ފޮރިން މިނިސްޓަރުކަމާ ހަވާލުވެ ވަޑައިގަތީއްސުރެ އަބަދުވެސް އަބްދުﷲ ޝާހިދު ވިދާޅުވާ ވާހަކަފުޅެއް އެބައޮތެވެ؛ "އިންޑިއާއަކީ ދިވެހިންގެ ދާއިމީ އެކުވެރިއެއް. ދުޝްމަނެއް ނޫން. އިންޑިޔާ އުޅެނީ ރާއްޖެ ހިފާކަށްނޫން. ރާއްޖެއަށް، ދިވެހި ރައްޔިތުންނަށް އެހީތެރިވާން."
މި ހަގީގަތް މިހާރު ލޯމަތިން މިދަނީ ފެންނަމުންނެވެ. އިންޑިޔާގެ ފަރާތުން ރާއްޖެއަށް ލިބުނު ގެއްލުމެއް، ދެރައެއް، ތުރާލެއް ނެތެވެ. އެކަމަކު ދެ ގައުމުގެ ގުޅުން އިހުނަށްވުރެ ވަރުގަދަވެ، އެތައް ދާއިރާއަކުން އިންޑިޔާގެ އެހީތެރިކަން ދިވެހިންނަށް އެގެންދަނީ ފޯރުކޮށްދެމުންނެވެ. އެންމެ ބާރުގަދަ، ނުފޫޒު ގަދަ އަވަށްޓެރިޔާގެ ގޮތުން، އިންޑާއިން އެވަނީ ރާއްޖެ ހަމައިސްކޮޅަށް ތެދުވުމަށް އަތުގައި ހިފާފައެވެ. މަދަދުވެރިކަމާއި ލޯތްބާއެކުގައެވެ.
އިއްޔެއަކީ މި ވަރުގަދަ ގުޅުން އެންމެ ބޮޑަށް ރަމްޒުކޮށްދިން އެއް ދުވަހެވެ. ދެ ގައުމުގެ ތާރީޚީ ސޮއިތަކާއެކު ރާއްޖެއަށް ތަފާތު އެކި ދާއިރާތަކުން އިންޑިޔާގެ އެހީތެރިކަން މެދުނުކެނޑި ލިބެމުންދާނެއެވެ.
އެކި ދާއިރާތަކުން އެހީދިނުމުގެ ކަރުދާހުގައި ރާއްޖޭގެ ފަރާތުން ސޮއިކުރެއްވީ، ފޮރިން މިނިސްޓަރ އަބްދުﷲ ޝާހިދެވެ. އިންޑިއާގެ ފަރާތުން ސޮއިކުރެއްވީ، އެ ޤައުމުން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރެވެ.
އިންޑިޔާގެ އެހީލިބޭ ޕްރޮޖެކްޓްތަކުގެ ލިސްޓުގެ އެންމެ ކުރީގައި އޮތީ، ގްރޭޓާ މާލެ ކަނެކްޓިވިޓީ ޕްރޮޖެކްޓެވެ.
ދިރިއުޅުމަށާއި ވިޔަފާރި އާއި އިންފްރާސްޓްރަކްޗާގެ ވަސީލަތްތައް ޒަމާނީ ފެންވަރަށް ގާއިމްކުރުމުގެ ދިގު މަގުގެ މަޝްރޫއުގެ ދަށުން މާލެ ސަރަހައްދު ގުޅުވައިލާ ބްރިޖުތައް އެޅުމުގެ ޕްރޮޖެކްޓަށް ހަރަދުކުރާ 500 މިލިއަން ޑޮލަރުގެ ތެރެއިން 100 މިލިއަން ޑޮލަރަކީ އިންޑިއާ އިން ދޭ ހިލޭ އެހީއެވެ. އަދި 400 މިލިއަން ޑޮލަރަކީ އިންޑިޔާގެ 800 މިލިއަން ޑޮލަރުގެ "ލައިން އޮފް ކްރެޑިޓް ފެސިލިޓީ" އިން ހަރަދުކުރާ ފައިސާ އެވެ. "ލައިން އޮފް ކްރެޑިޓް ފެސިލިޓީ" އިން އެ ޕްރޮޖެކްޓަށް ދޫކުރާ 400 މިލިއަން ޑޮލަރުގެ އެއްބަސްވުމުގައި އިންޑިއާގެ އެގްޒިމް ބޭންކާއި ފިނޭންސް މިނިސްޓްރީން މިދިޔަ މަހު ވަނީ ސޮއިކޮށްފަ އެވެ. އެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހީމް އަމީރެވެ. އިންޑިއާގެ ފަރާތުން ސޮއިކުރެއްވީ ރާއްޖޭގައި ހުންނަވާ އެގައުމުގެ ސަފީރު ސަންޖޭ ސުދިރު އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުން މިހާތަނަށް އިއުލާނު ކޮށްފައިވާ އެންމެ ބޮޑު ޕްރޮޖެކްޓް ކަމުގައިވާ މާލެ-ވިލިމާލެ ބްރިޖްގެ ޕްރޮޖެކްޓަކީ މިހާތަނަށް ރާއްޖޭގައި ހިންގޭ އެންމެ ބޮޑު އިންފްރާސްޓްރަކްޗަރ ޕްރޮޖެކްޓެވެ.
ދިވެހި ޚާރިޖީ ވަޒީރު ދާދި ފަހުން ވިދާޅުވެފައިވާ ގޮތުގައި މި ތާރީޚީ ޕްރޮކްޓު ލަސްތަކެއްނުވެ ފެށިގެންދާނެ އެވެ. އިންޑިޔާއިން ކުރިން ބުނެފައިވަނީ އަންނަ ޑިސެމްބަރު މަހު މެގަ ޕްރޮޖެކްޓުގެ މަސައްކަތް ފެށޭނެ ކަމަށެވެ.
މި ދަތި ހާލުގައި ރާއްޖެއަށް އިންޑިޔާއިން ވެދީފައިވާ އެހީތަކުގެ ކުރު ލިސްޓެއް ހިމަނާލަމާހެއްޔެވެ؛ ރާއްޖޭގެ ބަޖެޓް ސަޕޯޓަށް ފައިސާ ދޫކުރިއެވެ. އަސާސީ ކާބޯތަކެތި ދަތިނުވެ ދިވެހިންނަށް ލިބޭނެ އިންތިޒާމު ހަމަޖައްސައިދިނެވެ. ރަށްރަށުގެ މަގު ބައްތި ޖަހައިދީފިއެވެ. އެތައް ރަށެއްގައި ފުޓުބޯޅަ ދަނޑުތައް އަޅައިދީފިއެވެ. ރާއްޖޭގެ އިގުތިސާދީ އަދި ސިޔާސީ ސަރަހައްދު ބަލަހައްޓާ ރައްކާތެރިކަން ގާއިމްކޮށްދިނުމުގައި އިންޑިޔާ އޮތީ ތައްޔާރަށެވެ. ކަރަންސީ ސްވައިޕްގެ ދަށުން އިންޑިޔާއިން ގެންނަ މުދަލަށް ދިވެހި ރުފިޔާއިން އަގު ދެއްކޭނެ ގޮތްތައްވެސް ރާވައިދިނެވެ. އަސްކަރީ ގޮތުންނާއި ޚާރިޖީ ގޮތުން ދެ ގައުމުގެ ގުޅުން އޮތީ ވަރަށް ވަރުގަދަކޮށްފައެވެ.
އިންޑިޔާގެ ފޮރިން ސެކްރެޓަރީ ރާއްޖެއަށް ކުރެއްވި ރަސްމީ ދަތުރުފުޅާ ގުޅިގެން އިއްޔެ އިންޑިޔާއާއި ރާއްޖެއާ ދެމެދު ސޮއިކުރި އެއްބަސްވުންތަކުގެ ދަށުން ޒުވާނުންނާއި ކުޅިވަރުގެ ކަންތައްތަކުގައި އެއްބާރުލުން ދިނުމާއި ހދ. ހަނިމާދޫގައި ދަނޑުވެރިކަމާ ބެހޭ ރިސާޗް ސެންޓަރެއް އެޅުމާއި އައްޑޫ ހުޅުދޫގައި ޑްރަގް ޑިޓޮކްސިފިކޭޝަން ސެންޓަރެއް ހެދުން ފަދަ މަސއްކަތްތައް ހިމެނެއެވެ. ހަނިމާދޫގައި ރިސާޗް ސެންޓަރު އަޅަން 1.7 މިލިއަން ރުފިޔާ، ހުޅުދޫގައި ޑިޓޮކްސިފިކޭޝަން ސެންޓަރު ހަދަން ނުވަ މިލިއަން ރުފިޔާ އިންޑިއާ އިން ފޯރުކޮށްދޭން އެއްބަސްވެފައިވާ ކަމަށެވެ.
