ކޮވިޑް-19: ރާއްޖެއިން އިތުރު މީހަކު ނިޔާވެއްޖެއެވެ.
ނިޔާވެފައިވަނީ އައިޖީއެމް ހޮސްޕިޓަލަށް އެމަޖެންސީގައި ފަރުވާދޭން ގެންދިޔަ މީހަކެވެ. އޭނާއަށް ކޮވިޑަށް ޕޮޒިޓިވްވީ ނިޔާވި ފަހުން ހެދި ޓެސްޓުންނެވެ.
އެޗްޕީއޭ އިން ވިދާޅުވީ ރޭ 20:25 ހާއިރު އައިޖީއެމްއެޗްގެ އީއާރްއަށް ގެންދިޔަ 66 އަހަރުގެ ފިރިހެނަކު 20:45 ހާއިރު ނިޔާވެފައިވާ ކަމަށެވެ. އޭނާ ނިޔާވީ ކޮވިޑް ޖެހިގެން ކަމަށް ނިންމާފައިވާ ކަމަށާއި އެހެންކަމުން މިއީ ރާއްޖެ އިން ކޮވިޑް ޖެހިގެން ނިޔާވި 66 ވަނަ މީހާ ކަމަށް އެޗްޕީއޭ އިން ވިދާޅުވިއެވެ.
ކޯވިޑް-19ގައި ރާއްޖެއިން މިހާތަނަށް ނިޔާވި 66 މީހުންގެ ތެރޭގައި ހިމެނެނީ 58 ދިވެހިންނާއި 8 ބިދޭސީންނެވެ. ރާއްޖޭގައި މިވަގުތުވެސް 2400 އަށްވުރެ ގިނަ މީހުން އަންނަނީ ކޯވިޑަށް ފަރުވާދެމުންނެވެ. މީގެތެރެއިން ހޮސްޕިޓަލްގައި 107 މީހަކަށް ދަނީ ފަރުވާދެމުންނެވެ.
