އިސްލާމީ މިދައުލަތުގެ ވެރިރަށް ފުރަ މާލޭގެ މަގުތަކަށް ދިވެހިންގެ ތެރެއިން މަދު ބަޔަކު ނުކުމެ ދީނީ މިނިވަންކަމަށާއި އެއްޖިންސުން ގުޅުންހިންގުމުގެ މިނިވަންކަމަށް ފާޅުކަން ބޮޑުގޮތެއްގައި ގޮވާލައި ހިންގި ޖަރީމާގައި ޝާމިލުވާ ފަރާތްތަކާ މެދު، ފާއިތުވެ ދިޔަ އެއްވެސް ސަރުކާރަކުންވެސް މިއަދާ ހަމައަށް އައިއިރުވެސް އެކަށީގެންވާ ޤާނޫނީ ފިޔަވަޅު އަޅާފައި ނުވާތީވެ "ރައްޔިތުންގެ އިއްތިހާދު" ން ކަންބޮޑުވުން ފާޅުކޮށްފިއެވެ.
ރާއްޖޭގެ ގިނަ ދީނީ ޢިލްމުވެރިންނާއި މަދަނީ ޖަމާޢަތްތައް ގުޅިގެން އުފައްދާފައިވާ "ކޯލިޝަން" އެއް ކަމަށްވާ ރައްޔިތުންގެ އިއްތިހާދުން މިފަދައިން ކަންބޮޑުވުން ފާޅުކޮށްފައި މިވަނީ، އެޖަރީމާއަށް 9 އަހަރު ފާއިތުވެދިޔުމާ ދިމާކޮށް އެޖަމާޢަތުގެ ރަސްމީ ސޯޝަލް މީޑިއާ އެކައުންޓަތަކުގައި ޢާންމުކޮށްފައިވާ ބަޔާނެއްގައެވެ.
ދިވެހިންގެ މާތްވެގެންވާ އިސްލާމް ދީނާ ޢަދާޥާތްތެރިކަން ފާޅުކޮށް އެދީނަށް ޙަމަލާދީ މި ޠާހިރު ފަސްގަނޑުގައި އެހެން ދީންތަކަށް ޖާގަ ހެދުމުގެ ގޮތުން އެކިއެކި ޒަމާންތަކުގައި އެކިއެކި މިންވަރަށް ކޮށްފައިވާ މަސައްކަތްތަކަށް އިތުރުކޮށްލެވުނު ބޮޅެއްގެ ގޮތުގައި ދިވެހިންގެ މަދުބަޔަކު ހިންގި އެ ޖަރީމާއާ ގުޅިގެން އެކަމާ މެދު އަޅަން ޖެހޭ ޤާނޫނީ ފިޔަވަޅުތައް އެޅުމުގައި ކަމާބެހޭ ފަރާތްތަކުން އިހުމާލުވުމުގެ ސަބަބުން ޤައުމުގައި ނުތަނަވަސްކަން ފެތުރި ޢާއްމު މަޞްލަޙަތު ގެއްލި އެތަނުގައި ހަމަނުޖެހުން ހިނގިކަމަށްވެސް، ރައްޔިތުންގެ އިއްތިހާދު ހަރަކާތުގެ މި ބަޔާނުގައި ފާހަގަ ކޮށްފައިވެއެވެ.
އަދި، ސައްތައިން ސައްތަ މި ދިވެހިރާއްޖޭގައި ކުފުރާއި ޝިރުކުގެ އަނިޔާވެރިކަން ފާޅު ކުރުމުގެ ހުއްދަ ދިނުމަށް ގޮވާލި މީހުންނާއި، އެމީހުންގެ މައްސަލައިގެ އެންމެހާ ތަފުޞީލު މިހާރުން މިހާރަށް ރައްޔިތުންނަށް ހާމަކޮށްދީ، ޤާނޫނީ ގޮތުން އުފަލަން ޖެހޭ ޒިންމާ އުފުއްލަވައި ޝަރުޢީ އަދި ޤާނޫނީ ގޮތުން އެފަރާތަކަށް ދޭންޖެހޭ އަދަބުދިނުމަށް، ރައްޔިތުންގެ އިއްތިހާދުން ނެރެފައިވާ ބަޔާން ނިންމާލަމުން ދައުލަތަށް ގޮވާލާފައި ވެއެވެ.
މި މުޒާހަރާގައި އިސްކޮށް އުޅުނު ހިއްލަތު ރަޝީދު އަކީ، ދީނީ މިނިވަންކަމާއި އެއްޖިންސުން ގުޅުންހިންގުން ފަދަ ފިޠުރީގޮތުންވެސް ހުތުރު ކަންކަމަށް ވަކާލާތުކުރާ ފަރާތެއްކަމުގައި އަމިއްލައަށް އިޢުތިރާފުވެ މުޖުތަމަޢުގެ ތެރޭގައި އެކަންކަން ފެތުރުމަށް ފާޅުކަން ބޮޑުގޮތެއްގައި ޢަމަލީގޮތުންވެސް ތަފާތު މަސައްކަތް ކޮށްފައިވާ ފަރާތެއްކަން ފާހަގަ ކޮށްލެވެއެވެ.
ދެވައްތަރުގެ "މިނިވަން" ކަމަށް ގޮވާލައި އާޓިފިޝަލް ބީޗްގައި ކުރި މުޒާހަރާގެ މައްސަލާގައި އޭގެ ދެތިން ދުވަސް ފަހުން ހިއްލަތު ހައްޔަރުކުރެވި މަހެއްހާ ދުވަސް ބަންދުގައި ބެހެއްޓުމަށްފަހުގައި، ތަހުގީގު ފުރިހަމަކޮށް ދަޢުވާކުރުމަށް ފޮނުވާފައި ވުމުން އިތުރަށް ބަންދުގައި ބަހައްޓަންޖެހޭ ސަބަބެއް ނެތުމުން، 2012 ވަނަ އަހަރުގެ ޖެނުއަރީ މަހުގެ ކުރީކޮޅުގައި ފުލުހުންގެ ބަންދުން ހިއްލަތު ދޫކޮށްލާފައި ވާކަމަށް އޭރު ފުލުހުން ހާމަކޮށްފައި ވީނަމަވެސް، އެ މައްސަލައިގެ އަދާހަމައެއް ރަސްމީ އެއްވެސް ފަރާތަކުން ފަހުން ހާމަކޮށްދީފައެއް ނުވެއެވެ.
ސައްތައިން ސައްތަ އިސްލާމީ މި މުޖުތަމަޢުގެ ތެރޭގައި ޤާނޫނާއި ޤަވާޢިދުތަކާވެސް ޚިލާފަށް، މަދު ބައަކު ނުކުމެ ޤާނޫނުގެ އަތް ނުފޯރާފަށުގައި ތިބެގެން އެފަދަ ކަންކަން ތަކުރާރުވެދިޔުމަށް ފުރުޞަތުދެވުމީ، އިސްލާމް ދީނުގައި ނަޞީބެއް ލިބިގެން ނުވާ ތަފާތު ހަރުކަށި ފިކުރުތައްވެސް ޒުވާނުންގެ މެދުގައި އާލާވާން ފަށައި، މުޅި ޤައުމު ދާޚިލީ ހަމަނުޖެހުމަކަށް ގެންގޮސްފާނެކަމެއްކަން، ދުނިޔޭގެ ތަފާތު ޤައުމުތަކުގައި ހިނގައި ގޮސްފައިވާ ނަސްލީ ހަމަނުޖެހުންތަކަށް ބަލައި ޢިބުރަތް ޙާޞިލުކުރުމަކީ މުޅި ދަޢުލަތާއި ޢާންމު ރައްޔިތުންގެވެސް ކޮނޑުގައި އެޅިފައިވާ އިންތިހާ މުހިންމު ވާޖިބެއްކަން ހަނދާނުން ކައްސާލިޔަ ދީގެން ނުވާނެނޫންހެއްޔެވެ!
