ޙަޟާނަތުގެ މައްސަލައެއްގައި ފެމިލީ ކޯޓުން ދާދި ފަހުން ނިންމާފައިވާ މައްސަލައެއްގައި، ފުލުހުންގެ މައްޗަށް ކޮށްފައިވާ އަމުރެއް ތަންފީޒުކޮށްފައިނުވާތީ، އެމައްސަލަ ކަމާބެހޭ މުއައްސަސާތަކަށާއި، ކޯޓަށް ހުށަހެޅުމަށް ނިންމައިފިއެވެ.
ފެމިލީ ކޯޓުން މިއަހަރުގެ ޖެނުއަރީ މަހު ނިންމާފައިވާ ޙަޟާނަތުގެ މައްސަލައެއްގައި ނިންމާފައިވަނީ ކުޑަ އަންހެންކުއްޖެއްގެ ޙަޟާނަތު އެކުއްޖާގެ ބައްޕައަށް ލިބޭގޮތަށެވެ. އެހެން ނަމަވެސް، އެޙުކުމާ އެއްގޮތަށް އެކުއްޖާގެ މަންމަގެ ފަރާތުން އެއްވެސް ވަރަކަށް ޢަމަލުކޮށްފައިނުވާތީ، އެޙުކުމް ތަންފީޒުކުރުމަށްޓަކައި، މިލަދުންމަޑުލު ދެކުނުބުރީ ވެލިދޫ މެޖިސްޓްރޭޓް ކޯޓުން ފުލުހުންގެ މައްޗަށް 27 ޖެނުއަރީ 2021 ވީދުވަހު އަމުރުކޮށް މައްސަލަ ނިންމާފައިވެއެވެ. އެހެން ނަމަވެސް، އެއަމުރު އަދި މިއަދާއި ހަމައަށްވެސް ފުލުހުން ތަންފީޒެއް ނުކުރެއެވެ.
ފެމިލީ ކޯޓުގެ ޙުކުމުގައި، ކުއްޖާގެ މަންމަގެ ގާތުގައި ކުއްޖާ ދިރިއުޅެމުންދާ މާޙައުލަކީ ކުއްޖާގެ މަޞްލަޙަތު ރައްކާތެރިކޮށްދޭ، އެންމެ ރަނގަޅު މާޙައުލެއްކަމުގައި ނުބެލެވޭކަމުގައި، މިނިސްޓްރީ އޮފް ޖެންޑަރ އެންޑ ފެމިލީ ރިޕޯޓުގައި ބަޔާންކުރާކަމަށާއި، އަދި، އެމިނިސްޓްރީގެ ފަރާތުން ކުދިންނާއި ވާހަކަ ދައްކާލުމަށް ދިޔުމުން، އެކަމަށްވެސް ކުއްޖާގެ މަންމައާއި ދޮންބައްޕަގެ ފަރާތުން އިންކާރުކޮށް، ބޭއަދަބީބަހުން މުޢާމަލާތުކޮށްފައިވާކަމުގައި ބަޔާންކޮށްފައިވެއެވެ.
މީގެ އިތުރުން، ކުއްޖާ މިހާރު ދިރިއުޅޭގެއަކީ، ގެވެށި އަނިޔާ މައްސަލަތަކެއް ވަރަށް ގިނައިން ހިނގާގެއެއްކަމުގައި ކުއްޖާގެ ބައްޕަ ބުނެއެވެ. މިހުރިހާ މަންޒަރެއްވެސް ކުޑަކުއްޖާއަށް ފެންނާނެކަމުގައި ކުއްޖާގެ ބައްޕަ ބުނެއެވެ. މީގެ އިތުރުން، ކުއްޖާގެ ކިޔެވުމަށްވެސް ކުއްޖާގެ މަންމަގެ ފަރާތުން މާބޮޑު އެއްބާރުލުމެއް ދެވެމުން ނުދާތީ، ކުއްޖާގެ ބައްޕަގެ ފަރާތުން އިންތިހާއަށް ކަންބޮޑުވުން ފާޅުކުރެއެވެ. ކުއްޖާއާއި ވާހަކަ ދެއްކުމާއި، ބައްޕައާއި ބައްދަލުކޮށް ވަގުތު ހޭދަކުރުންވެސް ކުއްޖާއަށް ކުއްޖާގެ މަންމަ މަނާކުރާކަމުގައި މިނިސްޓްރީ އޮފް ޖެންޑަރ އެންޑ ފެމިލީގެ ރިޕޯޓުގައި ބަޔާންކޮށްފައިވާކަމުގައި ކުއްޖާގެ ބައްޕަ މަޢުލޫމާތު ދީފައިވެއެވެ.
ފުލުހުންގެ ފަރާތުން އަމުރު ތަންފީޒުނުކޮށްގެން ދާދި ފަހަކުން އެމައްސަލަތަށްވަނީ ކަމާބެހޭ މުއައްސަސާތަކަށްވެސް ހުށަހަޅާފައެވެ. އަދި، ކޯޓުގެ އަމުރެއް ތަންފީޒުނުކޮށްގެން އެމައްސަލަވެސް ކުއްޖާގެ ބައްޕަގެ ފަރާތުން މިހާރު ކޯޓަށް ވެއްދުމަށްވަނީ ނިންމާފައެވެ. ކޯޓަކުންކުރާ އަމުރެއް ތަންފީޒުނުކުރުމަކީ ޖަލު ޙުކުމެއް އަންނާނެ ކުށެކެވެ. މިއީ، މުޅި ފުލުހުންގެ މުއައްސަސާ ޖަވާބުދާރީވާންޖެހޭ ވަރުގެ ބޮޑު މައްސަލައެކެވެ.
