ތިމާ ބޭނުންވާ ކަމެއް ޙާޞިލުކުރުމަށް ޤާނޫނުތައް ހެދިނަމަވެސް އިލާހީ ޤާނޫނާ ފުށުއަރާ އެއްވެސް ޤާނޫނަކަށް މުސްލިމުން ޢަމަލުކުރަން ނުޖެހޭނެކަށް، ރާއްޖޭގެ މަޝްހޫރު ދީނީ ޢިލްމުވެރިޔެއް ކަމުގައިވާ ޝައިޚް އިލްޔާސް ޙުސައިން ވިދާޅުވެއްޖެއެވެ.
ސަރުކާރުގެ ކޯލިޝަން ޕާޓުނަރެއްކަމުގައިވާ ޢަދާލަތު ޕާޓީގެ ޢިލްމުވެރިންގެ މަޖްލީހުގެ ރައީސް ކަންވެސް ކުރަށްވާ ޝައިޚް އިލްޔާސް ހުސައިން މިފަދައިން ވިދާޅުވެފައި މިވަނީ، ކްރިސްޓިއަނުން އެބައިމީހުންގެ "ދީނީ" އިޙްތިފާލެއްގެ ގޮތުގައި ފާހަގަކުރާ "ކްރިސްމަސް" ފާހަގަ ކުރުމުގެ ބޭނުމުގައި މާފުށީގެ ގެސްޓުހައުސްއެއްގެ ބޭރުގައި "މޭރީ ޓްރީ" އެއް ބެހެއްޓި ހާދިސާއަށް އިޝާރާތްކުރަށްވައި މިއަދު ކުރެއްވި ޓްވީޓެއްގައެވެ.
"ކްރިސްމަސް ފާހަގަކުރުމަށް ތަޢީދު ކުރުމަކީ ﷲ ގެ އެއްކައުވަންތަކަށް ޤަބޫލުނުކުރާކަމުގެ ހެއްކެއް"
ޝައިޚް އިލްޔާސް ކުރެއްވި ޓްވީޓު ފައްޓަވަމުން ވިދާޅުވެފައި ވެއެވެ.
Christmas fahangakurumah thaeedhu kurumakee Allah ge ekkauvanthakan gaboolu nukura kamuge hekkeh
thima beynunva kameh hasilkurumah ganoonuthah
hedhiyas Ilaahee ganoona fushu'ara evves ganoonuthakah muslimun amalkuran nujeheyne pic.twitter.com/ZmdDnC1u0g— Ilyas Hussain (@shkilyas) December 19, 2020
އިލާހީ ޤާނޫނާ ފުށުއަރާ އެއްވެސް ޤާނޫނަކަށް މުސްލިމުން ޢަމަލުކުރުމަކީ، ދީނީގޮތުން ހުއްދަ ވާނެކަމަކަށް ނުވާނެކަން ކަށަވަރުވާއިރު، އިސްލާމް ދީނުގެ އަޞްލަކާއި ޚިލާފުވާ އެއްވެސް ޤާނޫނަކަށް ދިވެހި ރައްޔިތުން ޢަމަލުކުރަން ނުޖެހޭނަކަމީ ދުސްތޫރީ މަބްދައެއް ނުވަތަ ކޮންސްޓިޓުއުޝަނަލް ޕްރިންސިޕަލެއްވެސް މެއެވެ. ދިވެހި ޖުމްހޫރިއްޔާގެ ޤާނޫނު އަސާސީގައި މިކަން ވަރަށް ޞަރީޙަ ޢީބާރާތުން ތަކުރާރުކޮށްވެސް ކަނޑައަޅައި ބަޔާންކޮށްފައި ވެއެވެ.
ދިވެހި ރާއްޖޭގެ ސްޕްރީމް ކޯޓުގެ 2012 ވަނަ އަހަރުގެ 13 ވަނަ ޤަޞިއްޔާގައި، މިހާރުގެ އުއްތަމަ ފަނޑިޔާރު ފަހަގަ ކުރަށްވާފައިވާ ރައުޔުގައި މިކަން ސާފުކޮށް ބަޔާންކުރަށްވާފައި ވެއެވެ. އެމަނިކުފާނުގެ ރައުޔުގައި ވިދާޅުވެފައި ވަނީ، ދިވެހިރާއްޖޭގައި ޤާނޫނު ހެދުމުގެ އެންމެހައި ބާރުތައް ލިބިގެންވަނީ ރައްޔިތުންގެ މަޖިލީހަށް ކަމާއި، ރައްޔިތުންގެ މަޖިލީހުން ބޭނުންވެއްޖެ ކޮންމެ ކަމަކާ ގުޅޭގޮތުންވެސް، އިސްލާމްދީނުގެ އަޞްލަކާ ޚިލާފުނުވާ ގޮތުގެމަތީން، ޤާނޫނު ހެދުމާއި، ޤާނޫނަށް ބަދަލުގެނައުމާއި، ޤާނޫނު ބާޠިލުކުރުމުގެ ބާރު އެ މަޖިލީހަށް ލިބިގެންވާކަށެވެ.
އަދި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާ ޚިލާފުވާ ގޮތަށް ހެދޭ ކޮންމެ ޤާނޫނެއް، ނުވަތަ ޤާނޫނަކުން ބައެއް ވިޔަސް "އެބް އިނީޝިއޯ" ބާޠިލުވާނެ ކަމަށްވެސް، އެމަނިކުފާނުގެ ރައުޔުގައި ވިދާޅުވެފައި ވާއިރު، އިސްލާމް ދީނުގެ އަސްލަކާއި ޚިލާފަށް ޤާނޫނެއް ފާސްކުރި ނަމަވެސް، އެ ޤާނޫނަކަށް ޢަމަލުކުރަން ނުޖެހޭނެކަމީ، ޝަރުޢީ ހަމަތަކުގެ އިތުރުން، ދުސްތޫރީ އަދި ޤާނޫނީ ހަމަކަންވެސް ކަށަވަރުވެގެން ދެއެވެ.
އެފަދަ ޤާނޫނެއް ވުޖޫދުގައި އޮތްނަމަވެސް ޝަރީޢަތުން ބައްލަވާ މައްސަލަތަކުގައިވެސް އެފަދަ ޤާނޫނަކަށް ރިޢާޔަތް ކުރަށްވަން ނުޖެހޭނެ ޤާނޫނީ ހަމަވެސް، މިހާރުގެ އުއްތަމަ ފަނޑިޔާރުގެ އެ ރައުޔުގައި ފާހަގަކުރަށްވާފައި ވެއެވެ.
ޤާނޫނެއް (ޕްރައިމަރީ ލެޖިސްލޭޝަން) ނުވަތަ ޤާނޫނަކުން ބައެއް ވިއަސް ޤާނޫނު އަސާސީއާ ޚިލާފުކަމަށް، "އެބްސްޓްރެކްޓް ރިވިއު" އެއްގެ ދަށުން ކަނޑައަޅައި އެ ޤާނޫނެއް ނުވަތަ ޤާނޫނެއްގެ ބައެއް އެއްކޮށް "ސްޓްރައިކް ޑައުން" ނުކުރިނަމަވެސް، އެ މައްސަލައެއް ބަލަމުންދާ ކޯޓެއްގެ އިޙްތިޞާޞްގެ ތެރެއިން، އެ ކޯޓަކުން ބަލަމުންދާ ޙުކޫމަތްތެރި މައްސަލައަކާ ގުޅިގެން، ޤާނޫނެއް ނުވަތަ ޤާނޫނަކުން ބައެއް ވިއަސް ޤާނޫނުއަސާސީއާ ޚިލާފުތޯ "ކޮންކްރީޓް ރިވިއު" ގެ ދަށުން ބަލައި، އެފަދަ ޤާނޫނެއް ނުވަތަ ޤާނޫނެއްގެ ބައަކަށްވެސް ޝަރީޢަތުން ރިޢާޔަތް ނުކުރެއްވުމަށް ނިންމެވުމުގެ އިޚްތިޞާޞް، ދިވެހިރާއްޖޭގައި ޝަރީޢަތްކުރާ ކޮންމެ ކޯޓަކަށްމެ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 144ަ ވަނަ މާއްދާގެ (ހ) ގެ ދަށުން ލިއްބައިދީފައި ވާކަމަށްވެސް، އުއްތަމަ ފަނޑިޔާރުގެ މި ރައުޔުގައި ފާހަގަކުރަށްވާފައި މުވުންނެވެ.
