މިއަދު ހެނދުނު ރައްޔިތުންގެ މަޖިލީސް 2021 ވަނަ އަހަރަށް ހުޅުވައިދެއްވުމުގެ ގޮތުން، މަޖިލީހުގެ މި އަހަރުގެ ފުރަތަމަ ދައުރުގެ ފުރަތަމަ ޖަލްސާގައި އިއްވި ރިޔާސީ ބަޔާނުގައި ރައީސުލްޖުމްހޫރިއްޔާ ވަނީ ގިނަ ވަޢުދުތަކެއް ވެވަޑައިގެންފައެވެ.
ކޯވިޑް-19 އާއި އެކު ދިމާވި ދަތިތަކާއި އެކުގައިވެސް ތަރައްޤީގެ މަޝްރޫޢުތައް ހިންގުމަށް ގިނަ މަސައްކަތްތަކެއް ކުރައްވާކަން ރައީސްވަނީ ފާހަގަ ކުރައްވާފައެވެ. ރައީސް ވިދާޅުވީ އިންޓަނޭޝަނަލް ކޮމާޝަލް ޕޯޓާއި ގްރޭޓަރ މާލެ ކަނެކްޓިވިޓީ ބްރިޖް މަޝްރޫޢުގެ އަމަލީ މަސައްކަތް ކުރިއަށް އޮތް 6 މަސް ތެރޭގައި ފެށިގެން ދާނެކަމަށެވެ.
އަދި މާލެއާއި އެހެން ބައެއް ރަށްރަށަށް ދިމާވެފައިވާ، ބޯހިޔާވަހިކަމުގެ ދަތިކަމަށް އަވަސް ޙައްލެއް ހޯދައިދިނުމަށް ސަރުކާރުން ޚާއްޞަ ސަމާލުކަމެއް ދީގެން މަސައްކަތް ކުރަމުން ދާކަމަށާއި، އެގޮތުން ޅ.ނައިފަރާއި ބ.ތުޅާދޫ އަދި ތ.ތިމަރަފުށީގައި މިސަރުކާރުން ހަދާ ހައުސިން ޔުނިޓްތަކުގެ މަސައްކަތްވެސް ހުއްޓުމެއްނެތި ކުރިއަށް ދާކަން ވަނީ ފާހަގަކުރައްވާފައެވެ. އަދި މ.ކޮޅުފުށީގެ ހައުސިން ޔުނިޓްތަކުގެ މަސައްކަތް ފެށުމަށް ތައްޔާރުވަމުންދާއިރު، މިއިން ކޮންމެ ރަށެއްގައި ވެސް 100 ހައުސިން ޔުނިޓް ހަދާނެކަމަށް ރައީސް ޞާލިހު ވިދާޅުވިއެވެ.
"މާލޭގެ ބޯހިޔާވަހިކަމަށް ޙައްލެއް ހޯދުމަށް ރޭވި މަޝްރޫޢުތައް، ދިމާވި ބައެއް ސަބަބުތަކާ ހެދި މަޑުޖެހުމަށްފަހު، އެމަޝްރޫޢުތަކުގެ މަސައްކަތް މިހާރު ކުރިއަށް އެބަދޭ. އޭގެ ތެރެއިން، 1000 ހައުސިންގ ޔުނިޓްގެ ޢަމަލީ އްކަތް ވަނީ ފަށާފައި. އަދި ހުޅުމާލޭގައި ހަދާ އެފޯޑަބަލް ރޭންޖުގެ 2000 ހައުސިން ޔުނިޓު ޢިމާރާތްކުރުމުގެ އެއްބަސްވުމުގައި މިހަފްތާގައި ވާނީ ސޮއިކޮށްފައި. މިޔުނިޓްތަކުގެ އަމަލީ މަސައްކަތް މެއި މަހުގެ ތެރޭގައި ފެށޭނެ. މިހައުސިން ޔުނިޓުތަކަކީ ކުރިން ތަރައްޤީކޮށްފައިވާ މިގިންތީގެ ހައުސިން ޔުނިޓްތަކާ އަޅައި ބަލާއިރު،ސައިޒުގެ ގޮތުންވެސް ތަނަވަސް އަދި ނިސްބަތުން އަގުވެސް ހެޔޮ ޔުނިޓުތަކަކަށްވާނެ. އަދި އިތުރު 2000 ހައުސިން ޔުނިޓާއެކު، މިއަހަރު ނިމުމުގެ ކުރިން މަދުވެގެން 5000 ހައުސިން ޔުނިޓްގެ އަމަލީ މަސައްކަތް މާލެ ސަރަހައްދުގައި ފެށޭނެ. އޭގެ އިތުރުން މާލޭގެ ރަށްވެހިންނަށް ބޯހިޔާވަހިކަން ހޯދައިދުނުމަށް އިތުރު މަޝްރޫއެއް ފެށުމަށް މިއަންނަނީ ޕްލޭންކުރަމުން." ރައީސް ސޯލިހު ވިދާޅުވިއެވެ.
މިދިޔަ އަހަރު ފާސްކުރި ދައުލަތުގެ ބަޖެޓްގެ ޖުމްލަ ޚަރަދަކީ 37.9 ބިލިޔަން ރުފިޔާ ނަމަވެސް، ޚަރަދު ކުޑަކުރުމުގެ ނަތީޖާއަކީ، ކޮވިޑާ ގުޅިގެން ކުރި ޚަރަދުތަކާ އެކުވެސް މިދިޔަ އަހަރު ނިމުނުއިރު ޖުމްލަ ޚަރަދު 28.5 ބިލިޔަން ރުފިޔާ ކަމަށް ރައީސުލްޖުމްހޫރިއްޔާ ވިދާޅުވިއެވެ.
"މާތް ﷲގެ ވާގިފުޅާއެކު، މިއަހަރުގެ ތެރޭގައިވެސް، ކުދި އަދި މެދު ފަންތީގެ ވިޔަފާރިތަކަށް ލޯން ދޫކުރުމަށް ސަރުކާރުން ވާނީ ނިންމާފައި. އެކަމަށްޓަކައި މިއަހަރުގެ ބަޖެޓްގައި 400 މިލިޔަން ރުފިޔާ ކަނޑައަޅާފައި އޮންނާނެ. ޚަރަދުތައް ކުޑަކޮށްގެން ރައްޔިތުންނަށް ޚިދުމަތް ދެމުން މިއައީ، ސިވިލް ސަރވިސްގެ އެންމެ މުވައްޒަފެއްގެ މުސާރަވެސް އުނިނުކޮށް، އަދި އެންމެ މުވައްޒަފަކުވެސް ވަޒީފާއިން ވަކިނުކޮށް. ސަރުކާރުން ފޯރުކޮށްދިން އެހީތެރިކަމުގެ ސަބަބުން، އެތައް ދިވެހިންނެއްގެ ވަޒީފާ ސަލާމަތްކުރެވުނު. ކުދި އަދި ބޮޑެތި ވިޔަފާރިތައް ބަނގުރޫޓުނުވެ ހިންދެމިލާނެ ފުރުޞަތު ލިބުނު. ޢާއިލާތަކާއި ގޭބީސީތަކަށް ރައްކާތެރިކަން ލިބުނު،" ޚަރަދު ކުޑަކުރުމާއި ވިޔަފާރިތަކާއި ޢާންމުންނަށް ލުއިފަސޭހަކަން ގެނެސްދިނުމަށް އެޅި މި ފިޔަވަޅުތަކުގެ ނަތީޖާ ރަނގަޅުކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވިއެވެ.
