ހއ. ހޯރަފުށީގެ މަގުތަކުގައި ތާރު އެޅުމުގެ މަސައްކަތް މިނިވަންދުވަހު ރަސްމީ ގޮތުން ފެށުމަށް ތައްޔާރުވަމުން އަންނަކަމަށް އެރަށު ކައުންސިލުން ބުނެފިއެވެ. ހޯރަފުށީގެ މަގުތަކުގައި ތާރު އެޅުމުގެ މަސައްކަތް މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރއިން އެމްޓީސީސީއަށް ހަވާލުކޮށްފައިވަނީ 8 އޭޕްރީލް 2021 އެވެ.
އެމްޓީސީސީން ހާމަކުރިގޮތުގައި ހޯރަފުށީގެ މަގުތައް ތަރައްޤީކުރުމުގެ މަސައްކަތުގެ ތެރެއިން މަގުތައް އެއްވަރު ކުރުމުގެ މަސައްކަތްތައް މިހާރު ދަނީ ކުރަމުންނެވެ. ތާރުއެޅުމަށް ބޭނުންވާ ސާމާނު މިހާރުވަނީ އެރަށަށް ގެންގޮސްފައެވެ.
ހއ. ހޯރަފުށި މަގުހެދުމުގެ މަޝްރޫޢުގެ ދަށުން، ސަބްބޭސް މަސައްކަތްތައް 13 ޖުލައި 2022 ވަނަ ދުވަހު ވަނީ ފެށިފައި. އަދި އޭބީސީއާއި އެސްފޯލްޓު މެޓީރިއަލްސް ވަނީ ޕްރޮޖެކްޓް ސައިޓަށް ގެންދެވިފައި.#MTCCProjects #RayyithungeKunfuni pic.twitter.com/ScEszDJLuF
— MTCC Plc (@MTCCPlc) July 17, 2022
ޑިޒައިން އެންޑް ބިލްޑް އުސޫލުން ހޯރަފުށީގެ މަގުތަކުގައި ތާރުއެޅުމުގެ މަސައްކަތް އެމްޓީސީސީއާއި ޙަވާލުކޮށްފައިވަނީ 16 މަސްދުވަހުގެ ތެރޭގައި މަސައްކަތް ނިންމުމަށެވެ. ހޯރަފުށީގެ ބޮޑު މަގުތައް ހިމެނޭހެން 5.3 ކީލޯމީޓަރުގެ ސަރަޙައްދެއްގައި ތާރުއެޅުމަށް ވަނީ ހަމަޖެހިފައެވެ. މީގެއިތުރުން މަގުތަކުގައި ބައްތި ޖެހުމާއި ފެންހިންދާ ނިޒާމު ވެސް ޤާއިމުކުރާނެއެވެ. މިޕްރޮޖެކްޓަށް 71.9 މިލިއަނަށްވުރެ ގިނަ ރުފިޔާ ހޭދަވާނެކަމަށް ޕްލޭނިންގ މިނިސްޓްރީން ވަނީ ހާމަކުރައްވާފައެވެ.
