ދައުލަތަށް ލިބެންޖެހޭ، ޓެކްސް ފިޔަވައި އެހެނިހެން ފައިސާގެ މައްސަލަތަކުގެ ޝަރީޢަތް ހަ މަސްދުވަހުގެ ތެރޭގައި ނިންމަން ލާޒިމުކޮށް، ޓެކްސް ނެގުމާބެހޭ އިދާރީ ޤާނޫނު (ޤާނޫނު ނަންބަރު: 2010/3) އަށް ރައްޔިތުންގެ މަޖްލީހުން ގެންނެވި އިޞްލާޙުގެ ބިލު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ތަސްދީޤު ކުރައްވައިފިއެވެ.
ރައީސުލް ޖުމްހޫރިއްޔާ ތަސްދީޤުކުރެއްވުމާއެކު ޤާނޫނަކަށް ވެގެން ދިއުމުން ދިވެހި ސަރުކާރުގެ ގެޒެޓްގައި މިހިނދު ޝާއިޢުކުރެވިފައިވާ އެ ޤާނޫނަށް ޢަމަލުކުރެވޭނެކަމަށް ކަނޑައެޅިފައި ވަނީ، އެ ޤާނޫނު ގެޒެޓުގައި ޝާއިޢުކުރެވޭ ދުވަހުން ފެށިގެން ކަމަށް ވުމުން، އެ ޤާނޫނަށް މިއަދުން ފެށިގެން ޢަމަލުކުރެވެމުން ދާނެއެވެ.
ދައުލަތަށް ލިބެންޖެހޭ، ޓެކްސް ފިޔަވައި އެހެނިހެން ފައިސާ ނުދެއްކުމުން ޢަމަލުކުރެވޭނެކަމަށް މީގެ 10 އަހަރު ކުރިން ފެށިގެން ޢަމަލުކުރެވެމުން އަންނަ ޓެކްސް ނެގުމާބެހޭ އިދާރީ ޤާނޫނުގައި އެ ޤާނޫނުގެ 50 ވަނަ މާއްދާގައި ބަޔާންކޮށްފައި ވަނީ، އެފަދަ ފައިސާ ހޯދުމުގައި މީރާއިން ޢަމަލުކުރާނީ، ޓެކްސް ޤާނޫނެއްގެ ދަށުން ޓެކްސް ދެއްކުން ލާޒިމްކުރާ ފަރާތަކުން ދައްކަންޖެހި ނުދައްކާ އޮތް ޓެކްސްއެއް އެފަރާތުން ހޯދުމުގައި މީރާއިން ޢަމަލުކުރާ އުޞޫލުން ކަމަށެވެ.
އެހެންނަމަވެސް، މިއަދު ޢަމަލުކުރެވެން ފެށުނު އިޞްލާޙުގައި މި މާއްދާއަށް ބަދަލުތަކެއް ގެނެވުމުގެ އިތުރުން، މި މާއްދާގެ (ހ) އިން ފެށިގެން (މ) ގެ ގޮތުގައި، ދިހަ އަކުރެއް އިތުރުކޮށްފައި ވެއެވެ. އަދި އިތުރުކުރެވުނު މިއަކުރުތަކާއެކު ޤާނޫނަށް ގެނެވިފައިވާ ފާހަގަ ކޮށްލެވޭ އިސްލާޙުތަކުގެ ތެރޭގައި، ދައުލަތަށް ދައްކަންޖެހޭ ފައިސާއެއް ކަނޑައެޅިފައިވާ މުއްދަތުގައި ނުދައްކައިފިނަމަ، އެފައިސާއެއް ހޯދުމަށް އެންމެ ފުރަތަމަވެސް މައްސަލަ ޝަރީޢަތަށް ހުށައެޅުމުގެ އިޚްތިޔާރު ބަންޑާރަ ނައިބަށް ލިއްބައިދީފައި ވެއެވެ.
ޓެކްސް ނެގުމާބެހޭ އިދާރީ ޤާނޫނަށް ގެނެވުނު އިޞްލާޙުގެ ދަށުން ބަންޑާރަ ނައިބު ޝަރީޢަތަށް ހުށައަޅުއްވާ އެފަދަ މައްސަލައެއް ގިނަވެގެން ހަ މަސްދުވަހުގެ ތެރޭގައި ނިންމުމަށްވެސް އަލަށް ގެނެވުނު އިސްލާޙުގައި ލާޒިމުކުރެއެވެ. އަދި، ޝަރީޢަތަށް މައްސަލައެއް ހުށައެޅުމުގެ ކުރިންވެސް، ނަން ހާމަކުރުމާއި، ދައުލަތުގެ އިދާރާއަކުން ހޯދަން އެދޭ ޚިދުމަތެއް ދިނުން ހިފެހެއްޓުމުގެ ބާރުވެސް، އަލަށް ގެނެވުނު އިސްލާޙުގައި މީރާއަށް ލިބިދީފައިވާކަންވެސް ފާހަގަ ކޮށްލެވެއެވެ.
