ހުޅުމާލޭ ފަޅުގައި އޮތް ސަފާރީއެއްގައި ކެންޔާގެ އަންހެނަކަށް ޖިންސީ ގޯނާކުރި، މަޝްހޫރު "ސަފާރީ ރޭޕް ކޭސް" އާ ގުޅިގެން ދަޢުވާކޮށްދިނުމަށް އެދި ޕްރޮސެކިޔުޓަރ ޖެނެރަލްގެ އޮފީހަށް އަދި "ރަސްމީކޮށް" ނުފޮނުއްވާކަމަށް ފުލުހުންނާ ޙަވާލާދެއްވައި ވަކީލުންގެ ޓީމުން ހާމަކޮށްފިއެވެ.
އެ މައްސަލާގައި ދަޢުވާކޮށްދިނުމަށް އެދި ޕީޖީ އޮފީހަށް ފޮނުއްވާފައި ނުވާކަމަށް ފުލުހުންނާ ޙަވާލާދެވިފައި މިވަނީ، މައްސަލާގައި ދަޢުވާކޮށްދިނުމަށް އެދި ޕީޖީ އޮފީހަށް ފޮނުވިއްޖެކަމަށް މީޑިއާތަކުން ދާދިފަހުން ރިޕޯޓުކުރުމާ ގުޅިގެން މައްސަލާގައި ތުހުމަތުކުރެވޭ ފަރާތްތަކުގެ ނަންތަން، ޢާންމު އުޞޫލާ ޚިލާފަށް، ހާމަކޮށްފައި ނުވުމުގެ ސަބަބުން ޤާނޫނީ ބައެއް ފަރާތްތަކުންނާއި ޢާންމު ގިނަ ރައްޔިތުން ކަންބޮޑުވުން ފާޅުކުރަމުން ގެންދިއުމާއެކު، އަނިޔާގެ ޝިކާރައަކަށްވީ އަންހެން މީހާގެ ވަކީލުންގެ ޓީމުން ތަޙުޤީޤުކުރަށްވާ އޮފިސަރަށް ގުޅުއްވައި ކަންބޮޑުވުން ފާޅުކުރެއްވުމުން މައްސަލަ ތަހުޤީޤުކުރެއްވި އޮފިސަރު ހާމަކުރެއްވި މައުލޫމާތާއެކުއެވެ.
ކެންޔާ އަންހެން މީހާގެ ވަކީލުންގެ ޓީމުގެ ފަރާތުން މިނޫހަށް މައުލޫމާތު ދެއްވި އަލްއުސްތާޛާ ޝަފީޢާ ރިޒާ ވިދާޅުވީ، މައްސަލަ ތަޙުޤީޤުކުރަށްވާ ފުލުހުންގެ އޮފިސަރަށް ގުޅުއްވައި މައުލޫމާތު ސާފުކުރެއްވުމުން، އެމައްސަލާގައި ދަޢުވާކޮށްދިނުމަށް އެދި ރަސްމީކޮށް އަދި ޕީޖީއަށް ފޮނުއްވާފައި ނުވާކަމަށެވެ. އެހެންނަމަވެސް މިއަދުގެ ވަގުތެއްގައި އެ މައްސަލަ ޕީޖީއޮފީހަށް ފޮނުއްވާނެކަމަށްވެސް އެ އޮފިސަރު ވިދާޅުވިކަމަށް ޝަފީޢާ ފާހަގަކުރެއްވިއެވެ.
އަދި، "ސަފާރީ ކޭސް" ގައި ޝިކާރައަކަށްވީ އަންހެން މީހާގެ ވަކީލުންގެ ޓީމުގައި ހިމެނިވަޑައިގަންނަވާ އަލްއުސްތާޛާ ނޫރުބާން ފަހުމީ މިއަދު ހެނދުނު ކުރެއްވި ޓްވީޓެއްގައިވެސް މިފަދައިން ވިދާޅުވެފައި ވޭމެއެވެ.
For clarification: We have been informed by @PoliceMv that Safari Rape Case will be officially sent to @PGO_MV at some time today. We expect the authorities to follow past practice & disclose publicly the names of the persons involved in the case sent by @PoliceMv. @ShafeeaRiza
— Noorbaan Fahmy (@Noorbaan) December 17, 2020
މީގެ ކުޑައިރުކޮޅެއްކުރިން މިނޫހާ ވާހަކަދައްކަވަމުން ޝަފީޢާ އިތުރަށް ވިދާޅުވި ގޮތުގައި، މި މައްސަލާގައި ތުހުމަތުކުރެވޭ ފަރާތްތަކުގެ ނަންތައް މިފަދަ އެހެން މައްސަލަތަކެކޭ އެއްގޮތަށް ހާމަކޮށްދެއްވުމަށް ފުލުހުންގެ ކިބައިންވެސް އެދިލެއްވިކަމަށާއި، ފުލުހުންގެ އިތުރުން ޕީޖީ އޮފީހުންވެސް އެކަން އެގޮތަށް ކުރަށްވާނެކަމަށް ވަކީލުންގެ ޓީމުން އުއްމީދުކުރަށްވާކަމަށްވެސް ޝަފީޢާ ހާމަކުރެއްވިއެވެ.
ހުޅުމާލޭ ސަފާރީގައި ހިނގާދިޔަ ޖިންސީ އަނިޔާގެ މައްސަލައާ ގުޅިގެން، ފުލުހުންނާއި އަދި ސަރުކާރުގެ އެންމެ އިސްވެރިންގެ މައްޗަށްވެސް ގިނަ ބަޔަކު ބޮޑެތި ތުހުމަތުތަކެއް ކޮށްފަައިވާކަންވެސް ފާހަގަކޮށްލެވެއެވެ.
