ލޯކަލް ކައުންސިލްތަކުގެ އިންތިޚާބު ލަސްކުރުމަށް ހުއްޖަތް ދެއްކުމަށްވުރެ ބޮޑަށް މިހާރު އިންތިޚާބު ބާއްވަން ނިންމާފައިވާ ތާރީޚަށް ބޭއްވުން މާ މުހިންމުކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައި މިވަނީ އިންތިޚާބު ބޭއްވުމަށް އެޗްޕީއޭއިން އެކުލަވާލާ އާންމުކުރި ގައިޑްލައިނާއި އެއްގޮތަށް އިންތިޚާބު ބޭއްވުމަށް ގޮންޖެހުންތައް ހުރިކަމަށްބުނެ އިންތިޚާބު ފަސްކުރުމަށް މިހަފްތާގައި މަޖިލީހަށް ހުށައަޅާނެކަމަށް އިލެކްޝަންސް ކޮމިޝަނުން ބުނެފައިވަނިކޮށެވެ.
އިންތިޚާބު ބޭއްވުމަށް އެންމެ ފަހުން އިއުލާންކޮށްފައިވަނީ އަންނަ އޭޕްރީލް މަހުގެ 10 ވަނަ ދުވަހުއެވެ. ނަމަވެސް އެތާރީޚަށް އިންތިޚާބު ނުބޭއްވިދާނެކަމުގެ ބިރު ހީވެފައިވާއރު، އިދިކޮޅު ފަރާތްތަކުންވެސް އަންނަނީ އިންތިޚާބު ފަސްކުރާތީ އެކަމުގެ ކަނބޮޑުވުން ފާޅުކުރަމުންނެވެ.
އިންތިޚާބު ފަސްކުރަން ޖެހިދާނެކަމަށް އިލެކްޝަންސް ކޮމިޝަނުން ބުނެފައިވާއިރު، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވީ، ކައުންސިލްތަކުގެ އިންތިޚާބު ލަސްކުރުމަށް ސަބަބުތަކާއި ހުއްޖަތް ދެއްކުމަށްވުރެ އިންތިޚާބު ބޭއްވުމަށް ކަނޑައެޅި ތާރީޚުގައި ބޭއްވުމަށް އިންތިޒާމް ހަމަޖެއްސުން މާރަނގަޅުކަމަށެވެ.
އެޗްޕީއޭގެ ގައިޑްލައިނާ އެއްގޮތަށް އިންތިޚާބު ބޭއްވުމަށް ބަޖެޓުގެ ދަތިކަން ހުރިކަންވެސް އިލެކްޝަންސް ކޮމިޝަނުން ފާހަގަކުރައްވައެވެ.
