މިއަދު ފާހަގަ ކުރަމުންދާ ޝަހީދުންގެ ދުވަހުގެ ތަހުނިޔާ ރައީސުލްޖުމްހޫރިއްޔާ ދިވެހި ރައްޔިތުންނަށް ފޮނުއްވައިފިއެވެ.
ޝަހީދުންގެ ދުވަހުގެ ހެޔޮ އެދުމާއި ތަހުނިޔާ ދިވެހި ލޮބުވެތި ރައްޔިތުންނަށް އަރިސްކުރަން. އަދި، ޤައުމަށްޓަކައި ޝަހީދުވެ ގޮސްފައިވާ ޤައުމީ އަބްޠާލުންގެ އަގުހުރި ޚިދުމަތުގެ ޒިކުރާ އާލާކޮށް އެ އަބްޠާލުންނަަށް ސުވަރުގޭގެ ދާއިމީ ނިޢުމަތް މިންވަރުކުރެއްވުމަށް އެދި ދުޢާކުރަން.
— Ibrahim Mohamed Solih (@ibusolih) March 4, 2022
ޝަހީދުންގެ ދުވަސް ފާހަގަކުރަނީ ޤައުމަށްޓަކައި ޝަހީދުވެ ގޮސްފައިވާ ޤައުމީ އަބްޠާލުންގެ ޚިދުމަތްތަކުގެ ހަނދާންކޮށް، އެ އަބްޠާލުންގެ ޒިކުރާ އާކުރުމަށެވެ. ދުވަހުގެ ތަހުނިޔާ ދިވެހި ރައްޔިތުންނަށް ފޮނުއްވައި ރައީސުލްޖުމްހޫރިއްޔާ ކުރެއްވި ޓުވީޓުގައި ވިދާޅުވީ، ޤައުމަށްޓަކައި ޝަހީދުވެ ގޮސްފައިވާ ޤައުމީ އަބްޠާލުންގެ އަގުހުރި ޚިދުމަތުގެ ޒިކުރާ އާލާކޮށް އެ އަބްޠާލުންނަށް ސުވަރުގޭގެ ދާއިމީ ނިޢުމަތް މިންވަރުކުރެއްވުމަށް އެދި ދުޢާކުރައްވާފައެވެ.
ޝަހީދުންގެ ދުވަހުގެ ތަހުނިޔާ ނައިބް ރައީސް ފައިސަލް ނަސީމްވެސް ވަނީ ދިވެހި ރައްޔިތުންނަށް ފޮނުއްވާފައެވެ. ނައިބް ރައީސް ވިދާޅުވީ، ގައުމަށްޓަކައި ޖާނު ގުރުބާންކޮށްލެއްވި އަބްޠާލުންގެ ޒިކުރާ އާކޮށް އެއަބްޠާލުންގެ ފުރާނަފުޅަށް މާތް ﷲ ހެޔޮ ރަޙްމަތް ލެއްވުން އެދި ދުޢާކުރައްވާ ކަމަށެވެ.
މި ޝަހީދުންގެ ދުވަހު، އަޅުގަނޑުމެންނާ ހަމައަށް މިނިވަންކަންމަތީ ދިވެހިރާއްޖެ ދެމިގެން އައުމުގެ ސަބަބެއް ކަމުގައިވާ، ގައުމަށްޓަކައި ޖާނު ގުރުބާންކޮށްލެއްވި އަބްޠާލުންގެ ޒިކުރާ އާކޮށް އެއަބްޠާލުންގެ ފުރާނަފުޅަށް މާތް ﷲ ހެޔޮ ރަޙްމަތް ލެއްވުން އެދި ދުޢާކުރަން.
— Faisal Naseem (@FaisalNasym) March 4, 2022
ޝަހީދުންގެ ދުވަހަކީ އަލިރަސްގެފާނު ޝަހީދުވެވަޑައިގެންނެވި ދުވަސްކަމުގައިވިޔަސް، މިދުވަސް ޚާއްސަ ކުރެވެނީ ހަމައެކަނި އެރަސްގެފާނަކަށްނޫންނެވެ. ރާއްޖޭގެ މިނިވަންކަމާއި މާތްވެގެންވާ އިސްލާމްދީނާއި ރާއްޖޭގެ އަމިއްލަ ވެރިކަމާއި ސިޔާދަތު ދެމެހެއްޓުމަށްޓަކާ މަސައްކަތް ކުރުމުގައި ޝަހީދުވެވަޑައިގެންނެވި އެތައް ބަޠަލުންނެއްގެ ޛިކުރާ އާކުރުމުގެ ގޮތުންނެވެ.
ދިވެހިރާއްޖޭގައި ޝަހީދުންގެ ދުވަސް ފުރަތަމަ ފާހަގަކުރީ 1400 ވަނަ އަހަރުގެ ޝަޢުބާންމަހުގެ 1 ވަނަ ދުވަހުއެވެ. އެއީ މީލާދީން 14 ޖޫން 1980 ގައެވެ. ޝަހީދުންގެ ދުވަސް ރާއްޖޭގައި ފާހަގަކުރަނީ ހިޖުރީގޮތުން ކޮންމެ އަހަރެއްގެވެސް ޝަޢުބާން މަހުގެ އެއްވަނަ ދުވަހެވެ.
