ރިޔާސީ އިންތިހާބުގައި އެމްޑީޕީން އެހެން ޕާޓީއަކާއި އެކީ ކޯލިޝަނެއް ހެދުމުގެ ބާރު ރައީސް އިބްރާހިމް މުހައްމަދު ސޯލިހަށް ދިނުމަށް އެމްޑީޕީގެ ގައުމީ މަޖިލީހުން ފާސްކޮށްފިއެވެ.
އިއްޒުއްދީން ސްކޫލުގައި ބޭއްވި ގައުމީ މަޖިލިސް ޖަލްސާގައި ރައީސް ސޯލިހަށް ކޯލިޝަން ހެދުމުގެ ބާރު ދިނުމަށް ގަރާރު ހުށަހެޅުއްވީ އެމްޑީޕީގެ ރިޔާސީ ޕްރައިމަރީގައި ރައީސް ސޯލިހުގެ ކެމްޕޭން މެނޭޖަރަކަށް ހުންނެވި، ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު މުހައްމަދު ނާޝިޒެވެ.
މިގަރާރުގައި ވަނީ، ރިޔާސީ ކެންޑިޑޭޓަށް ސިޔާސީ ޕާޓީއަކާއި ނުވަތަ ސިޔާސީ ލީޑަރަކާއި ނުވަތަ ސިޔާސީ ހަރަކާތެއްގެ ލީޑަރަކާއެކު ކޯލިޝަން ހަދަން ފެނިއްޖެ ނަމަ، އެފަރާތަކާއެކު ޕާޓީގެ ނަމުގައި އެއްބަސްވުން އެކުލަވާލުމަށާއި އެފަދަ އެއްބަސްވުންތަކުގައި ސޮއިކުރުމުގެ ބާރު ރިޔާސީ ކެންޑިޑޭޓަށް ދޭންވާނެ ކަމަށެވެ.
މި ޖަލްސާގައި 85 މެމްބަރުން ބައިވެރިވިއިރު 81 މެމްބަރުން ވޯޓު ދެއްވީ ނާޝިޒްގެ ހުށައެޅުމާ އެއްގޮތަށެވެ. މިޖަލްސާ، ރައީސް މުހައްމަދު ނަޝީދަށް ތާއިދު ކުރައްވާ މެމްބަރުންގެ ތެެރެއިން ބައިވެރިވީ މަދު މެމްބަރުންކޮޅެކެވެ. ރައީސް ނަޝީދާއި، އީވާއާއި އިންތި ފަދަ ބޭފުޅުން މިޖަލްސާގައި ބައިވެރިއެއް ނުވެއެވެ.
