މިހާރު ކުރިއަށްދާ އެމްޑީޕީ ކޮންގްރެސްގައި ޕާޓީގެ ހިންގުން ހަރުދަނާކޮށް ޑިމޮކްރެޓިކް އުސޫލުތައް ވަރުގަދަކުރުމަށްޓަކައި އެ ޕާޓީގެ އަސާސީ ގަވާއިދަށް ބޮޑެތި އިސްލާހުތަކެއް ގެނައުމަށް ވަނީ ހުށަހަޅައިފަ އެވެ.
މި ހުށަހެޅުންތަކުގެ ތެރެއިން އެންމެ ފާހަގަކޮށްލެވޭ އެއް ކަމަކީ ޕާޓީ ތެރޭގައި ރަސްމީކޮށް ފެކްޝަން އުފައްދައިގެން މަސައްކަތް ކުރުން ހުއްޓުވުމެވެ. ފެކްޝަންތަކުގެ ސަބަބުން ޕާޓީ ބައިބައިވެ، ހިންގުމަށް ހުރަސްއެޅި، ޕާޓީ ބިކަވަމުންދާ ކަމަށް މި އިސްލާހުތަކުގައި ފާހަގަކޮށްފައިވެ އެވެ. މީގެ އިތުރުން، ޕާޓީގެ ގޮފިތައް އުވާލުމަށް ވެސް ވަނީ ހުށަހަޅާފަ އެވެ. އެއީ ގޮފިތަކަކީ ހަމައެކަނި ކޮންގްރެސްއަށް މީހުން ހޮވަން ބޭނުންކުރާ ވަސީލަތަކަށް ވެފައިވާތީ އެވެ.
މީގެއިތުރުން ޕާޓީގެ ގައުމީ މަޖިލީހުގެ އިންތިހާބީ ސިފަ ވަރުގަދަކުރުމަށް ވެސް މުހިންމު އިސްލާހުތަކެއް ވަނީ ހުށަހަޅާފަ އެވެ. އެގޮތުން އިންތިހާބަކާ ނުލައި ގައުމީ މަޖިލީހަށް މީހުން އައްޔަންކުރާ އުސޫލު އުވާލުމަށް ވަނީ ހުށަހަޅާފަ އެވެ. މީގެ ތެރޭގައި ޗެއާޕާސަންގެ ނާއިބުންނާއި ވަޒީރުން ފަދަ މަގާމުތައް ހިމެނެ އެވެ. އަދި ގައުމީ މަޖިލީހުގެ މެންބަރުންނަކީ ޕާޓީގެ އޮފީހުން މުސާރަ ނުވަތަ އިނާޔަތް ލިބޭ ބަޔަކަށް ވެގެން ނުވާނެ ކަމަށް ވެސް ވަނީ ބަޔާންކޮށްފަ އެވެ.
އަދި އިންތިހާބުތަކުގެ އިންސާފުވެރިކަން ކަށަވަރުކުރުމަށްޓަކައި، ކޮންމެ އިންތިހާބެއް އިއުލާނުކުރުމުގެ 10 ދުވަސް ކުރިން ގައުމީ މަޖިލީހުން "ހާއްސަ އިންތިހާބީ ކޮމިޓީ" އެއް އެކުލަވާލަން ޖެހޭނެ ކަމަށްވެސް ވަނީ ހުށައަޅާފައެވެ. މި ކޮމިޓީގެ ދައުރަކީ އިންތިހާބުގެ ކަންކަން ބެލެހެއްޓުމެވެ. އަދި ކޮންގްރެސްގައި ބައިވެރިވާ މެންބަރުންގެ ފުރިހަމަ މައުލޫމާތު، ކޮންގްރެސް ބޭއްވުމުގެ 10 ދުވަސް ކުރިން ޕާޓީގެ ވެބްސައިޓުގައި ޝާއިއުކުރަން ޖެހޭ ގޮތަށް ވެސް ވަނީ އިސްލާހު ހުށަހަޅާފަ އެވެ.
މީގެއިތުރުން އެމްޑީޕީގެ ވެރިކަމެއްގައި އެ ޕާޓީގެ އިސް ވެރިޔަކަށް ވާނީ ޗެއާޕާސަން ކަމަށް ކަނޑައަޅައި، ރައީސުލްޖުމްހޫރިއްޔާގެ މުޝީރަކަށްވެސް ޗެއާޕާސަން އައްޔަންކުރަންޖެހޭ ގޮތަށް އަސާސީ ގަވާއިދަށް ވަނީ އިސްލާހެއް ހުށަހަޅާާފައެވެ.
އެމްޑީޕީގެ އަސާސީ ގަވާއިދަށް ހުށަހަޅާފައިވަނީ އެމްޑީޕީގެ އެންމެ އިސް ފަރާތަކީ ޕާޓީގެ ޗެއާޕާސަން ކަމެވެ. އެހެންކަމުން އެ އިސްލާހު ފާސްވެއްޖެނަމަ އެމްޑީޕީގެ ޓިކެޓުގައި ރައީސުލްޖުމްހޫރިއްޔާގެ މަގާމަށް އިންތިހާބުވާ ބޭފުޅަކު އެ ޕާޓީގެ އިސްވެރިޔަކަށް ކުރިން ހަމަޖެހޭ އުސޫލު ނިމުމަކަށް އަންނާނެ އެވެ.
އެމްޑީޕީ ކޮންގްރެސްގެ މިއަދުގެ ސެޝަންތަކުގައި އަސާސީ ގަވާއިދަށް އިސްލާހުތައް ހުށަހެޅުމާއި ބަހުސް ކުރުމާއި ވޯޓުލުން ކުރިއަށްދާނެ އެވެ. އެހެންކަމުން މި ލިޔުމުގައި މި ބަލައިލަނީ ޕާޓީގެ އަސާސީ ގަވާއިދަށް ހުށަހަޅާފައިވާ އިސްލާހުތަކާއި ބަދަލުތަކަށެވެ.
