ހދ. ކުރިނބީ ކައުންސިލްގެ ރައީސް މުޙައްމަދު އަފްރާޙްގެ މައްޗަށް ފުލުހުން ތުހުމަތުކުރާ، ފުލުހުންނަށް ފުރައްސާރަކޮށް ޤާނޫނީ ވާޖިބަށް ހުރަސްއެޅުމުގެ މައްސަލައެއް ފުލުހުން ތަހުގީގުކުރަން ފައްޓައިފިއެވެ.
ހދ. ކުޅުދުފުށީ ޕޮލިސް ސްޓޭޝަނުން ތަހުގީގުކަރަމުން ގެންދާ މި މައްސަލައިގެ ތަހުގީގަށް ޙާޟިރުވުމުގެ އަމުރު އަފްރާޙަށް އިއްޔެ ފޮނުވިފައި ވާއިރު އެ އަމުރުގައި ބުނެފައި ވަނީ، 2020 ޑިސެމްބަރު މަހުގެ 02 ވަނަ ދުވަހު ފުލުހުންގެ ޓީމަކުން ކުރިނބީއަށް ކުރި ދަތުރެއްގައި ކުރިނބީ ކައުންސިލްގެ ރައީސް އަފްރާޙް ފުލުހުންނަށް އުނދަގޫކޮށް ފުރައްސާރަކޮށް، ފުލުހުންގެ ޤާނޫނީ ވާޖިބަށް ހުރަސްއަޅާފައި ވާކަމަށް ތުހުމަތުކުރެވޭ މައްސަލައިގެ ތަހުގީގަށް، އަންނަ އާދީއްތަ ދުވަހުގެ ހެނދުނު 10:00 އަށް ކުޅުދުފުށީ ޕޮލިސް ސްޓޭޝަން ޙާޟިރުވާން އަންގާކަމަށެވެ.
"އަޅެ އަޖައިބެއް ނުވާނެ. މިއީ މައުމޫނުގެ ރަން ތިރީސް އަހަރެއް ނޫންވިއްޔާ ދޯ. ފުލުހުން ދާމަގަކުން ދަމުން ކަރުކެހިލިޔަސް ދަޢުވާ އުފުލާ ބޮޑު ތަހުގީގެއް ހިންގަން" މި ތަހުގީގާ ގުޅިގެން ފާޑުކިޔުއްވައި ނުރުހުން ފާޅުކޮށް އަފްރާޙް ކުރެއްވި ފޭސްބުކް ޕޯސްޓެއްގައި ވެއެވެ.
މި މައްސަލައާ ގުޅިގެން މިނޫހުގެ ފަރާތުން ކައުންސިލް ރައީސް އަފްރާޙަށް ގުޅާލުމުން މައުލޫމާތުދެއްވަމުން އަފްރާޙް ހާމަކުރެއްވި ގޮތުގައި، ފުލުހުން ތަހުގީގުކުރަށްވާ އެ ތުހުމަތަކީ، ޤުރުއާން ކުލާހެއްގެ ހަރަކާތްތަކެއް ހިންގުމަށް ރަށަށް އައިސް އުޅެމުންދާ ބޭރު ރަށެއްގެ އަންހެން ދެ ޓީޗަރެއްގެ ބަރަހަނާ މަންޒަރު މީހަކު ރެކޯޑުކޮށް އެ ދެއަންހެނުންނަށް ޖިންސީ ފުރައްސާރަކުރިކަމަށް ފުލުހުންނަށް ހުށައެޅުނު މައްސަލައިގެ ތަހުގީގު ކުރިއަށް ގެންދެވުމުގައި ފުލުހުން އިހުމާލުވެފައިވާ ކަމަށް ޢާންމުންނަށްވެސް ގަބޫލުކުރެވޭ މިންވަރަށް ކަންކަން ފެނިފައި ވުމުން، އެ ތަހުގީގު ކުރިއަށް ގެންދެވި ގޮތާމެދު ޢާންމު ތަނެއްގައި ސުވާލުކޮށް ނުރުހުން ފާޅުކުރުމުން އެކަމާ މެދު ކުޅުދުފުށީ ޕޮލިސް ސްޓޭޝަނުގައި މަސައްކަތް ކުރައްވާ ބައެއް ފުލުހުން ހިތްހަމަޖެހިވަޑައިނުގެން ކުރައްވާ ތުހުމަތެއް ކަމަށެވެ.
މައްސަލަ ހުށައެޅުނުތާ ގިނަ ދުވަސްތަކެއް ވެގެން ދިޔައިރުވެސް އެކަށޭނަ ތަހުގީގެއް ކުރައްވަން ނުފައްޓަވައި، މައްސަލާގައި ތުހުމަތުކުރެވޭ މީހާއާ ފުލުހަކު ފަރުދީ ހައިސިއްޔަތުން ބައްދަލުވެސް ކުރަށްވައި ހައްދަވާފައި ވުމުން، ތުހުމަތު ކުރެވޭ މީހާގެ އަތުގައި ހުރި މައްސަލައިގެ ހެކި (ވީޑިއޯ) ނައްތާލެވޭނެ ފުރުޞަތު "ފަހި" ކޮށްދެއްވީ ފުލުހުންކަމުގައި މަގުމަތީގައި ބުނެ، ތަހުގީގާމެދު ސުވާލުއުފެއްދެވުން ފިޔަވައި އެއްވެސް ކަމެއް ކޮށްފައި ނުވާނެކަމަށް އަފްރާހް ވިދާޅުވިއެވެ.
އެހެންނަމަވެސް، މި މައްސަލައާ ގުޅިގެން ފުލުހުންގެ ބަހެއް ހޯދުމަށް މިނޫހުގެ ފަރާތުން ފުލުހުންގެ މީޑިއާ އޮފިޝަލާ ސުވާލުކުރުމުން އަފްރާޙުގެ ތުހުމަތުތަށް ފުލުހުން ދޮގުކުރެއްވިއެވެ.
"ހދ. ކުރިނބީއަށް ތަހުގީގު ދަތުރެއްގައި ދިޔަ ފުލުހުންގެ ޓީމަކަށް އަމާޒުކޮށް ކައުންސިލެއްގެ ރައީސްގެ މަޤާމުގައި ހުރި މީހެއްގެ ފަރާތުން ފެނިގެން ނުވާނެފަދަ ޢަމަލުތަކެއް ފެނި، ފުލުހުންނާ ދިމާލަށް ތަފާތު ނޭދެވޭ ބަސްތަކުން މުޢާމަލާތުކޮށް، ތަނުގެ މަސްލަޙަތު ގެއްލޭގޮތަށް ޢަމަލުކޮށް، ފުލުހުންގެ ޤާނޫނީ ވާޖިބު އަދާކުރުމަށް ހުރަސް އެޅޭފަދަ ގޮތަކަށް ޢަމަލުތައް ބަހައްޓާފައިވާ މައްސަލައެއް ފުލުހުންދަނީ ތަހުގީގު ކުރަމުން."
ކުރިނބީ ކައުންސިލްގެ ރައީސްގެ މި މައްސަލަ ފުލުހުންގެ ފަރާތުން އެލްޖީއޭގެ ސަމާލުކަމަށް ގެނެވިފައި ވާކަންވެސް ހާމަކުރެއްވުމާއެކު، ފުލުހުންގެ މީޑިއާ އޮފިޝަލް ވިދާޅުވިއެވެ.
އަތޮޅުތެރޭގެ ރަށްރަށުގައި، ޚާއްޞަކޮށް ފުލުހުންގެ ޚިދުމަތް ޤާއިމުކުރެވިފައި ނުވާ ރަށްރަށުގައި، ޖިނާއީ ތަހުގީގުތައް ހިންގުމުގެ ހައިސިއްޔަތު ނެތްނަމަވެސް ރަށު ކައުންސިލުތަކަކީ ރަށުގައި ދިމާވާ ޖިނާޢީ މައްސަލަތަކާ ގުޅިގެންވެސް މުހިންމު ދައުރެއް އަދާކުރަން ޖެހޭ ބައެކެވެ. އަދި އެ މުހިންމު މަސްއޫލިއްޔަތު އެންމެ އެކަށޭނަ ގޮތެއްގައި އަދާކުރެވިގޮސް އެންމެ އެދެވޭ ނަތީޖާ ހާސިލުކުރެވޭނީ، އަތޮޅުތެރޭގެ ފުލުހުންނާ ކައުންސިލްތަކާ މެދު ބަދަހި ގުޅުމެއް ގާއިމުކުރެވި، ދެ މުއައްސަސާގެވެސް އެންމެ މުހިންމު މަޤްޞަދަކީ، ރައްޔިތު ފަރުދުންގެ ޙައްޤުތައްވެސް ގެއްލިގެން ނުދާނެ ފަދަ ގޮތަކަށް ރަށުގެ ޢާންމު މަސްލަޙަތު ޙިމާޔަތް ކުރުންކަމުގައި ވެގެންނެވެ. އަދި ޔުނިފޯމާއި ޓައީ ނެތްހިނދުވެސް ފަރުދީ ހައިސިއްޔަތުންވެސް މި މަޤްޞަދު ހަނދާނުގައި އަބަދުމެ ބެހެއްޓިގެންނެވެ.
ކައުންސިލްތަކާއި ފުލުހުންނާ ދެމެދު ނުތަނަވަސްކަން ނުވަތަ ޚިޔާލުތަފާތުވުން ގިނަ ފަހަރަށް އުފެދިގެން ދަނީ، މުއައްސަސާގެ ފަންތީގައެއް ނޫނެވެ. ދެ މުއައްސަސާއަށްވެސް ނިސްބަތްވާ ފަރުދުންގެ މެދުގައި އުފެދޭ ނުކިއްސަރު ނުވަތަ ނުތަނަވަސް ކަމެއްގެ ސަބަބުން ރަސްމީ ހައިސިއްޔަތުގެ ތެރެއަށްވެސް އެ ނުތަނަވަސްކަން ވަދެގެން ދަނީކަން، ތަކުރާރުވެ ގޮސްފައިވާ ދުރާއި އަދި ކައިރި މާޒީވެސް ހެކިިދޭ ހިނދުމެއެވެ.
