މަސްވެރިންގެ ދުވަހުގައި އެންމެ ބޭނުންވެގެން އުޅުނީ ރައީސް އިބްރާހީމް މުޙައްމަދު ޞާލިޙަށް ގުޅާފައި މަސްވެރިންގެ ހިތުގެ ޝުޢޫރު ފާޅުކޮށްލުމަށްކަމަށާއި އަދި އެކަން ފުރިހަމަވެގެން ދިޔައީތީވެ މާތް ﷲ އަށް ޙަމްދުކުރާކަމަށް، ޒުވާން މަސްވެރިޔާ ޙަސަން ސާޖިން ބުނެފިއެވެ.
"ދޮށްޓާއި ނަނުން ފަހަރަކު އެއްޗެއް" މި ގޮތް ބޭނުންކުރެވިގެން ރާއްޖޭގައި ކުރެވެމުންދާ ތިމާވެއްޓާރައްޓެހި އަދި ދެމެހެއްޓެނިވި މަސްވެރިކަމުގެ ވައްޓަފާޅި މުޅި ދުނިޔެއަށްވެސް ދައްކާލައިގެން މުޅި ދުނިޔޭގެ ބޮޑު މަޤްބޫލުކަމެއް ރާއްޖޭގެ މަސްވެރިކަމަށް ލިބުމުގައި އިސް ދައުރެއް އަދާކުރާ ޒުވާން މަސްވެރިޔާ މިފަދައިން ހާމަކޮށްފައި މިވަނީ މަސްވެރިންގެ ދުވަހު، އިއްޔެ، ކުރި ޓްވީޓެއްގައެވެ.
ޒުވާން ސާޖިން އޭނާގެ އެއުންމީދު ފުރިހަމަވެގެންދިޔަ ގޮތް ހާމަކުރަމުން ބުނެފައި ވަނީ، ރައީސް އިބްރާހީމް މުޙައްމަދު ޞާލިޙް އޭނާއަށް ގުޅުއްވައި ވަރަށް ގިނައިރު ވާހަކަދެއްކެވި ކަމަށެވެ.
"ފާހަގަކޮށްލަން، ވަރަށް އުފާވެއްޖެ. އަދި އުންމީދު އާވެއްޖެ"
ރައީސްގެ ފޯނުކޯލާއެކު ކުރެވިގެންދިޔަ އިހުސާސާއި އަދި މަސްވެރިންނަށް މިހިނދު ދިމާވެފައިވާ ހޮންޖެހުންތަކާއި ދަތިތަކާމެދު ރައީސްގެ ފޯނުކޯލަށް ފަހުގައި ކުރެވެމުންދާ އުންމީދު ހާމަކުރަމުން "ޒުވާން މަސްވެރިޔާ" ނަމުގައި ހިންގާ ރަސްމީ ޓްވިޓަރ އަތްގަނޑުން ކޮށްފައިވާ މިޓްވީޓް ނިންމާލަމުން، މަސްވެރިރަށެއްކަމުގައިވާ ގެމަނަފުއްޓަށް އުފަން ސާޖިން ބުނެފައި ވެއެވެ.
