ރާބިޠަތުލް ޢާލަމިލް އިސްލާމީގެ ސެކްރެޓަރީ ޖެނެރަލް ޝައިޚް ޑޮކްޓަރ މުޙައްމަދު ބިން ޢަބްދުލްކަރީމް އަލް ޢީސާއަށް ނިޝާން ކަލާފާނުގެ ޝަރަފުގެ ޢިއްޒަތް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަރުވައިފިއެވެ. މި ޢިއްޒަތް ރާބިޠަތުލް ޢާލަމިލް އިސްލާމީގެ ސެކްރެޓަރީ ޖެނެރަލަށް އެރުވީ، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްޞަ ރަސްމިއްޔާތެއްގައެވެ.
މި ޢިއްޒަތް އެމަނިކުފާނަށް އެރުވީ ދިވެހިރާއްޖެއާއި ރާބިޠަތުލް ޢާލަމިލް އިސްލާމީއާ ދެމެދު އުފެދިފައިވާ އިސްލާމީ އުޚުއްވަތްތެރިކަމުގެ ގުޅުން ބަދަހިކުރެއްވުމަށާއި، އިސްލާމީ ވަޙުދަތު ދެމެހެއްޓެވުމަށާއި، ދުނިޔޭގައި އަމާންކަމާއި ޞުލްޙަމަސަލަސްކަން ޤާއިމުކުރެއްވުމަށް، ރާބިޠަތުލް ޢާލަމިލް އިސްލާމީގެ ސެކްރެޓަރީ ޖެނެރަލް ހިޒް އެކްސަލަންސީ ޝައިޚް ޑޮކްޓަރ މުޙައްމަދު ބިން ޢަބްދުލްކަރީމް އަލް ޢީސާ ދެއްވާ ޚާއްޞަ އަހަންމިއްޔަތުކަމުގެ އަގު ވަޒަންކުރުމުގެ ގޮތުން ކަމަށް ރައީސުލްޖުމުހޫރިއްޔާގެ އޮފީހުން ހާމަކުރައްވާފައިވއެވެ.
ނިޝާން ކަލާފާނުގެ ޝަރަފުގެ ޢިއްޒަތް، ނިސްބަތް ވަނީ އައްސުލްޠާން އިބްރާހީމް ކަލާފާނަށެވެ. މިއީ މީލާދީން 1585ން ފެށިގެން 1609 އަށް ރާއްޖޭގައި ރަސްކަންކުރެއްވި ބޭފުޅެކެވެ.
ރާބިޠަތުލް ޢާލަމިލް އިސްލާމީގެ ސެކްރެޓަރީ ޖެނެރަލް، ހިޒް އެކްސަލަންސީ ޝައިޚް ޑޮކްޓަރ މުޙައްމަދު ބިން ޢަބްދުލްކަރީމް އަލް ޢީސާ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް އިޙްތިރާމުގެ ޒިޔާރަތެއް ކުރެއްވިއެވެ. މި ބައްދަލުކުރެއްވުން ކުރިއަށް ދިޔައީ ރައީސުލްޖުމްހޫރިއްޔާގެ އޮފީހުގައެވެ.
މި ބައްދަލުކުރެއްވުމުގައި ދެ ބޭފުޅުންވެސް ވަނީ ދިވެހިރާއްޖެއާއި ރާބިޠާއާ ދެމެދު އުފެދިފައިވާ ގާތް ގުޅުން ފާހަގަކުރައްވާ، އިސްލާމް ދީން ކުރިއެރުވުމަށާއި އިސްލާމް ދީނާމެދު ޣައިރު މުސްލިމުންގެ މެދުގައި އުފެދިފައިވާ ކުށްހީތައް ނައްތާލައި އިސްލާމް ދީނުގެ ސައްޙަ އަޤީދާ ހާމަކޮށްދިނުމުގައި ގުޅިގެން މަސައްކަތްކުރުމާ ބެހޭގޮތުން މަޝްވަރާކުރައްވައިފައެވެ.
ރައީސުލްޖުމްހޫރިއްޔާގެ ވާހަކަފުޅުގައި، ޝައިޚް ޑޮކްޓަރ މުޙައްމަދު ބިން ޢަބްދުލްކަރީމް އަލް ޢީސާގެ ހިންގުންތެރިކަމުގެ ދަށުން ރާބިޠަތުލް ޢާލަމިލް އިސްލާމީގެ މަސައްކަތްތައް ބައިނަލްއަޤްވާމީ މުޖްތަމަޢުން ބަލައިގެންފައިވާ ކަމަށާއި އިސްލާމް ދީން ކުރިއެރުވުމަށް ރާބިޠާއިން މުހިންމު މަސައްކަތްތަކެއް ކުރަމުންގެންދާކަމުގައި އެ މަނިކުފާނު ވިދާޅުވިއެވެ. އެ މަނިކުފާނު ވަނީ ދިވެހިރާއްޖޭގައި ދީނީ ގޮތުން ހައްދުފަހަނައަޅައިދިއުން ހުއްޓުވުމަށް ތަޢުލީމީ މަންހަޖުގެ ތެރޭގައި އިސްލާމީ ސައްޙަ އަޤީދާ ހިމެނުމާއި ދިވެހިންގެ މެދުގައި އިސްލާމީ އަޤީދާ އަށަގެންނެވުމަށްޓަކައި ދީނުގެ ކަންކަމުގެ ހަޤީގަތް އޮޅުންފިލުވަދިނުމުގައި ރާބިޠާގެ އެހީތެރިކަމަށް އެދިވަޑައިގެންފައެވެ.
ދިވެހިރާއްޖެއަށް ދަތުރުފުޅެއް ކުރެއްވުމަށް ރައީސުލްޖުމްހޫރިއްޔާ ދެއްވި ދައުވަތަށްޓަކައި ޝުކުރު އަދާކުރައްވާ، ރާބިޠާގެ ސެކްރެޓަރީ ޖެނެރަލް ދެއްކެވި ވާހަކަފުޅުގައި، ރައީސުލްޖުމްހޫރިއްޔާއަކީ އެ މަނިކުފާނުގެ ހިކުމަތުޢަމަލީގެ ސަބަބުން ބައިނަލްއަޤްވާމީ މުޖްތަމަޢުގައި ގަދަރު ލިބިވަޑައިގެންވާ ބޭފުޅެއް ކަމުގައި ވިދާޅުވިއެވެ. އެ މަނިކުފާނުގެ ވާހަކަފުޅުގައި، "ޗާޓަރ އޮފް މައްކާ" ގެ މައްޗަށް ފުޅާ ދާއިރާއެއްގައި ވާހަކަފުޅުދައްކަވާފައިވެއެވެ. އެ ގޮތުން އެ މަނިކުފާނުގެ ވާހަކަފުޅުގައި، މި ޗާޓަރަކީ އިސްލާމީ ދަންނަބޭކަލުންގެ ބޮޑު އާބާދީއެއް އެއަށް އެއްބަސްވެފައިވާ އެއްޗެއްކަމުގައި ވިދާޅުވިއެވެ. މި ޗާޓަރަކީ އިސްލާމް ދީނުގެ ސައްޙަ އަސާސްތައް ހިމެނޭހެން ދިރިއުޅުމަށް މަގުދައްކައިދޭ މުހިއްމު އެއްޗެކެވެ.
ދެ ބޭފުޅުންގެ ބައްދަލުވުން ނިންމަވާލައްވާފައިވަނީ ދިވެހިރާއްޖެއާއި ރާބިޠާއާ ދެމެދު އޮތް ގުޅުން އިތުރަށް ވަރުގަދަކޮށް އިސްލާމް ދީނުގެ ސައްޙަ އަޤީދާ ދެމެހެއްޓުމުގައި އެހީތެރިވުމުގެ ރޫޙު އާލާކުރައްވަމުންނެވެ.
