-
ދަފުތަރުގައި އޮތަސް މާލޭގެ ރަށްވެހިން ވާނީ މާލޭގެ ރައްވެހިންނަށް.
-
"ދަފުތަރުގައި ޖައްސާ މާލޭގައި ރައްވެހިކުރި މީހުންނާއި މެދު އަމުދުން ތަފާތުކޮށްގެން ނުވާނެ" ކުރީގެ ބަންޑާރަ ނައިބު ދިޔާނާ
-
މާލޭ ރައްވެއްސެއްގެ ގޮތުގައި ރަޖިސްޓްރީ ވެފައިވާ ކޮންމެ މީހަކީ މާލޭ ރައްވެއްސެއް: ޤާނޫނީ ވަކީލު ޝިހާދު
މާލޭ މުނިސިޕަލްޓީގެ ޚާއްސަ ދަފުތަރަކީ ރައީސް މައުމޫނުގެ ސަރުކާރުގައި ތަޢާރަފްކުރި ރައްވެހި ކަމުގެ އާސިޔާސަތެކެވެ. ދަފުތަރު ތަޢާރަފްކުރިތާ 30 ވަރަކަށް އަހަރު ފަހުން މިކަން ނިމިގެން މިދިޔައީ އެތައް ބައެއް ރޮއްވާފައެވެ.
ސަރުކާރުން މާލޭ މުނިސިޕަލްޓީގެ ޚާއްސަ ދަފުތަރު ތަޢާރަފް ކުރީ މާލޭގައި، މާލޭގެ ގެތަކަށް ނިސްބަތް ނުވާ، ނުވަތަ މާލޭގެ ރައްވެހިން ނޫން ބަޔަކު އަތޮޅުތަކުން މާލޭ އައިސް ގެދޮރު ނެތި ދާއިމީ ގޮތެއްގައި މާލޭގައި އުޅޭކަން ސަރުކާރަށް ފާހަގަވުމުން ކަމަށް ވެދާނެއެވެ. ކޮންމެ މަޤުސަދެއްގައި ނަމަވެސް މާލޭގެ ރައްވެހިންގެ ދަރަޖަ ދީގެން އެތައް ހާސް ރައްޔިތެއް މާލެއަށް ތޮށްޖައްސައިގެން ގެންގުޅޭތާ ތިރީހަކަށް އަހަރަށް ވުރެ ގިނަވީއެވެ.
މާލޭގެ އާބާދީ ގުނަމުން ދަނީ ދަފުތަރުގައި ރެޖިސްޓްރީކޮށްފައިވާ ދިވެހިންވެސް ހިމަނައިގެންނެވެ. ކޮންމެ އިންތިޚާބެއްގައި ތަފުތަރުގެ ރައްޔިތުންް ހެއްވާލައެވެ. އެމީހުންނަށް ގޯއްޗާއި ފްލެޓް ލިބޭނެ ކަމުގެ އެތައް ހުވަފެނެއް ދައްކައެވެ.
ރިޔާސީ އިންތިޚާބުގައި ކޮންމެ ކެނޑިޑޭޓެއްވެސް އެންމެ ލޯބިވާ މީހުންގެ ތެރޭގައި ދަފުތަރުގެ ރައްޔިތުން ހިމަނައެވެ. މަޖިލިސް އިންތީޚާބާއި ކައުންސިލް އިންތިޚާބުގައި ވާދަކުރައްވާ ކެންޑިޑޭޓުން، ދައްކާ ވާހަކަތައް އަޑުއަހާލުމުން ހިވާނީ ދެންމެ ދެންމެ ގޯތި ކަނޑާދީ އަދި ފްލެޓްގެ ފަތްވެސް ހަވާލުކޮށްފާނެހެންނެވެ.
މާލޭން ގޯތި ދޫކުރަން ހުޅުވާލުމަށްފަހު އާންމުކުރި ޝަރުތު ތަކުގައި ދަފުތަރުގެ ރައްވެހިންނަށް ވަރަށް ނިކަމެތިކޮށް ހިތާފައިވާތީ، މަޝްހޫރު ޤާނޫނީ ވަކީލު އަދި ކުރީގެ ބަންޑާރަ ނައިބު ދިޔާނާ ސައީދު ވަނީ ކަންބޮޑުވުން ފާޅުކޮށްފައެވެ.
"ދަފުތަރުގައި ޖައްސާ މާލޭގައި ރައްވެހިކުރި މީހުންނާއި މެދު އަމުދުން ތަފާތުކޮށްގެން ނުވާނެ" ދިޔާނާ ޓްވިޓް ކުރައްވާފައިވެއެވެ.
ގޯތިބަހަންވީމަ އެމީހުން ދެވަނަ ދަރަޖައިގެ ރައްޔިތުންނަށް ހެދިހެދުން ބަލައިނުގަނެވޭނެ ކަމަށާއި އެމީހުންގެ ބޯތައް ގުނައިގެން މާލެއަށް ކަނޑައެޅި 15 ގޮނޑީގައި ތިއްބެއްވި މަޖިލިސް މެމްބަރުން ލަދުފުޅު ނުގަނޭތޯ ދިޔާނާ ސުވާލުކުރައްވާފައިވެއެވެ.
https://twitter.com/dhiyanasaid/status/1541092202159702016?s=20&t=WWSoPumkRqoWbldHwJyt3Q
ގޯތި ދޫކުރުމަށް ހުޅުވާލުމަށްފަހު އިޢުލާންކުރި ޝަރުތު ތަކުގައި ބުނެފައިވަނީ "މާލޭ ރައްޔިތެއް" ކަމުގައި ބަލާނީ، އެެއްވެސް އިރެއްގައި މާލެ ފިޔަވާ އެހެން އެއްވެސް ތަނެއްގެ ރަޖިސްޓްރީގައި ޖެހިފައިނުވާ ފަރާތްތަކަަށެވެ. މިގޮތަށް އޮތުމުން އެތައްހާސް ރައްޔިތެއްގެ ޙައްޤުތައް ގެއްލިގެން ހިނގައްޖެއެވެ.
ޤާނޫނީ ބައެއް ބޭފުޅުން ވިދާޅުވަނީ މިގޮތަށް މާލޭގެ ރައްވެހިކަން ދަރަޖަކޮށް، ދަފުތަރުގައި ހިމެނޭ ރައްޔިތުންނަކީ ދެވަނަ ދަރަޖައިގެން ރައްޔިތުންނަށް ނުހެދޭނެ ކަމަށެވެ.
ވިޔަފާރިވެރިޔާ އަދި ޤާނޫނީ ވަކީލު އަލްއުސްތާޒު ޝިހާދު އިބްރާހީމް ޓްވިޓްކޮށްފައިވާ ގޮތުގައި، މާލޭ ރައްވެއްސެއްގެ ގޮތުގައި ރަޖިސްޓްރީ ވެފައިވާ ކޮންމެ މީހަކީ މާލޭ ރައްވެއްސެކެވެ. އެހެން ކަމުން ވަކިކަމެއްގައި މާލޭ ރައްޔިތުކަން ވަކިގޮތަކަށް މާނަކޮށް ހައްޤުތަށް ހަނި ނުކުރެވޭނެ ކަމަށާއި މިމާއްދާ ބާތިލު ކުރުމަށް ހައިކޯޓަށް ހުށަހަޅުއްވާނެ ކަމަށް ޝިހާދު ވިދާޅުވެފައިވެއެވެ.
މާލޭ ރައްވެއްސެއްގެ ގޮތުގައި ރަޖިސްޓްރީ ވެފައިވާ ކޮންމެ މީހަކީ މާލޭ ރައްވެއްސެއް. އެހެން ކަމުން ވަކިކަމެއްގައި މާލޭ ރައްޔިތުކަން ވަކިގޮތަކަށް މާނަކޮށް ހައްޤުތަށް ހަނި ނުކުރެވޭނެ. މިމާއްދާ ބާތިލު ކުރުމަށް ހައިކޯޓަށް ހުށަހެޅުމަށް ނިންމައިފިން.@presidencymv @MoNPHImv pic.twitter.com/KHUg9b0b8I
— Shihad Ibrahim (@SJshihad) June 26, 2022
ދަފުތަރުގައި ތިބި އެތައްހާސް ރައްޔިތުންނަށް މިހާ ނިކަމެތިކޮށް ކަންތައް ކުރުމުގެ އުދާސް ބޮޑުވަން ފަށައިފިއެވެ. ދިވެހި ޖުމުހޫރިއްޔާގެ ޤާނޫނު އަސާސީގައި ކަށަވަރު ކޮށްދީފައިވަނީ ކޮންމެ ރައްޔިތަކަށް ހަމަހަމަ ފުރުސަތު ލިބޭނެ ކަމަށެވެ. ދަފުތަރުގައި އޮތަސް މާލޭގެ ރައްޔިތެއް ވާނީ މާލޭގެ ރައްޔިތަކަށެވެ.
