ސީސީއައިއޭ ވަންދޫ ވޮލީ މުބާރާތުގެ ޗެމްޕިއަންކަން ފުނަ ޓީމް ހޯދައިފިއެވެ.
އެޓީމުން ޗެމްޕިއަންކަން ހޯދީ ފައިނަލްމެޗްގައި ކާނި ޓީމާ ބައްދަލުކޮށް 3 ސެޓް 1 ސެޓުން ކުރި ހޯދައިގެންނެވެ. ފުނަ ޓީމުން ސެޓްތައް ގެންދިޔައީ، 23-25، 14-25 އަދި 21-25 އެވެ. މެޗްގެ ފުރަތަމަ ސެޓް ގެންދިޔައީ ކާނި ޓީމުންނެވެ. އެޓީމުން ސެޓް ގެންދިޔައީ 22-25 އެވެ.
ފައިނަލްމެޗް ނިމުމާއެކު މުބާރާތުގެ ވަނަވަނައަށް އައި ކުޅުންތެރިންނަށާއި ޗެމްޕިއަން ޓީމަށް ތައްޓާއި ހަނދާނީ ލިޔުން ވަނީ ދީފައެވެ. ފައިނަލް މެޗްގެ މޮޅު ކުޅުންތެރިޔަކަށް ހޮވުނީ ފުނަ ޓީމުގެ އަލީ އައްސަދެވެ. މުބާރާތުގެ އެންމެ މޮޅު 5 ކުޅުންތެރިންނަށް ހޮވުނީ ފުނަ ޓީމްގެ އަލީ އައްސަދު، ހުސެއިން މުޚުތާރު، ކާނި ޓީމުގެ އިބްރާހިމް ޝަމީޒް، މުޙައްމަދު ރިމާޒް އަދި ނިކަ ޓީމުގެ އަލީ ނިމާލެއެވެ.
މި މުބާރާތަކީ އަޟްހާ އީދާ ގުޅިގެން ވަންދޫ ކައުންސިލާއި ސީސީއައިއޭ ކުންފުނި ގުޅިގެން ކުރިއަށް ގެންދިޔަ މުބާރާތެކެވެ. މި މުބާރާތުގައި ޤައުމީ ފެންވަރުގެ ކުޅުންތެރިން ވަނީ ކުޅެފައެވެ. މި މުބާރާތުގެ ޤަވާއިދުގައިވާ ގޮތުން ކޮންމެ ޓީމަކުންވެސް ރަށުން ބޭރު 2 ކުޅުންތެރިންނަށް ކުޅެވޭނެއެވެ.
