ވަގުތީގޮތުން ރައީސުލްޖުމްހޫރިއްޔާގެ ޒިންމާތަކުން ދުރުވެ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ނައިބު ރައީސް ފައިސަލް ނަސީމް އާއި ޒިންމާތައް ހަވާލުކުރަން ނިންމަވައިފިއިއެވެ.
ރައީސް ސޯލިހް ކުރެއްވި ޓްވީޓެއްގައި ވިދާޅުވީ ނައިބު ރައީސް ފައިސަލް ނަސީމް އާއި ރައީސުލްޖުމްހޫރިއްޔާގެ ޒިންމާތައް ހަވާލުކުރައްވަނީ މާދަމާ ހެނދުނު ކުރައްވާ ތައިރޮއިޑް އޮޕަރޭޝަނަކާއި ގުޅިގެން ކަމަށެވެ. ރައީސުލްޖުމްހޫރިއްޔާގެ ޒިންމާތައް ނައިބު ރައީސް އާއި ހަވާލުކުރާކަން ރައްޔިތުންގެ މަޖިލީހަށް އަންގަވާނެ ކަމަށް ވެސް ރައީސް ސޯލިހް ވިދާޅުވިއެވެ.
Following advice from my doctors, I’m scheduled to undergo surgery on my thyroid this morning. I will formally notify Speaker of @mvpeoplesmajlis and VP @FaisalNasym will temporarily assume my duties for the duration of my surgery. I look forward to returning to work shortly. IA.
— Ibrahim Mohamed Solih (@ibusolih) February 24, 2022
ރައީސް ސޯލިހް މިހާރު ހުންނެވީ ތައިރޮއިޑްގެ ފަރުވާއަކަށް ސިންގަޕޫރުގައެވެ.
ރައީސް ސޯލިހް މިރޭ ވިދާޅުވީ ފަރުވާއަށް ފަހު އެމަނިކުފާނު ވަރަށް އަވަހަށް އެނބުރި މަސައްކަތައް ނިކުމެވަޑައިގެންނެވޭނެ ކަމަށް އުއްމީދު ކުރައްވާ ކަމަށެވެ.
މިއީ ރާއްޖޭގެ ރައީސްއަކު ރައީސްގެ ޒިންމާތައް ވަގުތީގޮތުން ނައިބު ރައީސް އާއި ހަވާލު ކުރައްވާ ފުރަތަމަ ފަހަރެވެ. ނަމަވެސް ދުނިޔޭގެ އެހެން ގައުމުތަކުގައި މިއީ އާއްމު ކަމެކެވެ. ދާދިފަހުން އެމެރިކާގެ ރައީސް ޖޯ ބައިޑެން އެންޑަސްކޯޕީއެއް ހެދުމަށް ވެސް ނައިބު ރައީސް އާއި ވެރިކަން ހަތަރު ގަޑިއިރަށް ހަވާލުކުރިއެވެ.
