މިދިޔަ ބުރާސްފަތި ދުވަހުގެ ރޭ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓު ހަމަލާއާ ގުޅިގެން ފުލުހުން އެންމެ ބޮޑަށް ހޯދަން ބޭނުންވި ކަމަށް ބުނާ މީހާ ހައްޔަރުކޮށްފިއެވެ.
އިއްޔެ ފުލުހުން ބޭއްވި ނޫސްވެރިންގެ ބައްދަލުވުމެއްގައި އެސިސްޓެންޓު ކޮމިޝަނަރު އޮފް ޕޮލިސް މުހައްމަދު ރިޔާޒު ވިދާޅުވީ އެމީހާ އަކީ މި މައްސަލައިގެ ތަހުޤީޤަށް ބޭނުންވާ އެންމެ މުހިއްމު މީހާ ކަމަށެވެ.
މިހާތަނަށް ހައްޔަރުކުރި މީހުންގެ ތެރެއިން ދެ މީހެއްގެ މަޢުލޫމާތު ފުލުހުން ވަނީ އާންމުކޮށްފައެވެ. އެއީ މއ. ފޭރުގެ އަށް ނިސްބަތްވާ އުމުރުން 21 އަހަރުގެ މުޖާޒެވެ. 2 ވަނަ އަށް ހައްޔަރުކުރި މީހަކީ ގއ. ކޮނޑޭ، ފޮޅޭމާގެ އުމުރުން 32 އަހަރުގެ ތަހުމީން އަހުމަދެވެ.
