޅާކުރުމާއި، ގައުމުގެ ކުރު އަދި ދިގުރާސްތާގެ މާސްޓާރ ޕްލޭންގައި މިހާރަށްވުރެ އިންޑަސްޓްރީ ބައިވެރުކުރުން. މިކަހަލަ ހުރިހާ ކަމެއްގައި ޓުއަރިޒަމް އިންޑަސްޓްރީއާ ގުޅެންވީ. މީގެއިތުރުން ގާނޫނު ހަދާ މީހުން އެއީ އިންޑަސްޓްރީ ހިންގާ މީހުންކަމުގައި ނުވުން. އެއީވެސް އަޅުގަނޑު ދެކޭގޮތުގައި އިންޑަސްޓްރީ ކުރިއަރަންވީ ހިސާބަށް ކުރި ނާރާއޮތް އެއް ސަބަބު. އަދި މިނިސްޓްރީ އޮފް ޓޫރިޒަމް އެބަޖެހޭ ވަރަށް ބޮޑަށް އިންޑަސްޓްރީއާ ގާތުން މަސައްކަތްކޮށް މިހާރަށްވުރެ ވަރަށް ބޮޑުތަން ފުޅާވާން އަދި ރަނގަޅު ތަމްރީނުތައް ދީ ރިސޯރޓު ހިނގާގޮތް އެތަނުގެ މުވައްޒަފުންނަށް ދަސްކޮއްދީގެން ރިސޯރޓުތަކާއި ގާތުން ހިންގުން.