ނެދަލެންޑްސްގެ ކެޕްޓަން ވެންޑައިކު ނެތުމަކީ ޓީމަށް ލިބުނު ފޫ ނުބެއްދޭވަރުގެ ބޮޑު ގެއްލުމެއްކަމަށް އެޓީމުގެ ކޯޗް ބުނެފިއެވެ.
ބައިނަލްއަޤުވާމީ ރަހުމަތްތެރިކަމުގެ މެޗެއްގައި ސްޕެއިންއާ ދެކޮޅަށް މިރޭ ކުޅުމަށް ހަމަޖެހިފައިވާ މެޗްގެ ކުރިން ބޭއްވި ނޫސްވެރިންގެ ބައްދަލުވުމުގައި ނެދަލެންޑްސްގެ ކޯޗް ޑިބޮޔާ ބުނީ ޓީމުގެ އެންމެ މުހިންމު ކުޅުންތެރިޔާ ނެތުމުގެ އިހުސާސް ކުރެވެމުންދާކަމަށެވެ.
"އަހަރެން އެމެޗް( ލިވަޕޫލްއާއި އެވަޓަން ބައްދަލުކުރި މެޗް) ލައިވްކޮށް ބެލިން. އެފައުލަށް ފިޔަވަޅު ނޭޅުމުން އަހަރެން ވަރަށް ހައިރާންވި. އޭނާއަކީ އަހަރެމެންގެ ކެޕްޓަން. އަހަރެމެން އެންމެން އޭނަ މިސްވާނެ." ކޯޗް ބުންޏެވެ.
ވެންޑައިކަށް އަނިޔާވީ މިދިޔަމަހު ލިވަޕޫލާއި އެވަޓަން ބައްދަލުކުރި މެޗްގައި އެވަޓަންގެ ގޯލްކީޕަރު ޕިކްފޯޑުގެ ނުރައްކާތެރި ފައުލަކުންނެވެ. މިފައުލާއި ގުޅިގެން ވެންޑައިކުގެ ކަކުލުގެ އޮޕަރޭޝަނެއްކޮށް އޭނާއަށް ވަނީ މި ސީޒަން ނިމިފައެވެ.
ނެދަލެންޑްސްއާއި ސްޕެއިން މިރޭ 00:45 ގައި ބައްދަލު ކުރާއިރު އެންމެ ފަހުން މި ދެޓީމު ބައްދަލުކޮށްފައިވަނީވެސް 2015 ވަނަ އަހަރު ރަހުމަތްތެރިކަމުގެ މެޗެއްގައެވެ. އެމެޗް 2-0 ކާމިޔާބުކުރީ ނެދަލެންޑްސް އެވެ. ރަސްމީ މެޗެއްގައި މި ދެޓީމް އެންމެ ފަހުން ބައްދަލުކުރި މެޗް1-5 ގެ ބޮޑު ތަފާތަކުން ކާމިޔާބުކުރީ ނެދަލެންޑްސްއެވެ. އެއީ 2014 ވަނަ އަހަރުގެ ވޯލްޑްކަޕްގެ ގްރޫޕް ސްޓޭޖްގައެވެ. މިދެޓީމު މިހާތަނަށް 11 ފަހަރު ބައްދަލުކޮށްފައިވާއިރު ނެދަލެންޑްސް ވަނީ 6 މެޗް ކާމިޔާބުކޮށްފައެވެ. އެއްމެޗް އެއްވަރުވިއިރު ސްޕެއިން މޮޅުވީ 4 މެޗުންނެވެ.
ކުރިއަށްއޮތް ބައިނަލްއަޤްވާމީ މެޗްތަކުގައި ނެދަލެންޑްސްގެ ކެޕްޓަން ބޭންޑު އަޅާނީ ލިވަޕޫލްގެ މިޑްފީލްޑަރު ވައިނަލްޑަމްއެވެ.
ހޮލެންޑްގެ ކޯޗްގެ މަގާމަށް ޑިބޮޔާ ހަމަޖެއްސީ އެ މަގާމުގައި ކުރިން ހުރި ރޮނަލްޑް ކޫމަން މިދިޔަ މަހު ބާސެލޯނާގެ ކޯޗް ކަމާ ހަވާލުވުމުންނެވެ.
