2 ހަފްތާ ކުރިން ވަންދޫ އަސްދާނު ދޯނި ކުޑަހުވަދޫއަށް ގޮސްފައިވާތީ އެ ދޯނީގެ 18 މަސްވެރިން ކަރަންޓީން ކޮށްފި

26 ފެބްރުއަރީ 2021 ގެ ފަހުން ދ. ކުޑަހުވަދޫއަށް ދިޔަ ފަރާތްތައް ކަރަންޓީން ވާން އެޗްޕީއޭއިން އަންގާފައިވާތީ ތ. ވަންދޫ "އަސްދާނު" ދޯނީގެ 18 މަސްވެރިން ކަރަންޓީން ކޮށްފިއެވެ.

ކޮވިޑް-19ގެ ސާމްޕަލް ނެގުމުގެ ކަންކަމާ ވަންދޫން އެންމެ އިސްކޮށް ހަވާލުވެހުރި، ވަންދޫ ހެލްތު ސެންޓަރު ކޮމިއުނިޓީ ހެލްތު އޮފިސަރު އާތިފާ އަބްދުއްރަހީމް ވިދާޅުވީ، 26 ފެބްރުއަރީ 2021 ގެ ފަހުން އަސްދާނު ދޯނިން ކުޑަހުވަދޫއަށް ފޭބި 18 މީހުން ގޭގައި ކަރަންޓީން ކޮށްފައިވާކަމަށެވެ.

"ރޭ އެމީހުންގެ ސާމްޕަލް ނަގާފަވީ. އެމީހުންގެ ނަތީޖާތައް އަންނަ ގޮތަކުންނާއި، ކުޑަހުވަދޫން ނެގި ރޭންޑަމް ސާމްޕަލް ތަކުގެ ނަތީޖާ ލިބުމުން އެހޮސްޕިޓަލުން ވަކި އެއްޗެއް އެންގީމަ މިރަށުގައި ކަރަންޓީނުގައި ތިބި މީހުންގެ ކަރަންޓީން މުއްދަތު ކުޑަކުރުމާއި ދިގުކުރުމަށް ވެސް ބަދަލެއް އައިސްދާނެ." ވަންދޫ ހެލްތު ސެންޓަރު ހިންގެވުމާއި ހަވާލުވެ ހުންނެވި އާތިފާ ވިދާޅުވިއެވެ.

މަސްވެރިންގެ ހަބަރުތައް ގެނެސްދޭ ނޫހެއްކަމަށްވާ މަސްވެރިން އެމްވީއާ ހަވާލާދީ އަސްދާނު ދޯނީގެ ކެޔޮޅު އިބްރާހިމް ނާފިޒް ބުނެފައިވަނީ އެދޯނި އަައިސް އަޅަންވެގެން ކުޑަހުވަދޫއަށް ދިޔައީ މިމަހުގެ ކުރީކޮޅު ކަމަށާއި މިހާރު އޭގެ ފަހުން 2 ހަފްތާ ވެދާނެކަމަށެވެ. މަސްވެރިކަމުގައި އެކި ސަރަހައްދުތަކުގައި އުޅުމަށްފަހު ރަށަށް ދިޔައީ މީގެ 4 ވަރަކަށް ދުވަސް ކުރިން ކަމަށް ނާފިޒް ބުންޏެވެ. އެ ދޯނީގެ 18 ފަޅުވެރިން ކަރަންޓީން ކުރީ ރަށަށް ދިޔަތާ 3 ދުވަސް ފަހުން ކަމަށާއި ކަރަންޓީންގެ މުއްދަތު ގުނަނީ ރަށަށް ދިޔަ ދުވަހުން ފެށިގެން ކަމަށް ހެލްތު ސެންޓަރުން އަންގާފައިވާކަމަށް ކެޔޮޅު ބުންޏެވެ.

"ދޯނީގެ 5 މީހުން ފިޔަވާ އެންމެން މިތިބީ ކަރަންޓީން ކޮށްފަ. ކުޑަހުވަދޫއަށް ފޭބީ އައިސް އަޅަން. އެރަށުން މީހަކާ ބައްދަލުވެސް ނުވޭ. އޭގެފަހުންވެސް ދޯނީގެ އެންމެން އެކީގަ މަސްވެރިކަމުގަ އުޅެވަ ރަށަށް އައިސް 3 ދުވަސްވީ ފަހުން މި އަންގަނީ ކަރަންޓީން ކަމަށް. އޭރު މިއޮތީ ކަރަންޓީން ކުރި އެންމެން ރަށުގެ ގިނަ މީހުންނާ ބައްދަލުވެސްވެފަ. ކުޑަހުވަދޫއަށް ދިޔަތާ މިހާރު 2 ހަފްތާ ވެއްޖެ. އެކަމަކު މިރަށު ހެލްތު ސެންޓަރުން ދުވަސް ގުނަނީ ރަށަށް އައި ދުވަހުން ފެށިގެން. އެއްވެސް މީހެއްގެ ފަރާތުން ރޯގާގެ އަލާމާތެއް ފެންނަނީކީނޫން. މިއީ ވަރަށް ދެކޮޅު ނުޖެހޭ އުސޫލެެއް." ކެޔޮޅާ ހަވާލާދީ މަސްވެރިން އެމްވީން ބުނެފައިވެއެވެ.

އަސްދާނު ދޯންޏަކީ މަސްވެރިކަމަށް މަޝްހޫރު ދޯންޏެވެ. ފާއިތުވި ހަފްތާގައިވެސް އެދޯނިން ވަނީ ގިނަ އަދަދަކަށް މަސް ބާނާފައެވެ.

ވަންދޫގައި ކަރަންޓީން އުސޫލު ގެންގުޅެމުން ދާގޮތުން ގިނަ ބަޔަކު އަންނަކީ ހެލްތު ސެންޓަރަށް ފާޑު ކިޔަމުންނެވެ. މި ފާޑުކިޔުންތަކާ ގުޅިގެން ހެލްތު ސެންޓަރުން ވަނީ ކަންބޮޑުވުން ފާޅުކޮށް ބަޔާނެއްވެސް ނެރެފައެވެ. މިބަޔާނުގައި، ތހެލްތު ސެންޓަރުގެ އަގު ވެއްޓޭގޮތަށް ވާހަކަ ދައްކާ ފަރާތްތަކާމެދު ޤާނޫނީ ގޮތުން ފިޔަވަޅު އަަޅަން ފަސް ނުޖެހޭނެކަމަށް ބުނެ އިންޒާރު ވެސް ވަނީ ދީފައެވެ.

ދ. ކުޑަހުވަދޫއިން ކޯވިޑް-19ގެ ޕޮޒިޓިވް ކޭސްތަކެއް ފެނިފައިވާތީ، 26 ފެބްރުއަރީ 2021 ގެ ފަހުން ދ.ކުޑަހުވަދޫގައި އުޅެފައިވާ އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އެންގުމަށް އެޗްޕީއޭއިން ވަނީ ބުނެފައެވެ. އަދި މިތާރީޚްގެ ފަހުން ދ. ކުޑަހުވަދޫއަށް ގޮސްފައިވާ ފަރާތެއްވާނަމަ، ކުޑަހުވަދޫއިން އަނބުރާ ރަށަށް އައި ދުވަހުން ފެށިގެން 14 ދުވަސްވަންދެން ކަރަންޓީނުގައި ތިބުމަށްވެސް އެޗްޕީއޭއިން ވަނީ އަންގާފައެވެ.

އެޗްޕީއޭގެ ބައެއް ނިންމުންތަކާމެދު އާންމުން ގެންދަނީ ކަންބޮޑުވުން ފާޅުކުރަމުންނެވެ. އަދި ވަކިބަޔަކަށް ފައިދާވާގޮތަށް ބައެެއް ނިންމުންތައް ނިންމާކަމުގެ ތުހުމަތުވެސް އެޗްޕީއޭއަށް އަންނަނީ ކުރަމުންނެވެ.