ސަރުކާރު ހިއްސާވާ ހުރިހާ ކުންފުންޏެއްގެ މާލީ ކަންކަން ހަރުދަނާ ކުރުމުގެ ގޮތުން ކޮންމެ ކުންފުންޏެއްގައި ޗާޓާޑް އެކައުންޓެއްޓެއް ހުންނަ ގޮތަށް ޤަވާއިދު އިސްލާހު ކުރުމަށް ނިންމާފައިވާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
މާލީ ވަޒީރު މިހެން ވިދާޅުވީ، ދައުލަތުގެ ޚަރުދުތައް ބެލެހެއްޓުމުގައި ހުރި މައްސަލަތަކާއި ގުޅޭގޮތުން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
މާލީ ވަޒީރު މޫސާ ޒަމީރު ވިދާޅުވީ ސަރުކާރުން ހިއްސާވާ ކުންފުނިތަކުގެ ރިފޯމް މަސައްކަތް ސަރުކާރުން ބާރަށް ކުރަމުންދާއިރު، ކުންފުނިތަކުގެ މާލީ ކަންކަން އެންމެ ރަނގަޅަށް ބައެއް ކުންފުނިތަކުގައި ބެލެހެއްޓިފައި ނެތްކަން ފާހަގަކުރެވިފައިވާ ކަމަށެވެ. އެގޮތުން ފެނަކަ ފަދަ ކުންފުނިތައް އޮޑިޓް ކުރުމަށް ދިއުމުން، އެކައުންޓެންޓެއް ނެތި ބަޔާންތައް ތައްޔާރު ނުވެ ހުރިކަން މާލީ ވަޒީރު ފާހަގަކުރެއްވިއެވެ.
މިކަންކަން ހައްލުކުރުމަށް ކުރީގެ މާލީ ވަޒީރުވެސް މަސައްކަތްތަކެއްކޮށްފައިވާކަން ފާހަގަކުރައްވާ، ވަޒީރު ވިދާޅުވީ، މިމައްސަލަ ހައްލުކުރުމަށް ރައީސުލްޖުމްހޫރިއްޔާއާއެކު ކުރެވުނު މަޝްވަރާތަކުން، ސަރުކާރު ހިއްސާވާ ކުންފުނިތަކުގެ މާލީ ބަޔާންތައް ތައްޔާރު ކުރަން ޗާޓާޑް އެކައުންޓެއްޓެއް ހަމަޖެއްސުމަށް،މިހާރު ނިންމަވާފައިވާކަމަށެވެ.
"އަޅުގަނޑު މިފަށާގަތް ހިސާބު ނުވަތަ އަޅުގަނޑު މިކުރާ ކަމަކީ، ސަރުކާރު ކޮންމެ އެސްއޯއީއެއްގެ ހިސާބުތައް ނިންމާނީ ރާއްޖޭގައި ޗާޓާޑް އެކައުންޓެންސީގެ ހުއްދަ އޮންނަ ފަރާތަކުން ކަމަށް. އޭރުން ކޮންމެ އެސްއޯއީއަކުން ޖެހޭނެ އެކައުންޓެންޓެއް ބަހައްޓައިގެން އެކައުންޓުތައް އޮޑިޓް ކުރެވޭނެ ނިޒާމެއް ރާވަން." މާލީ ވަޒީރު މޫސާ ޒަމީރު ވިދާޅުވިއެވެ.
